Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ALs die Heere uwe Godt sal die heydenen verdreuen hebben, wiens lant dat hy v gheuen sal, ende als ghy dat sult besitten, ende in hen steden ende huysen woonen,

+ A

2

soo suldi voor v drij steden wtscheyden int midden des lants, dat die Heere uwe Godt v gheuen sal, tot besittinghe,

3

banende naerstelijck die weghen, ende ghi sult v gheheel lant deylen in drij ghelijcke deelen, op dat een mensch die vluchtich is om eenen dootslach mach nae by hebben een stadt, daer hi ontgaen mach,

4

Dit sal dat recht wesen van eenen vluchtighen dootslagher, wiens leuen behouden sal worden. Soo wie sijnen naesten onwetens gheslaghen heeft, ende datmen niet en can toonen dat hy ghisteren oft eerghisteren daer teghen eenighen haet ghehadt heeft,

5

maer dat hy simpelijck met hem int bosch ghegaen is om hout af te houwen, ende int afhouwen des houts het bijl wt sijnder hant gheulouwen is, ende het ijser wten stele vallende, sijnen vrient gheraect, ende doot gheslaghen heeft, dese sal vlieden tot een van die voorseyde steden, ende leuende blijuen,

6

op dat by auontueren die naeste (vanden ghenen wiens bloet ghestort is, ⁺wt droeuer gramscap verwect sijnde, hem niet en veruolghe ende grijpe (waert dat den wech verre ware) ende sloech die ziele van hem die der doot niet sculdich en is, want men thoont dat hy te voren teghen hem die doot gheslaghen is, gheenen haet en heeft ghehadt.

+ B

7

Daerom ghebiede ick v dat ghi drij steden bedeylt ghelijckelijcken verre van malcanderen,

8

Maer als die Heere uwe Godt uwe palen sal verbreyt hebben, ghelijck hy uwen vaderen ghesworen heeft, ende dat hy v sal ghegheuen hebben alle dat lant welck hy hen ghelooft heeft

9

(eest nochtans alsoo dat ghi oock sijn gheboden onderhoudt, ende doet alle dat ick v heden ghebiede, dat ghi den Heere uwen Godt bemint ende wandelt in sijn weghen tot allen tijden) dan suldi daer toe doen voor v drij ander steden, ende ghi sult het ghetal vanden voorseyden drij steden dobbel maken,

10

datter gheen onnosel bloet ghestort en worde int midden des lants welck die Heere uwe Godt v sal te besitten gheuen, op dat ghij des bloets niet sculdich en wort.

11

⁺Maer eest datter iemant is die haet hebbende teghen sijnen naesten listen leyt sijnen leuen, ende dat hi opstaende dien staet, ende dat die sterft, ende dat hy dan vliedt tot een van die voorseyde steden,

+ C

12

soo sullen die ouders van dier stadt wtsenden ende hem trecken wt die vluchtstede, ende hem leueren in die handen van sijn naeste maescap, wiens bloet ghestort is, ende hy sal steruen.

13

Ghy en sult sijns niet ontfermen, ende ghi sult dat onnoosel bloet wt dat midden

[p. *172]

van Israhel wech nemen, op dat v welsij.

14

⁺Ghi en sult tot v niet nemen oft verstellen die palen van uwen naesten welck uwe voorsaten ghestelt hebben in uwe besittinghe, welck die Heere uwe Godt v gheuen sal int lant dat ghi sult ontfanghen om te besitten.

+ D

15

Gheen ghetuyghe en sal alleen opstaen teghen iemanden, tsij van wat sonde oft misdaet dattet is, maer inden mont van twee oft drij ghetuyghen sal alle woort staen.

16

Eest sake datter een valsch ghetuyghe tseghen eenen mensch opstaet, hem aentijghende eenighe ouertredinghe,

17

soo sullen sij beyde (dien die sake aengaet) voor den Heere staen, voor dat aenschijn des priesters ende rechters die te dien tijden sijn sullen,

18

Ende als sij seer naerstelijck ondersoekende beuonden hebben dat die valssche ghetuyghe een loghene gheseyt heeft tseghen sijnen broeder,

19

soo sullen sij hem wederom doen ghelijck hi sijnen broeder ghedacht hadde te doen, ende ghi sult dat quaet wech doen wt dat midden van v,

20

op dat die andere dit hoorende moghen vreese hebben, ende gheensins sulcke dinghen en dorren doen.

21

Ghy en sult sijnder niet ontfermen, maer ghy sult eysschen ziel om ziele, ooghe om ooghe, tant om tant, hant om hant, voet om voet.