Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺HIer om sijn wij weder gekeert ende opwaerts ghereyst door den wech na Basan, ende Og die coninck van Basan is met sijnen volcke ons teghen ghecomen, om te strijden in Edrai.

+ A

2

Ende die Heere heeft tot my gheseyt, En vreest hem niet want hy is in v hant gheleuert met alle sijnen volcke, ende met alle sijnen lande, ende ghy sult hem doen ghelijc ghy Sehon der Amorrheen coninck ghedaen hebt, die te Hesebon woonde.

3

Hierom heeft die Heere onse Godt in ons handen oock gheleuert Og den coninck van Basan, ende alle sijn volck, ende wij hebbense gheslaghen, tot den laetsten man toe,

4

beroouende alle sijn steden op eenen tijt. Daer en was niet een stadt die ons ontvlieden mocht, tsestich steden, alle dlant van Argob des conincrijcs van Og in Basan.

5

Alle die steden waren besloten met seer hooghe mueren ende met poorten ende grendelen, sonder ontellijcke steden die gheen mueren en hadden.

6

Ende wi hebben die verdoruen, ghelijck wi ghedaen hadden Sehon den coninck van Hesebon, verderuende alle die steden, ende die mannen ende vrouwen ende cleyne kinderen,

7

maer dat vee, ende die roouen der steden hebben wij ghenomen.

8

Ende wi hebben dlant inghenomen op dien tijt, ⁺wter hant van die twee coninghen der Amorrheen die ouer die Iordane waren, van die beke Arnon tot den berch van Hermon toe,

+ B

9

den welcken die van Sidonien Sarion heeten, ende die Amorrheen Sanir,

10

alle die steden die opt plat lant ligghen, ende alle dat lant van Galaad ende Basan, tot Selcha, ende Edrai, die steden van Ogs conincrijck in Basan,

11

Want Og die coninck van Basan was alleen ouerbleuen van der ruesen gheslachte. Ende men thoont sijn ijseren bedde dwelck is te Rabbath een stadt der kinderen van Ammon hebbende neghen cubitus in die lengde, ende vier in die breydde, nae die mate des cubitus van eender mans hant.

12

Ende wij hebben op dien tijt beseten het lant van Aroer, welc is gheleghen op den oeuer van der beken Arnon, tot die helicht vanden berch Galaad ende die steden des lants heb ic Ruben ende Gad ghegeuen,

13

Maer dat ander deel van Galaad, ende gheheel Basan van Ogs conincrijck, heb ick ghegeuen den haluen gheslachte van Manasse, alle dat lantschap van Argob. Ende gheheel Basan hiet der ruesen lant,

14

⁺Iair Manasses sone besadt alle dat lant van Argob tot aen die palen van Gessuri ende Machati. Ende hi heeft Basan nae sijnen naem genoemt Hauothiair, dat is, die dorpen van Iair tot desen dach toe,

+ C

15

Ende Machir heb ick ooc Galaad ghegheuen,

16

Ende den gheslachten van Ruben ende Gad, heb ic vanden lande van Galaad ghegheuen vander beken Arnon, dat midden vander beken ende dat daer bij leijt, totter beken Ieboc toe welc es die pale der kinderen van Ammon,

17

ende dat plat lant der woestijnen, ende die Iordane, ende die palen van Cenereth tot aen die zee der woestijnen, welc es dalder souste, aen dat beginsel vanden berch phasga, teghen den oosten.

18

Ende ic heb v beuolen op dien tijt, segghende, Die Heere v Godt gheeft v dit lant tot een erfbesittinghe Gaet al bereyt voor v broeders die kinderen van Israhel, alle vrome mannen

19

sonder v huysvrouwen kinderen ende vee, Want ic weet wel dat ghi veel beesten hebt, ende dat die sullen moeten in die steden blijuen, die ic v lieden ghegeuen hebbe,

20

tot dat die Heere uwen broederen ruste sal ghegheuen hebben, ghelijck hy v ghegheuen heeft, ende dat sij ooc dlant besitten moghen dwelck hy hen gheuen sal ouer die Iordane, dan sal een yeghelijck wedercomen tot sijn besittinghe, die welcke ic v ghegheuen hebbe.

21

⁺Ende ic heb op dien tijt Iosue ooc beuolen, segghende, V ooghen hebben ghesien tghene dat die Heere uwe Godt ghedaen heeft desen twee coninghen, alsoo sal hy oock doen alle den conincrijcken daer ghy henen trecken sult.

+ D

22

En vreest hen niet, Want die Heere v Godt sal voor v lieden vechten.

23

Ende ick heb den Heere op dien tijt ghebeden segghende,

24

Heere Godt ghy hebt uwen dienaer begonst te toonen v grootdadicheyt, ende v alder machtichtste hant. Want daer en is gheen Godt tsij inden hemel oft inder aerden, die v wercken soude connen ghedoen, oft by v stercheyt moghen gheleken worden.

25

Daer om sal ic voorts trecken ende besien dit alderbeste lant,

[p. *161]

ouer die Iordane, ende desen treffelijcken berch, ende den berch lybanus.

26

Ende die Heere is teghen my gram gheweest om uwen wille, ende hy en heeft my niet ghehoort, maer heeft mi gheseyt, Laet v ghenoeghen noch en wilt my voortaen in gheender manieren van desen dinghe meer segghen,

27

Climt op dopperste van Phasga, ende keert v ooghen al rontsomme na den Westen ende Noorden, ende nae den Suyden ende Oosten ende aensieghet, want ghy en sult ouer dese Iordane niet comen,

28

Ghebiedt Iosue, ende versterct hem ende gheeft hem vromen moet, want hy sal voor dt volck gaen ende hen dlant deylen dwelck ghy sien sult.

29

Ende wij sijn ghebleuen in die dellinghe teghen ouer den tempel vanden afgod Phogor.