Den gheheelen Bybel, Inhoudende het oude ende nieuwe Testament (Leuvense bijbel 1548)

Dat xiii. Capittel.

1

⁺EEst datter een Propheet onder v lieden op staet, oft iemant die seyt dat hij eenen droom ghesien heeft, ende te voren seyt eenich teeken, oft eenich wonderlijck dinck,

+ A

2

ende dattet soe coemt als hij voerseyt hadde, ende hij v seyt, Laet ons gaen ende volghen die vreemde goden die ghij niet en kent, ende die dienen,

3

soe en suldi nae die woerden van dien propheet oft droomer niet hooren, want die Heere v Godt tempteert v, om dat openbaer worden soude oft ghij hem lief hebt oft niet, in v gheheel herte, ende in v gheheel ziele.

4

Den Heere uwen Godt volcht ende vreest hem, ende bewaert sijn gheboden, ende hoort sijn stemme, hem suldi dienen ende hem suldi aencleuen.

5

Maer die propheet oft droomversierder, sal ghedoot worden, want hij heeft ghesproken, om dat hij v soude affkeeren van den Heere uwen Godt, ⁺die v wten landen van Egipten gheleydt heeft, ende v verlost wt dat huijs der slauernien, om dat hij v soude doen dolen van den wech den welken v beuolen heeft die Heere uwe Godt, ende ghij sult het quaet wech doen wt het midden van v lieden.

+ B

6

Eest sake dat v broeder, ws moeders sone, oft v sone, oft dochter oft v huijsvrouwe die in uwen schoot es, oft v vrint dien ghij bemint ghelijck v ziele, v daer toe raeden wilt, segghende al heymelijck, Laet ons gaen ende dienen den vreemden Goden, die ghij ende uwe vaders niet en kent,

7

van alle den heijdenen die rontsomme ons sijn, tsij bij oft verre, van dat beghin totten inde der aerden,

8

soe en weest hem niet ghewillich, noch en hoort hem niet, noch v ooghe en spare hem niet dat ghij hem soudt ghenadich wesen, ende verborghen.

9

Maer ghij sult hem ter, stont dootslaen, laet v hant ierstmael op hem wesen ende nae v soe sal alle dat volc die hant daer toe steken,

10

⁺Met steenen ouerworpen sal hij ghedoot worden, om dat hij v heeft willen trecken van den Heere uwen Godt, die v gheleyt heft wt dat lant van Egipten, wt dat huijs der slauernien,

+ C

11

op dat alle Israhel hoorende vreesen mach, ende dat sij voertaen gheensins desghelijcs iet en doen.

12

Eest sake dat ghij in een van uwen steden welc die Heere v Godt, v gheuen sal om te bewoonen, hoort sommighe seggende,

13

Daer sijn Belials kinderen wt dat midden van v ghegaen, ende sij hebben die inwoonders van haer lieder stadt aff ghekeert, ende gheseyt, Laet ons gaen ende dienen die vreemde Goden, die ghi niet en kent,

14

soe ondersoect seer sorchfuldichlijck, ende als ghij naerstelijck die waerheyt vander saken doersien hebt, eest dat ghij beuint warachtich te sijn, tghene datmen seyt, ende dat dese affgrijselijcheyt metten wercken volbracht es,

15

soe suldi ter stont die inghesetene van dier stadt verslaen met tscerp vanden sweerde, ende die stadt te niete doen, ⁺ende alle dat daer binnen es totten cleynen vee toe,

+ D

16

ende al watter van huysraet sijn sal, dat suldi vergaderen int midden van sijnen straeten, ende dat metter seluer stadt ontsteken, alsoe dat ghijt al te niet sult brenghen voer den Heere uwen Godt, ende dat mach wesen eenen eewighen hoop, men en sal die niet meer op timmeren,

17

ende daer en sal niet van dien vermalendijden goeden aen v handt cleuen, op dat die Heere van die gramscap sijnder verbolgentheyt mach affghekeert worden, ende dat hij uwer barmhartich sij, ende v vermenichfuldighe, ghelijc hy uwen vaderen ghesworen heeft.

18

Als ghij die stemme des Heeren ws Gods sult hooren, bewarende alle sijn gheboden die ic v heden ghebiede, op dat ghij doet dat behaechlijc es voer dat aenschijn van den Heere uwen Godt.