Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viii. Capittel.

1

ALle die gheboden die ick v heden ghebiede wacht neerstelijck dat ghy die doet, op dat ghi leuen moecht, ende vermenichfuldicht worden, ende comen int lant ende dat besitten, waer af die Heere uwen vaderen ghesworen heeft.

2

Ende ghy sult ghedachtich wesen alle des wechs, daer door dat v die Heere uwe Godt ghebracht heeft veertich iaren lanck door die woestijne, om dat hy v soude quellen ende tempteren, ende dat kenlijck souden worden alle die dinghen die in v herte waren, oft ghy sijn gheboden onderhielt oft niet.

3

Hy heeft v verdruct met armoeden, ende v Manna tot een spijse ghegheuen, dwelck ghy, noch v vaders niet en kendet, om dat hy v bewijsen soude, dat die mensch niet alleen vanden broode en leeft, ⁺maer oock van alle woordt, welck wt des Heeren mont ghaet,

+ B

4

V cleedt daer ghy mede bedect waert, en is van outheyt gheensins verghaen, ende uwen voet en is onder niet ghesleten gheweest, siet het is nv dat veertichste iaer,

5

Op dat ghy ouerdencken soudt in v herte dat ghelijck een mensch sijn kint leert,

6

alsoo heeft die Heere v Godt v gheleert, dat ghy bewaren soudt die gheboden des Heeren ws Godts, ende in sijn weghen wandelen, ende hem vreesen.

7

Want die Heere uwe Godt sal v leyden in een goet lant, een lant der vloeden, ende der wateren, ende der fonteynen. In wiens velden ende berghen springhen wt afgrondighe aderen der vlietender wateren,

8

een lant der tarwen, ghersten, ende wijngaerden, daer in dat vijghen ende granaet appelen, ende olijfboomem wassen, een lant van olie ende honich,

9

Daer ghy v broot eten sult sonder eenigh ghebreck, ende alder dinghen oueruloedicheyt ghebruycken, wiens steenen ijser sijn, ende wt sijnen berghen worden des copers metalen ghegrauen.

10

⁺Op dat ghy den Heere uwen Godt moecht ghebenedijden voor dat ouer goet lant dat hy v ghegheuen heeft, als ghi sult eten ende versaet worden.

+ C

11

Slaet ghade ende wacht v dat ghy nemmermeer den Heere uwen Godt en verghetet, ende dat ghy niet en versuemt sijn gheboden ende rechten, ende sijn ceremonien, die ick v heden ghebiede,

12

Op dat nae

[p. *165]

dien dat ghy sult gheten hebben ende versaet wesen, ende schoon huysen ghetimmert, ende daer in ghewoont,

13

ende sult hebben groot vee van ossen ende cudden schapen, van gout ende siluer, ende van alder hande dinghen groote menichte,

14

dat dan v herte hem niet en verheffe, ende dat ghi dan niet en dencket op den Heere uwen Godt, die v wt dat lant van Egipten gheleyt heeft, wt dat huys der slauernien,

15

ende die v leytsman gheweest heeft in die groote ende vreeselijcke wildernisse, daer serpenten waren die door haren adem verbranden, ende scorpioenen ende dipsaden, ⁺ende daer met allen gheen water en was. Die wt eenen seer harden steen vloeyende wateren dede comen,

+ D

16

ende v met Manna ghespijst heeft in die woestijne, welck v vaders niet en kenden. Ende nae dat hy v verdruct ende gheproeft hadde, soo heeft hy v ten lesten ghenadich gheweest,

17

om dat ghy in v herte niet en soudt segghen, Mijn vromicheyt, ende die macht van mijnder hant hebben my alle dese dinghen ghegheuen,

18

maer dat ghy soudt dencken op den Heere uwen Godt, dat hy v dese macht verleent heeft, om dat hi sijn verbont soude volbringhen, waer af hy uwen vaderen ghesworen hadde, ghelijc den dach van heden bewijset.

19

Maer anders eest dat ghy den Heere uwen Godt verghetet, ende die vreemde goden volghet, ende die dient ende aenbidt, siet soo segghe ict v nv te voren, dat ghy heel te niet sult gaen,

20

Ghelijck die heydenen welck die Heere vernielt heeft tot uwer incoemsten, alsoo suldi oock vergaen, eest sake dat ghy der stemmen van den Heere uwen Godt onghehoorsaem sijt.