Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺OP dien tijt seyde die Heere tot my, Maeckt effen voor v twee steenen tafelen, ghelijc die ierste waren, ende coemt tot my op den berch, ende ghy sult een houten arcke maken,

+ A

2

ende ick sal in die tafelen scrijuen die woorden die in dander tafelen waren, welck ghy te voren ghebroken hebt, ende ghy sult die legghen in die arcke.

3

Hierom heb ick een arcke gemaect van sethim hout. Ende als ic twee steenen tafelen effen ghemaect hadde ghelijc die ierste waren, so ben ick opden berch gheclommen, hebende die in mijn handen.

4

Ende hy heeft in die tafelen ghescreuen tselue dat hy te voren gheschreuen hadde, die thien woorden, welck die Heere tot v ghesproken hadde opden berch wt dat midden des viers, als het volck vergadert was, ende hy heeft my die ghegheuen.

5

Ende als ick vanden berch wedercomen was, soo ben ick nederwaerts ghegaen, ende heb die tafelen gheleyt in die arcke welck ick ghemaect hadde, die welcke tot noch toe daer sijn, ghelijc die Heere mi beuolen heeft

6

⁺Maer die kinderen van Israhel vertrocken haren legher van Beroth der kinderen van Iacan in Mosera, daer Aaron ghestoruen ende begrauen is, Voor wien dat Eleazar sijn sone opperste priester gheworden is,

+ B

7

Van daer sijn sij comen te Gadgad, ende als sij van dier plaetsen voorts ghereyst waren, hebben sij haren legher ghemaect te Ietabatha int lant der wateren, ende der beken.

8

Op dien tijt soo heeft hy tgheslachte van Leui wtghescheyden, dat sij die arcke des verbonts draghen souden, ende voor hem staen inden dienst, ende dat sij ghebenedijden souden in sijnen naem, tot op den dach van heden toe.

9

Daerom en heeft Leui gheen deel, noch besittinghe ghehadt met sijnen broeders, want die Heere is sijn erfdeel, ghelijck die Heere uwe Godt hem beloeft heeft.

10

⁺Maer ick stont opden berch ghelijc te voren, veertich daghen ende veertich nachten, ende die Heere heeft my dese reyse oock verhoort, ende hy en heeft v niet willen dootslaen.

+ C

11

Ende hy heeft tot my gheseyt, gaet henen, ende reyst voor dit volck, dat sij moghen comen int lant, ende dat besitten, dwelck ick haren vaderen ghesworen hebbe, dat ict hen soude leueren.

12

Ende nv o Israhel wat begheert die Heere v Godt van v, anders dan dat ghy den Heere uwen Godt soudt vreesen, ende in sijn weghen wandelen, ende hem liefhebben, ende dienen den Heere uwen Godt in v gheheel herte, ende in v gheheel ziele,

13

ende dat ghy des Heeren gheboden soudt onderhouden, ende sijn ceremonien die ic v heden beuele, op dat v wel sijn mach.

14

Siet den hemel, ende den hemel der hemelen, die aerde ende alle dat daer in is behoort den Heere uwen Godt toe,

15

ende nochtans heeft hem die Heere uwen vaderen aenghecleeft, ende hy heeftse lief ghehadt, ende haerlieder saet nae hen vercoren, dwelc ghy sijt, wt allen den volcken, ghelijck dat heden wel toonlijck is.

16

⁺Daerom soo besnijdt dat voorsloofken van uwer herten, ende wilt v necken niet meer stijf maken,

+ D

17

want die Heere uwe Godt die is een Godt bouen alle goden, ende een Heere bouen alle die heerscappie hebben, Een groot ende machtich ende veruaerlijck Godt, die gheen persoonen wt en neemt, noch ghiften,

18

Maer hy doet den weesen ende weduwen recht, ende hy bemint den wtlander, ende gheeft hem cost en cleederen,

19

daer om soo hebt oock die wtlanders lief, want ghy hebt selue oock vreemdelinghen gheweest int lant van Egipten.

20

Ghy sult den Heere uwen Godt vreesen, ende hem dienen, hem suldi aen hanghen, ende by sijnen naem sweren.

21

Hy is uwen lof, ende uwe Godt, die v alle dese grootdadighe ende veruaerlijcke dinghen ghedaen heeft, welck v ooghen ghesien hebben,

22

In tseuentich zielen reysden uwe vaderen nederwaerts in Egipten, ende nv heeft die Heere uwe Godt v vermenichfuldicht ghelijck die sterren des hemels.