Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde nv hoort Israel die gheboden, ende rechten die ic v leere, opdat ghi die doende, moecht leuen, ende dat ghy ingaende moecht besitten dlant het welc die Heere uwer vaderen Godt v gheuen sal.

+ A

2

Ghy en sult totten woorde dat ic v segghe niet toedoen, noch oock iet daer af doen, bewaert die geboden vanden Heere uwen Godt die ic v ghebiede.

3

Uwe ooghen hebben ghesien alle tghene dat die Heere ghedaen heeft teghen Beelphegor, hoe dat hy alle sijn dienaers wt dat midden van v lieden vernielt heeft.

4

Maer ghy die uwen Heere Godt byblijft, leeft noch allegader tot op desen dach toe.

5

Ghy weet wel dat ic v gheleert hebbe gheboden ende rechten, ghelijck die Heere mijn Godt my beuolen heeft, alsoo suldi doen int lant welc ghy besitten sult,

6

ende ghy sult dat onderhouden, ende metten wercken volbrenghen. Want dit is uwe wijsheyt ende verstandicheyt, voor die volcken, op dat sij alle gader hoorende dese gheboden, moghen segghen, Siet dit is een wijs ende verstandich volck, een groot volck.

7

Ende daer en is gheen ander natie soo groot, ⁺die sijn goden heeft hem soo bycomende, ghelijc ons Godt teghenwoordich is allen onsen ghebeden,

+ B

8

Want wat ander volc isser soo heerlijck dat ceremonien ende rechtueerdighe ordeelen, ende die gheheel wet heeft, welc ic heden voor v ooghen legghen sal.

9

Daer om bewaert v seluen, ende v ziele sorchfuldichlijck, En wilt die woorden niet vergheten, welck v ooghen ghesien hebben, noch en laetse wt v herte niet vallen ale die dghen ws leuens.

Ghy sult die voorts leeren uwen kinderen ende uwer kinder kinderen,

10

den dach, in den welcken ghy stont voor den Heere uwen Godt in Horeb, als die Heere tot my sprack segghende, Vergadert het volc tot my dat sij mijn woorden hooren, ende my leeren vreesen alle den tijt dat sij op die eerde leuen, ende dat sijt haren kinderen ooc leeren mogh.

11

Ende ghy sijt comen aen tbeginsel des berchs die bernde totten hemel toe, ende daer op waren duysternissen, wolcken ende eenen neuel.

12

Ende die Heere heeft tot v lieden ghesproken wt dat midden vanden viere, Ghy hebt het geluyt van sijnen woorden ghehoort, ende met allen gheen ghedaente ghesien.

13

Ende hy heeft v sijn verbont ghetoont welc hy v gheboden heeft dat ghy dat doen soudt, ende die thien woorden, die hy in twee steenen tafelen ghescreuen heeft.

14

Ende hy heeft my beuolen op dien tijt, dat ic v die ceremonien ende rechte ordeelen leeren soude, die ghy soudt moeten doen int lant dat ghy besitten sult.

15

⁺Hierom soo bewaert sorchfuldichlijck uwe zielen, Ghi en hebt gheen ghelijckenisse ghesien opden dach als die Heere v lieden aenghesproken heeft in Horeb wt het midden des viers,

+ C

16

om dat ghy (by auontueren bedroghen sijnde) niet en soudt maken voor v seluen eenich ghesneden ghelijckenisse oft beeldt van man oft vrouwe,

17

oft die ghedaente van eenighen beesten die op daerde sijn, oft der voghelen die onder den hemel vlieghen,

18

ende der cruypender dieren, die hen op daerde roeren, oft der visschen die onder die aerde int water woonen,

19

ende dat ghy by auontueren v ooghen opheffende ten hemel niet en soudt aensien die sonne ende mane, ende alle die sterren des hemels (ende door eenighe dolinghe bedroghen sijnde) die soudt aenbidden ende dienst aendoen, welck die Heere geschapen heeft ten dienste van allen natien die onder den hemel sijn.

20

Maer v heeft die Heere ghenomen, ende gheleyt wt den ijseren ouen van Egipten, dat hy een erfvolck hebben soude, ghelijck dat is op den teghenwoordighen dach.

21

⁺Ende die Heere is tseghen my gram gran gheworden, om uwer woorden wille, ende hy heeft ghesworen, dat ic ouer die Iordane niet gaen en soude, ende in dat alderbeste lant niet comen dwelck hy v gheuen sal.

+ D

22

Siet ick sterue in dese aerde, ende ick en sal ouer die Iordane niet gaen, ghi sult daer ouer gaen, ende dat wtnemende lant besitten.

23

Wacht v dat ghy te gheenen tijde het verbont van den Heere uwen Godt en vergheet, dwelc hy met v lieden vast ghemaect heeft, ende dat ghy voor v seluen niet en maect eenighe ghesneden ghelijckenisse van alle der dinghen welc die Heere verboden heeft te maken.

24

Want die Heere v Godt is een verterende vier, ende een ialours Godt.

25

Eest sake dat ghy kinderen ende kints kinderen voortbringt ende in dlant woonende blijft, ende bedroghen sijnde maect eenighe ghelijckenisse voor v seluen, bedrijuende quaet voor den Heere uwen Godt, alsoo dat ghy hem tot gramscap verwect,

26

soo aenroep ick heden tot ghetuyghen hemel ende aerde, dat ghy gheringhe sult vergaen van dat lant dwelck ghy besitten sult, als ghy ouer die Iordane sult ghegaen sijn. Ghy en sult daer gheenen langhen tijt in woonen, maer die Heere sal v wtroeden

27

ende verstroyen onder alle die heydenen, ende ghy sult lutter van ghetale wesen onder die natien, tot die welcke v die Heere leyden sal,

28

Ende daer suldi den afgoden dienen, die met menschen handen ghemaect sijn, den houte, ende den steene, die niet en sien oft en hooren, nocht en eten, noch en rieken.

29

⁺Ende als ghy daer sult den Heere uwen Godt soecken, soo suldi hem vinden, by alsoo nochtans dat ghy hem met gheheelder herten soecket, ende met gheheelder bedructheyt uwer zielen.

+ E

30

Als alle dese dinghen (die voorseyt sijn) v sullen beuanghen hebben, so suldi ten laesten tijde wederom keeren tot den Heere uwen Godt, ende hhy sult sijn stemme hooren.

31

Want die Heere uwe Godt is een bermhertich Godt, hy en sal v niet verlaten, noch wtroeden noch vergheten het verbont waer mede hy uwen vaderen gheswooren heeft.

32

Vraecht vanden ouden tijden, die voor v gheweest hebben, van dien dach aen doen Godt die Heere den mensch op die aerde ghescapen heeft, vanden eenen eynde des hemels tot den anderen toe, ofter op eenighen tijt sulcken dinck ghesciet is, oft oyt bekent is gheweest,

33

dat een volck soude hooren Gods stemme sprekende wt het midden des viers, ghelijc ghy ghehoort hebt ende ghesien.

34

Oft eenich Godt ghedaen heeft, dat hy soude ghaen, ende halen voor hem een volck wt het midden der natien, door ondersoeckinghen. teekenen, ende wonderlijcke wercken, door strijt,

[p. *162]

ende met gheweldigher hant, ende eenen wtghestrecten arm, ende door veruaerlijcke visoenen, nae alle die dinghen welc die Heere v Godt voor v ghedaen heeft in Egipten, daert v ooghen saghen,

35

⁺dat ghy weten soudt dat die Heere selue Godt is, ende datter anders gheen en is behaluen eenen.

+ F

36

Hy heeft v vanden hemel doen hooren sijn stemme, dat hy v leeren soude, ende op die aerde heeft hy v ghetoont sijn ouergroot vier, ende ghy hebt sijn woorden ghehoort wt dat midden des viers,

37

want hy heeft v vaderen lief ghehadt, ende haer saet nae hen vercoren. Ende hy heeft v gheleyt voorghaende met sijn groote macht wt Egipten,

38

dat hy seer groote natien die stercker waren dan ghy soude wtroeden tot uwer incoemsten, ende dat hy v inleyden soude, ende v gheuen hen lant, tot een erfbesittinghe, ghelijc ghy siet op desen dach.

39

Daer om weet heden ende dencket in v herte dat die Heere Godt is, in den hemel bouen, ende beneden opder aerden, ende datter gheen ander en is.

40

Bewaert sijn gheboden ende beuelinghen, die ic v ghebiede, op dat v wel sij, ende uwe kinderen nae v, ende dat ghy langhen tijt moecht blijuen, opt dlant dwelck die Heere uwe Godt v gheuen sal.

41

⁺Doen heeft Moyses drij steden wtghesceyden ouer die Iordane, aen die oostsijde,

+ G

42

om dat daer toe vlieden soude soo wie onwillens sijnen naesten dootgheslaghen heeft, ende die te voren ouer een oft twee daghen hem gheen viant en heeft gheweest, dat die mach ontulieden tot een van desen steden,

43

Bosor in die woestijne welck gheleghen is opt plat landt, wt Rubens gheslachte ende Ramoth in Galaad welck is in Gads gheslachte, ende Golan in Basan, welc is in Manasses gheslachte.

44

Dit is die wet die welcke Moyses wtgeleyt heeft voor die kinderen van Israhel,

45

ende dit sijn die ghetuyghenissen, ende ceremonien, ende vonnissen, die hy ghesproken heeft tot die kinderen van Israhel, als sij wt Egipten ghegaen waren,

46

ouer die Iordane, in die valleye teghen ouer den tempel vanden afgod Phogor, int lant van Sehon des conincks van den Amorrheen, die in Hesebon woonde, den welcken Moyses verslaghen heeft. Ende die kinderen van Israhel wt Egipten comende

47

hebben sijn lant beseten, ende Og des conincks van Basan lant, der twee coninghen vanden Amorrheen, die ouer die Iordane woonden, aen der sonnen opganck

48

van Aroer welck gheleghen is opden oeuer vander beken Arnon, tot den berch Syon, die welck is oock Hermon ghenoemt,

49

alle dat plat lant ouer die Iordane, aen die oostsijde, tot aen die zee der woestijnen, ende tot die beghinselen des berchs Phasga.