Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde Moyses riep alle die van Israhel, ende seyde tot hen, Hoort Israhel die ceremonien, ende die vonnissen die ick spreke in uwe ooren heden, leert die ende volbringtse metten wercken.

+ A

2

Die Heere heeft met ons een verbont ghemaect in Horeb,

3

Hy en heeft gheen verbont ghemaect met onsen vaderen, maer met ons die nv teghenwoerdich sijn ende leuen,

4

Aensicht tseghen aensicht heeft hy ons ghsproken, opden berch wt midden des viers.

5

Ick was die sceytsman ende middelaer tusschen den Heere ende v lieden in dien tijden, dat ick v soude vercondighen sijn woorden, want ghy vreesdet tvier ende ghy en clomt opden berch niet. Ende hy heeft gheseyt,

6

Ick ben die Heere v Godt die v gheleyt [afbeelding] hebbe wt dat lant van Egipten, wt dat huys der slauernien,

7

Ghy en sult gheen vreemde goden hebben voor mijn aensicht.

8

Ghy en sult voor v gheen ghesneden beelt maken noch gheen ghelijckenisse, van alle dinghen die bouen inden hemel, oft beneden opder eerden sijn, ende die int water verkeeren onder die aerde,

9

Ghy en sult die niet aenbidden noch dienen, Want ick ben die Heere uwe Godt, een ialours Godt, der vaderen misdaet wederloonende op die kinderen tot die derde ende vierde generatie, den ghenen die ny haten,

10

⁺ende doende bermherticheyt aen veel duysenden den ghenen die my liefhebben, ende mijn gheboden bewaren.

+ B

11

Ghy en sult den naem des Heeren ws Godts niet te vergheefs ghebruycken, want hy en sal niet onghestraft wesen, die sijnen naem ouer eenich ydel dinck ghebruyct.

12

Onderhoudt den sabboth dach, dat ghy dien heylicht, ghelijc v beuolen heeft die Heere uwe Godt,

13

Ses daghen suldi wercken, ende doen allen v wercken,

14

Den seuensten dach is den Sabboth, dat is die ruste des Heeren ws Godts, Ghy en sult op dien gheen werck doen, ghi ende v sone, ende v dochter, v knecht, ende v dienstvrouwe, uwen osse, ende uwen ezel, ende allen uwe behelpighe beesten, ende die wtlander die binnen uwer stadt poorten is, op dat v knecht, ende dienstvrouwe rusten moghen, ghelijck ghy.

15

Ghedenct dat ghy seluer oock in Egipten ghedient hebt, ende dat die Heere v Godt v daer wt gheleyt heeft, met een gheweldighe hant, ende met eenen wtghestrecten arm. Daerom heeft hy v beuolen dat ghy den sabboth dach onderhouden soudt.

16

Eert uwen vader ende moeder, ghelijck die Heere uwe Godt v beuolen heeft, dat ghy langhen tijt moecht leuen, ende dat v wel sij int lant welck die Heere uwe Godt v gheuen sal.

17

Ghy en sult niet dootslaen.

18

Noch ghy en sult gheen ouerspel bedrijuen.

19

⁺Ghy en sult oock niet stelen.

+ C

20

Noch ghy en sult tseghen uwen naesten gheen valsch ghetuygenis gheuen.

21

Ghy en sult ws naesten huysvrouwe niet begheren, noch sijn huys, noch acker, noch knecht, noch dienstvrouwe, noch osse, noch esel, noch alle dat hem toebehoort.

22

Dese woorden heeft die Heere ghesproken tot alle uwe menichte opden berch wt dat midden des viers, ende der wolcken, ende des neuels, met een groote stemme, niet meer daer toe doende. Ende hy heeft dese woorden ghescreuen in twee steenen tafelen, die welck hy my gheleuert heeft,

[p. *163]

23

Maer nae dat ghy die stemme wt het midden der duysterheyt ghehoort hadt, ende den berch sien bernen, soo sijdi tot my comen alle die princen der gheslachten, ende die outste van gheboerten, ende hebt gheseyt,

24

Siet die Heere ons Godt heeft ons ghetoont sijn maiesteyt ende grootheyt, want wij hebben sijn stemme ghehoort wt dat midden des viers, ende wij hebben heden gheproeft, dat een mensch is leuende bleuen als Godt met hem sprack,

25

Waerom sullen wij dan steruen, ende waerom sal ons dit ouer groot vier verslinden? ⁺Want eest sake dat wij voorts meer hooren die stemme des Heeren ons Godts, soo sullen wij steruen,

+ D

26

Want wat is alle vleesch, dattet soude moghen hooren die stemme des leuenden Godts, die welck spreect wt dat midden des viers, ghelijck wij ghehoort hebben, ende dat die soude moghen leuen.

27

Gaet ghy lieuer by hem, ende hoort al dat die Heere onse God v segghen sal, ende ghy sult tot ons spreken, ende wij dat hoorende sullent doen.

28

Ende als die Heere dat ghehoort hadde, soo heeft hy tot my gheseyt, Ick heb die stemme der woorden van desen volck ghehoort, dat sij gheseyt hebben, dat hebben sij al wel gheseyt,

29

Wie mocht hen verleenen, dat sij sulcken herte hadden dat sij my mochten vreesen, ende alle mijn gheboden bewaren tot allen tijden, op dat hen wel gheschieden mocht, ende haren kinderen inder eewicheyt,

30

Gaet ende segt hen, Keert wederom in v tenten,

31

maer staet ghy hier by my, ende ick sal v spreken alle mijn gheboden, ende mijn ceremonien ende vonnissen, welck ghi hen leeren sult dat sij die doen int dlant welck ick hen sal gheuen tot een besittinghe.

32

Hier om bewaert ende doet dese dinghen welck Godt die Heere v beuolen heeft, ghy en sult daer niet af gaen ter rechter hant, noch ter slincker hant,

33

Maer door den wech, welck die Heere uwe Godt v gheboden heeft, suldi wandelen, op dat ghy leuen moecht, ende dat v wel gheschiede, ende dat die daghen ws leuens moghen verlingt worden in dlant uwer besittinghen.