Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde van daer ghereyst, sijn wij ghecomen in die woestijne die daer leydet tot die roode zee, ghelijc die Heere my gheseyt hadde, ende wij hebben den berch Seir langhen tijt ommeghegaen.

+ A

2

Ende die Heere heeft tot my gheseyt,

3

Ghy hebt ghenoech desen berch omghegaen, gaet henen noortwaerts,

4

ende ghebiedt den volck segghende, Ghy sult passeren door die palen van uwen broeders Esaus kinderen, die te Seir woonen, ende sij sullen v vreesen.

5

Hierom siet naerstelijck toe dat ghy v teghen hen niet en roert, want ic en sal v van haren lande niet gheuen so vele als den stap van eenen voet betreden mach, want ick heb Esau ghegheuen den berch Seyr tot eender besittinghen.

6

Ghy sult spijsen van hen om ghelt coopen ende eten, Het water suldi ghecocht sceppen ende drincken.

7

⁺Die Heere v Godt heeft v ghebenedijt in alle dat werck uwer handen, hy kent uwen wech hoe dat ghy ghegaen sijt door dese groote woestijne veertich iaren lanck, die Heere v Godt woonende met v, ende v en ghebrack niet.

+ B

8

Ende doen wij voorby ghegaen waren onse broeders Esaus kinderen door den veltachtighen wech van Elath ende van Asiongaber, soo sijn wij ghecomen totten wech, welck leyt nae die woestijne van Moab.

9

Ende die Heere heeft tot my gheseyt, En vecht teghen die Moabiten niet, noch en neemt gheenen strijdt aen teghen hen, want ic en sal v niet gheuen van haren lande, want ick heb dat Loths kinderen ghegeuen tot een besittinghe.

10

Emim waren dierste inwoonders van dien, een groot ende machtich volck, ende soo hooghe van lingden, datmen gheloofde dat sij van Enacims gheslachte waren

11

ghelijck ruesen, ende waren ghelijck Enacims kinderen. Voorts soo heeten hen die Moabiten Emim.

12

⁺Maer in Seir woonden ierstmael Horim, ende doen die verdreuen ende te niete ghedaen waren, soo hebben Esaus kinderen daer ghewoont, ghelijck Israhel ghedaen heeft int lant van haerder besittinghen, dat die Heere hen ghegheuen heeft.

+ C

13

Hier om opstaende dat wij souden gaen ouer die beke Zared, sijn wij tot daer ghecomen,

14

Ende den tijt dat wij ghewandelt hebben van Cadesbarne, tot den ouerganck van Zared, heeft gheweest achtendertich iaren, tot dat alle die generatie der strijdtbaer mannen vergaen waren wt die legheren, ghelijck die Heere ghesworen hadde,

15

wiens hant teghen hen geweest is dat sij vergaen souden wt dat midden des heyrleghers.

16

Maer nae dat alle die strijtbaer mannen ghestoruen waren,

17

soo heeft die Heere tot my ghesproken, ⁺segghende,

+ D

18

Ghi sult heden door Moabs palen gaen, door een stadt die Ar ghenoemt is,

19

ende comende aen die naeste plaetsen der kinderen van Ammon, wacht v dat ghy teghen hen niet en strijdt, noch en ruert v niet ten strijde, Want ick en sal v niet gheuen van Ammons kinderen lant, want ic heb Loths kinderen dat ghegheuen tot een erffelijcke besittinghe.

20

Het is gheacht voor der ruesen lant, ende daer hebben voortijts ruesen in ghewoont, welc die Amoniters heeten Zomzommim,

21

een groot volck van hoogher lingden ghelijck Enacim, welck die Heere vernielt heeft van hen aensicht, ende hy heeftse daer in doen woonen in die plaetse van dien,

22

ghelijck hy Esaus kinderen ghedaen hadde, die te Seir woonen, vernielende die Horrhiters, ende hen lant haer lieden gheuende, welck sij besitten tot op desen tijt.

23

⁺Ende die Heueen die te Haserim woonden tot Gaza toe sijn verdreuen vanden Capadocianen, die welcke wt Ca-

+ E

[p. *160]

padocien sijn ghegaen, ende hebbense vernielt, ende voor henlieden aldaer ghewoont.

24

Staet op ende gaet ouer die beke Arnon, Siet ic heb in v hant gheleuert Sehon den coninck van Hesebon den Amorrhiter, ende sijn landt beghint te besitten, ende strijdt teghen hem.

25

Heden sal ic uwen grouwel, ende anxt beghinnen te senden op alle tvolck dwelck onder den gheheelen hemel woont, also dat sij beuen sullen van anxt, als sij van uwen naem ghehoort sullen hebben, ende hen verschricken, ghelijck die vrouwen die in barens noode sijn, ende met pijnen beuanghen worden.

26

Aldus soo heb ic boden wtghesonden wt die woestijne Cademoth tot Sehon den coninc van Hesebon, met vreedtsamighen woorden segghende,

27

Wij sullen door v lant passeren, door die ghemeyn heirbane sullen wij gaen, wij en sullen niet besijden aftreden ter slincker oft ter rechter sijden,

28

Vercoopt ons spijse om prijs, dat wij eten moghen, ende gheeft ons water om ghelt, ende alsoo sullent wij drincken.

⁺Alleen eest dat ghy ons wilt toelaten eenen doorganck,

+ F

29

ghelijck die kinderen van Esau ghedaen hebben, die in Seir woonen, ende die Moabiters die te Ar woonen, tot dat wi comen sijn an die Iordane, ende daer ouertrecken moghen tot in dat lant, welck die Heere ons Godt ons gheuen sal.

30

Ende Sehon die coninc van Hesebon en heeft ons niet willen laten doorghaen, want Godt de Heere hadde sijnen gheest verhardt, ende sijn herte verstoct, dat hy in v handen gheleuert soude worden, ghelijck ghy nv siet.

31

Ende die Heere heeft tot my gheseyt, Siet ick heb v begonst te leueren Sehon, ende sijn lant, beghint dat te besitten.

32

Ende Sehon is teghen ons te strijde comen met alle sijnen volcke te Iasa.

33

Ende die Heere ons Godt heeft ons dien gheleuert, ende wij hebben hem verslaghen met alle sijnen sonen, ende met alle sijnen volcke.

34

⁺Ende op dien seluen tijt wonnen wij alle die steden, als wij alle haer inghesetenen verslaghen hadden, mannen ende vrouwen met den cleynen kinderen, ende wij en hebben daer niet in laten blijuen

+ G

35

sonder dat vee, welck ten deele quam den ghenen diese roofden, ende die roouen der steden welc wij in namen

36

van Aroer, welc gheleghen is by den oeuer der beken van Arnon, der stadt welck in die dellinghe leyt, tot Galaad toe. Daer en was gheen dorp ende stadt die onsen handen ontulieden mocht, want die Heere onse Godt heeftse ons al gheleuert,

37

Sonder het lant van Ammons kinderen, daer wij niet toe ghegaen en sijn, ende alle die landen die daer ligghen omtrent die beke Ieboc, ende die steden der gheberchten, ende sonder alle die plaetsen, daer onse Heere Godt ons af verboden hadde.