Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺EEst dat ghi ter orloghen trect tseghen v vianden, ende dat ghi siet dat het rosvolck ende waghenen, ende die menichte des heyrs vanden vianden veel grooter is dan ghi hebt, soo en suldi hen niet vreesen, Want die Heere uwe Godt is met v, die v gheleyt heeft wt dat lant van Egipten,

+ A

2

Ende als nv den strijt nakende is, soo sal die priester staen voor dat heyr, ende aldus segghen totten volcke.

3

Hoort Israhel, ghy strijdt heden tseghen v vianden, en laet v herte niet veruaert wesen, en wilt niet vreesen, noch en wilt niet wijcken, noch en ontsiet hen niet,

4

want die Heere uwe Godt is int midden van v, ende hi sal voor v teghen uwe wederpartie strijden, om v wten perijkel te verlossen.

5

⁺Ende die hooftmannen sullen ooc door elcken hoop dat alle theyr hoore wt roepen. Wie ysser die een nieuwe huys ghetimmert heeft ende dat noch niet ghewijdt en heeft? Die gae wech ende keer wederom in sijn huys dat hy by auontueren inden strijdt niet en sterue, ende dat een ander dat wijde.

+ B

6

Wie ysser die eenen wijngaert gheplant heeft, ende dien noch niet ghemeyn ghemaect en heeft, daer een yeghelijc soude moghen af eten? Die gae wech ende keer weder om in sijn huys, dat hy by auontueren inden strijdt niet en sterue, ende dat een ander man sijn officie niet en ondergae.

7

Wie ysser die hem aen een vrouwe verlooft heeft, ende die noch niet tot een huysurouwe ghenomen en heeft? Die gae wech ende keer wederom thuyswaerts, dat hy by auontueren inden strijdt niet en sterue, ende een ander haer tot een huysvrouwe neme.

8

Als dit gheseyt is, soo sullen sij die ander dinghen noch daer toe segghen, ende spreken tot den volcke.

Isser iemant die bloode is, ende vervaert van herten? die gae wech, ende keer wederom nae sijn huys, dat hy die herten van sijnen broederen niet veruaert en make, ghelijck hy met vreesen veruaert is,

9

Ende als die hooftmannen des heyrs swijghen ende al volseyt hebben sullen, soo sal een ieghelijck sijn hoopen ten strijde bereyden.

10

⁺Als ghy coemt om een stadt te beuechten, soo suldi hen ierstmael paeys bieden.

+ C

11

Eest dat sij dien ontfanghen ende v die poorten open doen, soo sal alle tvolck datter in is behouden sijn, ende v dienen onder tribuyt,

12

Maer eest sake dat sij gheen verbont maken en willen, ende tseghen v oorloghe aennemen, soo suldise bestormen.

13

Ende als die Heere v Godt die stadt in v hant gheleuert sal hebben, soo suldi alle mans persoonen die daer binnen sijn dootslaen metten scerpen vanden swaerde,

14

sonder die vrouwen ende kinderen, ende dat vee, metten anderen dinghen die in die stadt sijn. Alle den roof suldy den heyre deylen, ende ghy sult eten van uwer vianden roof, den welcken die Heere uwe Godt v ghegheuen sal hebben.

15

Aldus suldi doen alle den steden die seer verre van v gheleghen sijn, ende niet en sijn vanden steden die ghy tot een besittinghe ontfanghen sult.

16

⁺Maer vanden steden die v sullen ghegheuen worden, en suldi gheensins iemant laten leuen,

+ D

17

maer ghi sultse dooden met dat scerp vanden swaerde, Te weten die Hethiters, ende Amorrhiters, ende Chananiters Pherezeiters, ende Heueiters, ende Iebusiters, ghelijc die Heere uwe Godt v gheboden heeft,

18

dat sij v by auontueren niet en leeren doen alle die afgrijselijckheden, die sij haren goden ghedaen hebben, ende dat ghy alsoo niet en sondicht teghen den Heere uwen Godt.

19

Als ghy een stadt langhen tijt belegghet, ende die stercten omlegget om die te winnen, soo en suldi die boomen niet afhouwen daermen af eten mach, noch ghi en moet dat lant met bijlen rontsomme niet verderuen, want het is een hout ende gheen mensch, noch ten can tgetal niet vermeerderen der gheender die teghen v strijden,

20

Maer sijnder eenighe boomen die gheen etelijcke vrucht en draghen, maer sijn wilt ende bequaem tot anderen ghebruyck, houwet die af, ende maect daer af schutgheweer tot dat ghy die stadt inghenomen hebt, daer ghy teghen strijdt.