Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DIt sijn die gheboden, ende ceremonien ende vonnissen, welck die Heere uwe Godt gheboden heeft, dat ick v leeren soude, dat ghy die soudt doen, int lant daer henen ghy ouertrect om te besitten,

+ A

2

Op dat ghy den Heere, uwen Godt soudt vreesen, ende alle sijn beuelinghen ende gheboden bewaren, welck ick v ghebiede, ende uwen kinderen ende kindts kinderen, alle die daghen ws leuens, op dat v daghen moghen verlingt worden.

3

Hoort Israhel ende onderhoudt dat ghy doet tghene dat die Heere v gheboden heeft, ende dat v wel gheschiede, ende noch meer moecht vermenichfuldicht wesen, ghelijck die Heere uwer vaderen Godt v gheloeft heeft een lant vloeyende van melck ende honich.

4

Hoort Israhel die Heere onse Godt is een eenich Godt,

5

Ghy sult liefhebben den Heere uwen Godt wt uwen gheheelen herte, ende wt uwer gheheelder zielen, ende wt allen uwer stercheyt.

6

Ende dese woorden die ick v heden beuele, sullen wesen in v herte,

7

ende ghy sult die uwen kinderen vertellen, ende die ouerdencken sittende in v huys, ende wandelende ouer wech, slapende ende opstaende.

8

Ende ghy sultse binden, als een teeken aen v hant, ⁺en sij sullen wesen ende gheruert worden tusschen v ooghen,

+ B

9

ende ghy sult die scrijuen op den dorpel ende die dooren ws huys.

10

Ende als die Heere v Godt v sal ghebracht hebben int landt, waerom dat hy uwen vaderen Abraham Isaac ende Iacob ghesworen heeft, ende dat hy v sal ghegheuen hebben groote ende seer goede steden, die ghy niet ghetimmert en hebt,

11

ende huysen vol van alderhande rijcdommen, die ghy niet ghemaect en hebt, waterputten die ghy niet ghegrauen en hebt, wijngaerden ende olijfgaerden die ghy niet gheplant en hebt,

12

ende als ghy sult gheten hebben ende versaet wesen,

13

soo wacht v naerstelijck dat ghy den Heere niet en verghetet, die v gheleyt heeft wt dat lant van Egipten wten huyse der slauernien.

Ghy sult den Heere uwen Godt vreesen, ⁺ende dien alleen dienen, ende by sijnen naem suldi sweren.

+ C

14

Ghy en sult niet ghaen nae die vreemde goden, van allen die heydenen, die rontsomme v sijn,

15

Want die Heere v Godt is een ialours Godt int midden van v lieden, op dat die rasende gramscap des Heeren op eenighen tijt teghen v niet ghestoort en worde, ende v van bouen der aerden wech hale.

16

Ghy en sult den Heere uwen Godt niet tempteren, ghelijck ghy hem ghetempteert hebt, op die stede der temptacien.

17

Bewaert die gheboden van den Heere uwen Godt, ende die ghetuyghenissen ende die ceremonien die hy v beuolen heeft,

18

ende doet dat behaechlijc ende goet is, voor daensicht des Heeren dat v wel sij, ende dat ghy incomende moecht besitten dat alderbeste lant, waer af die Heere uwen vaderen ghesworen heeft

19

dat hy alle uwe vianden soude voor v vernielen ghelijck hy ghesproken heeft.

20

Als v morghen v sone vraghen sal segghende, ⁺Wat willen dese ghetuyghenissen ende ceremonien, ende rechte oordelen, welck die Heere onse Godt ons beuolen heeft?

+ D

21

Soo suldi hen segghen, Wij waren slauen van Pharao in Egipten, ende die Heere heeft ons wt Egipten gheleydt met een gheweldighe hant,

22

ende heeft ghedaen groote teekenen ende dalder quaetste wonderen in Egipten, teghen Pharao ende alle sijn huysghesin, voor ons aensicht,

23

ende hi heeft ons van daer gheleyt, dat hy ons (daer inghebracht hebbende) gheuen soude dat lant daer hy onsen vaderen af ghesworen heeft.

24

Ende die Heere heeft ons beuolen, dat wij alle dese wettelijcke gheboden souden doen, ende onsen Heere Godt vreesen, op dat met ons wel sij alle die daghen ons leuens, ghelijck dat heden is.

25

Ende hy sal onser bermhertich wesen, eest sake dat wij bewaren ende volbringhen alle sijn gheboden, voor den Heere onsen Godt, ghelijck hi ons gheboden heeft.