Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺VVanneer een doot lichaem gheuonden is van eenen mensch die verslaghen is, int landt welck die Heere uwe Godt v gheuen sal, ende men niet weten en sal wie des dootslach schuldich is,

+ A

2

so sullen uwe ouders ende rechters wtgaen, ende meten van der plaetsen des doode lichaems, tot alle die steden die daer int ronde ontrent ligghen,

3

ende welcke stadt si sien sullen dat dier plaetsen alder naest is, dier stadt ouders sullen nemen een veerse wten runderen, die noch gheen iock ghetrocken en heeft, noch dat lant metten ploech gheackert,

4

ende sij sullen die leyden tot een scarpe ende steenachtighe valleye, die noyt gheackert en is gheweest, noch gheen saet ontfanghen en heeft, ende si sullen daer die veerse den neck door slaen,

5

ende die priesters die kinderen van Leui sullen daer by comen, welc die Heere uwe Godt vercoren heeft dat sij hem dienen souden, ende in sijnen naem ghebenedijden, ende dat alle saken souden hanghen aen hen woort, ende gheordeelt worden al wat suyuer oft onsuyuer is.

6

Ende dan sullen die ouders van dier stadt comen tot den verslagenen, ende haer handen wasschen op die veerse, die in die valleye gheslaghen is

7

ende segghen. ⁺Ons handen en hebben dit bloet niet ghestort, nocht ons ooghen en hebben dat niet ghesien,

+ B

8

wilt uwen volc Israhel ghenadich wesen Heere welck ghy verlost hebt, ende en wilt niet eysschen dit onnoosel bloet int midden van uwen volck Israhel, Ende dan sal die schult van dien bloede hen afghenomen worden,

9

ende ghy sult ontslaghen worden van des onnoosels bloets, welc daer ghestort is, als ghy ghedaen sult hebben dat die Heere v beuolen heeft.

10

Eest sake dat ghi tseghen v vianden ten strijde wt trect, ende dat die Heere uwe Godt die in v hant leuert,

[p. *173]

ende ghi eenighe gheuanghenen met leydt,

11

ende dat ghy onder den hoop der gheuanghenen siet een schoon vrouwe, ende ghi daer op verlieft, ende wilt die tot een huysvrouwe hebben,

12

soo suldise leyden in v huys, ende sij sal het hayr van haren hoofde afscheren, ende haer naghelen corten,

13

⁺ende het cleet daer sij in gheuanghen is aflegghen, ende sij sal in v huys sittende een maent lanc haren vader ende moeder beweenen, ende daer nae suldi tot haer comen, ende by haer slapen, ende sij sal v huysurouwe sijn.

+ C

14

Maer eest dat sij namaels uwer herten niet en behaecht, soo suldi haer laten vrij gaen, ende ghi en sultse om gheldt niet moghen vercoopen, noch met ghewelt verdrucken, want ghy hebtse vernedert.

15

Eest sake dat een man twee huysurouwen heeft, een die hy lief heeft, ende een ander die hi haet, ende dat hy van die kinderen ghewonnen heeft, ende die sone vander huysurouwen die hy haet dierste gheboren is,

16

ende dat hi sijn goet deylen wilt tusschen sijnen kinderen, so en sal hi den sone vander beminder vrouwen niet moghen den iersten gheboren maken, ende dien stellen voor den sone der ghehaetter vrouwen,

17

maer hi sal den sone vander ghehaetter huysvrouwen kennen voor den iersten gheboren, ende dien van allen dat hy heeft twee dobbel gheuen Want dese is tbeghinsel van alle sijnen kinderen, ende dat recht der ierster gheboorten behoort hem toe.

18

Eest dat een man eenen sone ghewonnen heeft die wederspannich ende spijtich is, die nae sijns vaders ende moeder gheboden niet hooren en wilt, ende niet en wilt onderdanich sijn nae dat hy ghestraft is,

19

⁺soo sullen sijn ouders hem opnemen, ende brenghen voor die ouders van dier stadt, ende aen die poorte daermen recht doet,

+ D

20

ende sij sullen tot hen segghen. Dese onse sone is spijtich ende onghehoorsaem onse vermaninge en wilt hi niet hooren, hy hanteert brasseryen, ende oncuyscheyt, ende dronckenscappen,

21

het volck vander stadt sal hem met steenen worpen, ende hy sal steruen, dat ghi tquaet wech doet wt dat midden van v lieden, ende dat alle die van Israhel dit hoorende vreesen moghen

22

Als iemant sulck misdaet heeft ghedaen dat metter doot moet ghestraft worden, ende dat hy ter doot verwesen wort, ende aen een galghe ghehanghen,

23

soo en sal sijn doot lichaem aen dat hout niet blijuen, maer opden seluen dach salment begrauen. Want van Gode is hy vermalendijt die aent hout hanghet, ende ghy en sult gheensins v lant ontsuyueren, dwelc die Heere uwe God v ghegheuen sal hebben om te besitten.