Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ONderhoudt die maent der nieuwer vruchten ende den iersten tijt vanden Lenten, dat ghi phase maket den Heere uwen Godt, want in dese maent soo heeft die Heere uwe Godt v wt Egypten gheleyt inder nacht.

+ A

2

Ende ghy sult uwen Heere Godt dat phase offeren van uwen scapen, ende van uwen ossen, ter plaetsen welc die Heere uwe Godt vercoren sal hebben, om dat sijnen naem daer soude woonen.

3

Ghi en sult op dien tijt gheen ghedeesemt broot eten. Seuen daghen lanck suldi eten sonder heue, dat broot des lijdens, want met anxt sijdy wt Egypten

[p. *170]

ghegaen, dat ghi alle die daghen ws leuens moecht ghedachtich wesen des daechs inden welcken ghy wt Egipten ghinct.

4

Daer en sal gheen ghedeesemt broot ghesien worden in allen v palen seuen daghen lanck, Ende vanden vleesche, dat tsauonts opden iersten dach gheoffert is en sal daer niet ouerblijuen tot smorghens toe.

5

Ghy en sult dat Phase niet moghen offeren, in alle uwe steden, welck die Heere uwe Godt v gheuen sal,

6

⁺Maer op die plaetse welck die Heere uwe Godt verkiesen sal, dat sijnen naem daer woonen soude, daer suldy dat Phase dooden ten offere tsauonts, omtrent der sonnen onderganck als ghy wt Egipten ghinct,

+ B

7

Ende ghy sult dat coken ende eten ter plaetsen, welck die Heere uwe Godt vercoren sal hebben, ende des morghens opstaende suldi in uwe tabernakelen gaen.

8

Ses daghen suldi onghedeesemt broot eten, ende op den seuensten dach, om dat dan is die vergaderinghe des Heeren ws Gods, en suldi gheen werc doen.

9

Ghy sult by v seluen tellen seuen weken, van dien dach aen als ghi die seysene ierst int coren slaet,

10

ende ghi sult vieren den feestdach der weken, den Heere uwen Godt een vrijwillighe offerande van uwer hant, die suldi offeren nae dat v die Heere v Godt ghebenedijt heeft,

11

ende ghy sult vrolijck maeltijt houden voor den Heere uwen Godt, ghi ende v sone, ende v dochter, ende v knecht, ende v dienstvrouwe, ende die leuijt die binnen uwen poorten is, ⁺ende die vreemdelinck, ende die weese ende weduwe die by v woonen, ter plaetsen welck die Heere v Godt verkiesen sal, dat sijnen naem daer woonen soude,

+ C

12

Ende ghy sult ghedachtich wesen, dat ghy een slaue gheweest hebt in Egipten, ende ghi sult bewaren ende doen al dat gheboden is.

13

Ghy sult oock vieren den feestdach der tabernakelen seuen daghen lanck, als ghi v vruchten vanden dorschuloer, ende vander perssen sult vergadert hebben

14

ende ghi sult op uwen feestdach vrolijcken maeltijt houden, ghi ende uwe sone, ende uwe dochter, ende v knecht, ende v dienstwijf, ende oock die leuijt ende die vreemdelinc ende die weese, ende weduwe, die binnen uwen poorten sijn.

15

Seuen daghen lanc suldi den Heere uwen Godt feestdaghen vieren, ter plaetsen welck die Heere vercoren hebben sal ende die Heere v Godt sal v ghebenedijden in allen uwen vruchten, ende in allen die wercken uwer handen, ende ghy sult in vruechden wesen.

16

Drijmael tsiaers sullen alle uwe mannelijcke persoonen hen vertoonen voor dat aenschijn des Heeren ws Gods, ⁺ter plaetsen die hy vercoren sal hebben. Int hoochtijt vanden onghedeesemden brooden, ende int hoochtijt der weken, ende int hoochtijt der tabernakelen, Niemant en sal hem ydel voor den Heere vertoonen,

+ D

17

maer een ieghelijck sal offeren na dat hy heeft, ende nae die benedictie des Heeren sijns Gods, die hy hem gheuen sal.

18

Rechters ende meesters suldi stellen binnen allen uwe poorten, welc die Heere uwe Godt v gheuen sal, nae allen uwen gheslachten besonder, dat sij tvolc moghen ordeelen met rechtuerdighen vonnissen,

19

ende sij en sullen op gheen sijde wijcken. Ghi en sult niemants persoon wtnemen, oft ghiften ontfanghen, want die ghiften verblinden die ooghen der wijsen, ende verkeeren der rechtuerdigher woorden.

20

Rechtuerdelijck suldi veruolghen dat recht is, op dat ghi leuen moecht, ende besitten het lant, welc die Heere v Godt v ghegheuen sal hebben.

21

Ghi en sult gheen bosschelken ende boomen planten omtrent den outaer des Heeren ws Gods.

22

Noch ghi en sult v gheen staende beelt maken noch setten die welcke die Heere v Godt hatet.