Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺DAerom hebt lief den Heere uwen Godt, ende onderhoudt sijn gheboden ende ceremonien, rechte ordeelen ende wetten, tot allen tijden.

+ A

2

Bekent heden dat v kinderen niet en weten, die welcke niet en hebben ghesien die leeringhe vanden Heere uwen Godt, sijn heerlijcke wercken, ende sijn machtighe hant, ende sijnen wtghereycten arm,

3

die teekenen, ende wercken die hy ghedaen heeft int midden van Egipten, den coninck Pharao ende alle sijnen lande,

4

ende alle den heyre der Egiptenaren, ende den peerden ende waghenen, hoe dat die wateren der rooder zee hen ouerdect hebben, als sij v veruolchden, ende hoe die Heere hen verdoruen heeft tot op desen dach toe,

5

ende wat hy v ghedaen heeft in die woestijne, tot dat ghy comen sijt te deser plaetsen.

6

Ende Dathan en Abiron Eliabs kinderen, die Rubens sone was, die welcke daerde haren mont opendoende verslonden heeft, met haren huysghesinnen ende tabernakelen, ende allen haer goedt dat sij hadden int midden van Israhel.

7

V ooghen hebben alle die groote wercken des Heeren ghesien die hy ghedaen heeft,

8

om dat ghy alle sijn gheboden onderhouden soudt, ⁺die ick v heden ghebiede, ende dat ghy soudt moghen comen, ende besitten dlant daer ghy in trect,

+ B

9

ende dat ghy daer in langhen tijt moecht leuen, dwelck die Heere uwen vaderen beloeft heeft by eede, ende haren sade van melck ende honich vloeyende.

10

Want het landt daer ghy in gaet om dat te besitten, en is niet ghelijck dat lant van Egipten, daer ghy wtcomen sijt, daermen (alst saet gheworpen is) wateren moet leyden om te veruersschen, in die maniere vanden houenen,

11

maer het is berchachtich ende veltachtich verwachtende reghenen vanden hemel,

12

dwelck die Heere uwe Godt altijt besoect, ende sijn ooghen sijn daer op, vant tbeghinsel des iaers tot den eynde toe.

13

Daerom eest dat ghy mijnen gheboden onderdanich sijt, die ick v heden ghebiede, dat ghy den Heere uwen Godt bemint ende hem dient in v gheheel herte, ende in v gheheel ziele,

14

soo sal hy uwen lande vroeghen, ende spaden reghen gheuen, alsoo dat ghi sult moghen verghaderen coren ende wijn, ⁺ende olie

+ C

15

ende hoy wten velden, om vee te voeden, ende dat ghy selue moecht eten ende versaet worden.

16

Wacht, dat v herte by auontueren niet bedroghen en worde, ende dat ghy vanden Heere soudt scheyden, ende den vreemden goden dienen, ende die aenbidden,

17

ende dat die Heere vergramt sijnde, den hemel toe sluyte, en datter gheenen reghen neder en

[p. *167]

valle, ende het lant sijn groyetsel niet en gheue, ende dat ghy dan terstont oock verghaet van dat alderbeste lant, dwelck die Heere v gheuen sal.

18

Dus stelt dese woorden in v herten, ende in v ghemoet, ende hanct die voor een teeken aen v handen, ende steltse tusschen v ooghen.

19

Leert uwen kinderen dat sij dese ouerpeysen, Als ghy sult sitten in v huys, ende gaen ouer wech, ende als ghy sult ter rusten nederligghen, ende opstaen,

20

ghy sult die scrijuen op die posten ende doeren ws huys,

21

op dat ghy ende uwe kinderen langhe leuen moecht int lant waer af dat die Heere uwen vaderen ghesworen heeft, dat hy hen dat soude gheuen, so langhe als den hemel bouen die aerde staet.

22

⁺Want eest sake dat ghy die gheboden bewaert die ick v ghebiede, ende dat ghy die doet, op dat ghi den Heere uwen Godt bemindt, ende wandelt in alle sijn weghen, hem aencleuende,

+ D

23

soo sal die Heere alle dese natien voor v aensicht verdrijuen, ende ghi sult die besitten die welcke meerder ende sterker sijn dan ghy.

24

Alle die plaetse die uwen voet sal betreden, sal uwe wesen, Vander woestijnen aen ende vanden berch libanus, ende vanden grooten vloet Euphrates, totter West zee toe, sullen uwe palen wesen.

25

Niemant en sal v teghen staen, Die vreese ende anxt van v lieden sal die Heere v Godt gheuen ouer alle dlant dat ghy beterden sult, ghelijck hy v gheseyt heeft.

26

Siet ick sette heden voor v aensicht die benedijnghe ende die maledijnghe,

27

die benedijnghe, eest sake dat ghy onderdanich sijt den gheboden, van de Heere uwen Godt, die ick v heden ghebiede,

28

Die maledijnghe, eest dat ghy den gheboden vanden Heere uwen Godt niet ghehoorsaem en sijt, maer wechgaet vanden wech den welcken ick v nv bewijse, ende wandelt nae die vreemde goden, die ghy niet en kent.

29

Maer als v die Heere uwe Godt ghebracht sal hebben int dlant daer ghy henen reyst om dat te bewoonen, so suldi die benedijnghe stellen opden berch Garizim, ende die maledijnghe opden berch Hebal

30

die welcke sijn ouer die Iordane, achter den wech die gaet nae der sonnen onderganck int lant vanden Chananeen, die daer woonen op dat plat lant, teghen ouer Galgala, welck is gheleghen neuen die dellinghe, verre streckende ende binnewaerts gaende,

31

Want ghy sult ouer die Iordane gaen om te besitten dat lant dwelck die Heere uwe Godt v gheuen sal, dat ghijt hebben ende besitten soudt.

32

Daerom siet toe dat ghy volbrenghet sijn ceremonien ende rechte oordeelen die ick heden voor v ooghen stellen sal.