Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺GHy en sult den osse oft scaep van uwen naesten niet sien dolen, ende daer voorby gaen, maer ghi sult dat tot vwen broeder weder leyden.

+ A

2

Al eest oock dat v broeder v naghebuer niet en is oft dat ghi hem niet en kent, soo suldi die in v huys leyden, ende sij sullen by v blijuen tot dat v broeder die soecken sal, ende alsoo die weder crijghen.

3

Desghelijcs suldi ooc doen van eenen ezel, ende van een cleet, ende van allen ws broeders dinghen die verloren sijn, eest dat ghi sulcs iet vint, soo en suldi dat niet ongheacht laten, als oft v vreemt waer.

4

Eest dat ghi siet dat ws broeders osse oft ezel opden wech gheuallen is, soo en suldi dat niet verachten, maer ghi sult met hem die opheffen.

5

Een vrouwe en sal gheen mannelijcke cleederen aendoen, ende een man en sal gheen vrouwen cleederen besighen, want hy is versmaet voor Godt die dese dinghen doet.

6

Eest dat ghy ouer wech gaende den nest van eenen voghel vint op eenen boom, oft op daerde, ende die moeder broedende op haer ionghen oft eyeren, soo en suldi die moeder niet vanghen met den ionghen,

7

maer ghi sult die moeder laten vlieghen ende die ionghen gheuanghen behouden, op dat v wel ghesciede ende dat ghi langhen tijt leuen moecht.

8

Als ghy een nieuwe huys timmert, soo suldi eenen muer maken rontsomme dat dack, op datter gheen bloet in v huys ghestort en worde, ende dat ghi niet sculdich en wort alsser een ander af viele van bouen nederwaerts.

9

⁺Ghy en sult uwen wijngaert met gheen ander saet besaeyen, op dat het saet dwelc ghi ghesaeyt hebt, ende datter opden wijngaert wasset beyde niet gheheylicht en worden.

+ B

10

Ghi en sult niet ackeren met eenen osse ende ezele tsamen

11

Ghi en sult gheen cleet aen doen dat van wolle ende lijnen gheweuen is.

12

Coordekens suldi in die boorden maken aen die vier hoecken van uwen mantel, daer ghi mede bedect sijt.

13

Eest dat een man ghetrout heeft een wijf, ende dat hy die daer nae hatet,

14

ende soect ocsuynen om haer te verlaten, worpende haer op eenen alderquaetsten naem, ende seyt. Ic heb dese vrouwe ter huysurouwen ghenomen, ende als ick met haer versaemt ben, soo en heb ickse gheen maecht gheuonden

15

dan sullen die vader ende moeder haer nemen, ende met hen brenghen die teekenen van haren machdom tot die ouders van dier stadt welc in die poorte sijn,

16

ende die vader sal segghen. Ic heb mijn dochter desen man tot een huysurouwe ghegheuen, ende om dat hi die haet

17

soo leyt hi haer eenen seer quaden naem op, alsoo dat hi seyt. Ick en heb v dochter gheen maecht gheuonden, ende siet hier, dit sijn die teekenen van mijnder dochter maechdom. ⁺Ende si sullen dat cleet wtspraeyen voor die onders vander stadt,

+ C

18

ende die onders van dier stadt sullen dien man aengrijpen, ende hem slaen

19

verdoemende, hem daer bouen in hondert siclen siluers, welc hi den vader vander iongher dochter gheuen sal, om dat hy een maghet van Israhel met eenen seer quaden naem befaemt heeft, ende hi salse tot een huysvrouwe hebben ende haer niet moghen verlaten alle die daghen sijns leuens.

20

Maer eest warachtich dat hy haer op leyt, ende dat in die ionghe dochter den maechdom niet en is gheuonden,

21

soo sullen si haer wt haers vaders huys stooten, ende die mans van dier steden sullen haer met steenen worpen, ende sij sal steruen, want sij heeft een onbehoorlijck stuck ghedaen in Israhel, in dien dat sij oncuyscheyt bedreuen heeft in haers vaders huys, ende ghy sult dat quaet wech doen wt dat midden van v.

22

Eest dat een man by eens anders huysvrouwe gheslapen heeft, die sullen beyde steruen, dat is die ouerspeelder ende ouerspeelstere, ende ghy sult dat quaet van Israhel wech nemen.

23

Eest dat een man met een ionghe dochter die noch maget is, verlooft is ende dat iemant haer vint in die stadt, ende hem met haer versaemt

24

soo suldi die beyde leyden tot dier stadt poorten, ende men salse met steenen doot werpen. Die ionghe dochter om dat sij niet gheroepen en heeft, ⁺daer sij in een stadt was, die man, om dat hi sijns naesten huysurouwe vernedert heeft, ende ghi sult dat quaet wech nemen wt dat midden van v lieden.

+ D

25

Maer eest dat een man opt velt vint een ionghe dochter die verlooft is, ende dat hy haer aenveert, ende hem met haer versaemt, soe sal hi alleen steruen,

26

die ionghe dochter en sal niet lijden, noch sij en is die doot niet sculdich, want ghelijc een moordenaer op staet tseghen sijnen broeder, ende slaet sijn ziele doot, also heuet dese ionghe dochter gheleden,

27

si was alleen opt velt, si heeft gheroepen, ende daer en was niemant ontrent die haer hadde moghen verlossen.

[p. *174]

28

Eest dat een man een ionghe maghet vint die noch gheenen brudegom en heeft, ende dat hi haer aenueert ende hem met haer versaemt, ende die sake voort recht roemt,

29

soo sal hi (diese beslapen heeft) haren vader gheuen vijftich siclen siluers, ende hy salse tot een huysurouwe hebben, want hi heeftse ter scanden bracht, ende en salse niet moghen verlaten alle die daghen sijns leuens.

30

Gheen mensch en sal sijns vaders huysurouwe nemen, noch sijn decsel ontdecsel.