Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vii. Capittel.

1

⁺ALs die Heere uwe Godt, v sal ghebracht hebben in dat lant, daer ghy ingaen sult om dat te besitten, ende als hy veel heydenen voor v sal wtgheroeyt hebben, die Hetheen ende Gergezeen, ende Amorrheen, Chananeen ende Pherezeen, ende Heueen, ende Iebuseen, seuenderley volck veel meerder van ghetale dan ghy sijt, ende stercker dan ghy,

+ A

2

ende dat die Heere uwe Godt v die gheleuert sal hebben, soo suldi die dootslaen datter niemant ouer en blijve. Ghy en sult met henlieden gheen verbont maken, noch hen gheen bermherticheyt doen,

3

noch met hen gheen houwelijcken maken, Ghy en sult v dochter sijnen sone niet gheuen, noch ghy sijn dochter nemen voor uwen sone,

[p. *164]

4

want sij sullen uwen sone verleyden dat hy my niet en volghe, maer dat hy meer sal den vreemden goden dienen, ende dan sal die rasende gramschap des Heeren vertornt worden, ende v haestelijck vernielen.

5

Maer beter suldi hen dit doen, Hen outaren werpt om, ende breect hen staende afgods beelden, ende hen boschkens houwet af, ende hen ghesneden beelden verberret,

6

Want ghy sijt een heylich volck den Heere uwen Godt. V heeft vercoren die Heere v Godt, dat ghy hem wesen soudt een eyghen volck van alle den volcken die opder aerden sijn.

7

Die Heere en is met v niet versaemt, ende en heeft v niet vercoren om dat ghy alle die volcken in ghetale te bouen ghinct, ⁺aenghesien dat ghy die minste van allen volcken sijt,

+ B

8

Maer om dat die Heere v lief ghehadt heeft, ende heeft ghehouden den eedt, den welcken hy uwen vaderen ghesworen heeft. Ende heeft v wtgheleyt met een stercke hant, ende verlost wt dat huys der slauernien, wt die hant van Pharao den coninck van Egypten.

9

Ende ghy sult weten, dat die Heere v Godt selue een sterck ende ghetrouwe Godt is, bewarende tverbont ende bermherticheyt den ghenen die hem liefhebben, ende sijn gheboden bewaren, in duysent generatien,

10

ende wederloonende terstont den ghenen die hem haten, alsoo dat hy die vernielt ende niet langher en vertrect, terstont hem wederom gheuende dat sij verdienen.

11

Hier om bewaert die gheboden ende ceremonien, ende vonnissen die ick v heden beuele, dat ghy die doen soudt.

12

Eest dat ghy dese rechten (nae dat ghy die ghehoort hebt) bewaert ende doet, soo sal die Heere v Godt v oock bewaren tverbont ende die bermherticheyt die hy uwen vaderen ghesworen heeft,

13

ende hy sal v lief hebben ende vermenichfuldighen, ende ende ghebenedijden die vrucht ws lichaems, ende die vrucht ws lants, v coren, ende v wijn vruchten, ende v olie, ende groot vee, die cudden van uwen schapen opt dlant, ⁺waer om dat hy uwen vaderen ghesworen heeft dat hy v dat gheuen soude.

+ C

14

Ghij sult ghebenedijt wesen onder allen volcken, daer en sal by v niet onvruchtbaer wesen van beyde natueren, soo wel onder die menschen, als onder v cudden.

15

Die Heere sal v afnemen alle qualen ende alle die seer quade siecten van Egipten (die ghy wel ghekent hebt) en sal hy op v niet brenghen, maer op allen v vianden.

16

Ghy sult alle dat volck verslinden, welck die Heere uwe Godt v gheuen sal, v ooghe en salse niet sparen, noch ghy en sult haren goden niet dienen, op dat sij v niet en sijn tot eenen valle.

17

Eest dat ghy in v herte segghet, Dese volcken sijn meerder in ghetale dan ick, hoe sal icse moghen vernielen?

18

en wilt niet vreesen, maer ghedenct, wat dinghen dat die Heere uwe Godt Pharao ende alle den egiptenaren ghedaen heeft,

19

die ouergrootste plaghen, welck v ooghen ghesien hebben, ende die teekenen ende die wonderlijcke wercken, ende die weldighe hant, ende den wtghestrecten arm, om dat die Heere uwe Godt v soude wtleyden. Aldus sal hy oock doen allen den volcken die ghy ontsiet,

20

Daertoe sal die Heere uwe Godt horselen op hen senden, tot dat hijse alle vernielt ende verdoruen sal hebben, die v ontuloden sullen wesen, ende voor v hebben moghen verborghen blijven.

21

⁺Ghy en sultse niet vreesen, want die Heere uwe Godt is int midden van v, een groot ende veruaerlijck Godt,

+ D

22

Hy sal dese natien der heydenen voor v aenschijn allinxkens ende by deelen vernielen. Ghy en sult die al te samen niet moghen te niet brenghen, dat by auonturen die wilde dieren des lants tseghen v niet vermenichfuldicht en worden.

23

Ende die Heere uwe Godt salse gheuen in v aenschijn, ende hy salse dooden tot dat sij gheheel vernielt sullen sijn,

24

ende hen coninghen leueren in v handen, ende ghy sult haerlieden namen van onder den hemel te niet doen, niemant en sal v moghen wederstaen, tot dat ghy die heel vernielt sult hebben.

25

Haerlieden ghesneden beelden suldi int vier verbranden, ghy en sult dat gout oft siluer niet begheren, daer sij af ghemaect sijn, noch en neemt daer af niet tot uwen behoeue, op dat ghy niet en misdoet, Want tes een afgrijselijcheyt voor den Heere uwen Godt.

26

Noch ghy en sult niet vanden afgoden brenghen in v huys, ⁺op dat ghy niet en wort van Godt verbannen, ghelijck dat is. Ghy sult dat verachten ghelijck onsuyuerheyt, ende daer een walghinghe af hebben ghelijck van een smettelijck dinck ende vuylicheyt, want het is van Gode verbannen.

+ A