Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺TEn seuensten iare suldi verlatenisse doen,

+ A

2

dwelcmen in deser voeghen houden sal.

Wiemen iet schuldich es, die en sal dat niet moghen eyschen van sijnen vrint, oft maescap, oft sijnen broeder, want het es diaer van die verlatenisse des Heeren.

3

Van eenen wtlander ende vreemdelinck suldijt eyschen, maer van eenen borgher oft naesten en hebdi gheen macht te eysschen.

4

Ende gheensins en sal onder v lieden iemant sijn gheheel arm ende een brootbiddere, op dat die Heere v Godt v mach ghebenedijden in dlant welc hy v gheuen sal tot een erfbesittinghe.

5

Eest nochtans dat ghij hoort die stemme van de Heere uwen Godt, ende dat ghy bewaert alle dat hy gheboden heeft, ende dat ic v heden ghebiede,

6

soe sal hy v ghebenedyden, ghelijc hij gheloeft heeft. Ghy sult veel volcs leenen, ende ghy en sult van niemant ontleenen.

Ghy sult heerschappie hebben ouer veel natien, ende niemant en sal ouer v heerscappie hebben,

7

⁺Eest sake datter iemandt van uwen broeders die binnen uwer stadt poorten woonen, int lant welc die Heere uwe Godt v gheuen sal, tot armoeden ghecomen sal wesen, soe en suldi v herte niet verharden, noch v hant niet toe sluyten,

+ B

8

maer die den armen mensch open doen, ende hem leenen tghene dat ghy siet dat hy behoeft.

9

Wacht v dat v by auontueren gheen onghenadich ghedachte ouer en come, ende dat ghi in v herte niet en segt. Het seuenste iaer der vrijcheyt is nakende, ende dat ghi v ooghen afkeert van uwen armen broeder, niet willende hem leenen dat hy begheert, op dat hi teghen v niet en roepe aen den Heere, ende dat v dat ter sonden gherekent worde.

10

Maer ghi sullet hem gheuen noch ghi en sult niet scalckelijc met hem leuen in sinen noot te verlichten, op dat die Heere uwe Godt v ghebenedijden mach in allen tijden, ende in allen dinghen daer ghi v handen aensteken sult.

11

Daer en sullen gheen arme menschen ghebreken in dat lant uwer wooninghen, daerom soo ghebiede ic v, dat ghi v hant opent uwen behoeuighen ende armen broeder, die met v int lant verkeert.

12

⁺Als v broeder een hebreeusch man oft vrouwe v vercocht sal wesen, ende v ses iaren lanck sal ghedient hebben, soo suldi hem int seuenste iaer vrij laten gaen,

+ C

13

ende wien ghi vrij maect, dien en suldi niet ydel laten wech gaen,

14

maer ghi sult hem gheuen om opden wech te teeren, van uwen cudden, ende dorschvloer, ende van uwer perssen, waer mede dat die Heere uwe Godt v ghebenedijt heeft.

15

Weest gedachtich dat ghi seluer ooc ghedient hebt int lant van Egypten, ende dat die Heere uwe God v verlost heeft, ende daerom beueel ick v dit nv.

16

Maer eest sake dat die seyt. Ick en wil niet wech gaen, om dat hy v ende v huys lief heeft, ende gheuoelt dat hem wel by v is,

17

so suldi eenen priem nemen, ende sijn oore doorsteken, in die doere van uwen huyse, ende hy sal v dienen tot inder eewicheyt, ende uwer dienstvrouwen suldi desghelijcs doen

18

En wilt v ooghen van hen niet keeren, als ghi die sult laten vrij gaen, want hy heeft v ses iaren lanck ghedient, nae den loon der huerlinghen, op dat die Heere uwe Godt v ghebenedijde in allen uwen wercken die ghy doet.

19

Vanden iersten gheboorten die gheboren worden van uwen runderen ende scapen, ⁺wat een manneken is dat suldi den Heere uwen Godt heylighen. Ghy en sult niet wercken met dierste gheborene vanden osse ende die ierste gheborene vanden schapen niet scheren.

+ D

20

Maer ghy sult die eten voor daenschijn van den Heere uwen Godt tallen iaren, ghy ende v huysghesin ter plaetsen welc die Heere vercoren sal hebben.

21

Maer eest tsake dat dit eenighe mismaectheyt heeft, ende dat cruepel oft blent es, oft aen eenich let mismaect oft cranck, soe en salmen dat den Heere uwen Godt niet offeren,

22

Maer ghy sult dat eten binnen uwer stadt poorten, soe wel die suyuere, als die onsuyuere sullen daer af eten, recht oft waer van een capret, oft van eenen hert.

23

Alleen suldi dit onderhouden, dat ghi hen bloet niet en etet, maer ghy sult dat storten opder eerden ghelijck water.