Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺DIe Priesters ende Leuiten ende alle die van dien seluen gheslachte sijn, en sullen gheen deel, oft erffelijcheyt hebben, met die ander van Israhel, want si sullen des Heeren sacrificien ende sijn offeranden eten,

+ A

2

ende sij en sullen anders niet ontfanghen van haerder broeders besittinghe, Want die Heere is selue haerlieder erue ghelijc hy hen gheseyt heeft.

3

Dit sal der priesters recht sijn vanden volcke, ende vanden ghenen die slachofferanden offeren, tsij oft sij eenen osse, oft een scaep offeren, soo sullen sij den priester gheuen die scouder, ende die maghe,

4

die ierste vruchten van coren, wijn, ende olie, ende een deel der wollen van dat sceersel der scapen,

5

Want hem heeft die Heere uwe Godt vercoren wt allen uwen gheslachten, dat hy staen soude ende dienen den naem des Heeren hy ende sijn kinderen inder eewicheyt.

6

⁺Eest sake datter een Leuijt ghegaen is wt een van uwen steden, van gheheel Israhel daer hy in woont ende dat hy comen wilt begheerende die plaetse welck die Heere vercoren sal hebben,

+ B

7

soo sal hy dienen inden naem des Heeren sijns Gods, ghelijck alle sijn broeders die Leuiten, die op dien tijt staen sullen voor den Heere.

8

Dat selue deel der spijsen sal hy ontfanghen, dat die andere hebben, sonder tghene datmen hem na recht schuldich is in sijn stadt van sijns vaders versterffenisse.

9

Als ghy sult comen sijn in dlant welck die Heere uwe Godt v gheuen sal, soo wacht v dat ghi niet en wilt nauolghen die afgrijselijcheden van dien volcke,

10

noch en laet niemant onder v gheuonden worden, die sijnen sone oft dochter suyuere, leydende die doort vier, oft die iet vraghe vanden waersegghers wten inghewant der beesten, ende die droomen oft voghelen sanck waerneemt, noch en laet niemant sijn een toouenaer,

11

oft besweerder, noch die raet vraghe vanden ghenen die eenen waersegghenden viant binnen hebben, ⁺oft metten viant ghemeynscap hebben, ende die vanden dooden die waerheyt vraghe.

+ C

12

Want alle dese dinghen sijn den Heere afgrijselijck, ende om alsulcken boosheden sal hy dese luyden vernielen tot uwer incoemsten,

13

ghi sult volmaect wesen, ende sonder smette met den Heere uwen Godt.

14

Dese luyden der welcker lant ghi besitten sult hooren na waerseggers ende toouenaers, maer ghi sijt anders gheleert van den Heere uwen Godt.

15

Die Heere uwe Godt sal v eenen propheet verwecken wt uwen volcke, ende wt uwen broeders, mijns ghelijck, desen suldi hooren

16

ghelijc ghi vanden Heere uwen Godt begheert hebt te Horeb, als die menichte vergadert was ende ghi seyt. Ick en sal voortaen niet meer hooren des Heeren mijns Gods stemme ende dit ouer groot vier en sal ick niet meer sien, dat ick niet en sterue,

17

Ende die Heere seyde tot my. Sij hebbent al wel gheseyt.

18

Ick sal hen eenen propheet verwecken wt dat midden van haren broeders, ws ghelijck, ende ick sal mijn woorden in sijnen mont stellen, ⁺ende hy sal tot hen spreken alle dat ick hem ghebieden sal

+ D

19

Ende soo wie sijn woorden die hy in mijnen naem spreken sal, niet en sal willen hooren, daer sal ick wreker af sijn.

20

Maer een propheet die door vermetelijcheyt verarghert wilt spreken in mijnen naem dat ick hem niet en hebbe beuolen te segghen, oft wt den naem der vreemder goden, dien salmen dooden.

21

Maer eest dat ghi door heymelijcke ghedachten antwoort. Hoe sal ick moghen kennen welck woort dat die Heere niet ghesproken en heeft?

22

soo suldi dat voor een teeken hebben. Soo wat die propheet inden naem des Heeren te voren seyt, dwelck niet en gheschiet, dat en heeft die Heere niet ghesproken, maer die propheet heeft dat versiert door die opgheblasenheyt sijns herten, ende daerom en suldi hem niet vreesen.