Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺GHy en sult den Heere uwen Godt tot slachoffere gheenen osse oft scaep offeren daer een smette oft eenich ghebrec aen is, want dats een afgrijselijcheyt den Heere uwen Godt.

+ A

2

Wanneer by v binnen eenighe van uwen poorten (welc die Heere uwe God v gheuen sal) gheuonden worden man oft vrouwe die quaet doen voor die ooghen des Heeren ws Gods ende ouertreden sijn verbont,

3

also dat sij gaen ende dienen den vreemden goden, ende die aenbidden, die sonne ende die mane, ende alle dat heyr des hemels, dwelck ick niet gheboden en hebbe,

4

ende dat v dit ghebootschapt wort. ende ghi dit hoorende naerstelijc sult ondersocht hebben, ende warachtich beuonden, ende dat die afgrijselijcheyt in Israhel ghesciet is,

5

soo suldi die vrouwe ende man wtleyden, die sulck alder quaetste dinck bedreuen hebben tot uwer stadt poorten, ende sij sullen met steenen doot gheworpen worden.

6

⁺Door den mont van twee oft drij ghetuyghen sal hy steruen, die ghedoot sal worden. Niemant en laet ghedoot worden als daer maer een teghen hem ghetuyghenis en spreect.

+ B

7

Die hant der ghetuyghen sal dierste sijn om hem te dooden, ende dan sal die hant van dander volck ten laetsten daer toe ghedaen worden, dat ghy tquaet moecht wech doen wt dat midden van v.

8

Eest sake dat ghi siet dat eenich vonnisse bi v swaer ende twijfelachtich is, tusschen bloet ende bloet, tusschen sake ende sake, lazarie ende gheen lazarie, ende dat ghi siet dat die woorden der rechters binnen uwer poorten versceyden sijn, soo staet op ende reyst opwaerts ter plaetsen, welc die Heere uwe Godt vercoren sal hebben,

9

ende ghi sult comen by die priesters van dat gheslachte der Leuiten, ende tot den rechter die in dien tijden wesen sal ende ghi sult van hen vraghen, ende sij sullen v die waerheyt van dat vonnis segghen.

10

Ende ghi sult doen al dat sij v segghen, die ouerste sijn van dier plaetsen, welck die Heere vercoren sal hebben, ⁺ende dat sij v leeren sullen nae sijn wet,

+ C

11

ende ghi sult hen vonnisse volghen, ende daer niet besijden afgaen ter rechter oft ter slinckerhant,

12

Maer soo wie hem verhoouaerdicht niet willende onderdanich wesen des priesters ghebode die dien tijde den Heere uwen Godt dient, die mensch sal door des rechters vonnisse steruen, ende ghy sult dat quaet wech doen wt Israhel,

13

ende allet volck dit hoorende sal vreesen, op dat niemant voortaen door houerdie opgheblasen en worde.

14

Als ghi int lant sult comen sijn, welck die Heere v Godt v gheuen sal, ende ghi dat beseten ende daer in ghewoont sult hebben, ende dan segghen sult. Ic sal eenen coninck ouer my stellen, ghelijck alle die natien hebben die rontsomme ligghen,

15

soo suldi dien coninck stellen, den welcken die Heere v Godt kiesen sal, wt dat ghetal van uwen broeders.

⁺Ghy en sult gheenen mensch moghen coninc maken die van een ander volck is, die uwe broeder niet en is.

+ D

16

Ende als die coninck sal ghestelt sijn, soo en sal hi voor hem niet veel peerden houden, ende hy en sal dat volck in Egipten niet weder leyden, verhoouerdicht sijnde door dat ghetal der peerden, besonder want die Heere v beuolen heeft dat ghy gheensins meer en soudt door den seluen wech wederkeeren.

17

Hy en sal niet seer veel huysurouwen hebben, die sijn ghemoet mochten aen locken, noch hy en sal oock gheen onmetelijcken ghewichten van siluer ende gout hebben,

18

Maer als hy inden stoel sijns rijcks gheseten sal sijn,

[p. *171]

soo sal hy voor hem bescrijuen een wtscrift van deser wet in eenen boec nemende dat exemplier vanden priesters die van der Leuiten gheslacht sijn,

19

ende hy sal dat by hem houden, ende lesen alle die daghen sijns leuens op dat hi den Heere sijnen Godt mach leeren vreesen, ende bewaren sijn woorden ende ceremonien, die in die wet gheboden sijn,

20

Ende sijn herte en sal door houerdie niet verhauen worden ouer sijn broeders, Noch hy en sal niet besijden gaen ter rechter oft ter slincker sijden op dat hy langhen tijt regneren mach, hy ende sijn sone ouer Israhel.