Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺DEse woorden heeft die Heere ooc tot Moysen gheseyt, in die platte landen van Moab, op der Iordanen teghen ouer Iericho,

+ A

2

Ghebiedt den kinderen van Israhel, dat sij den Leuiten van haren besittinghen gheuen steden om te woonen ende hare voorsteden al rontsomme,

3

dat sij in die steden moghen woonen, ende die voorsteden sullen wesen voor haer cleyn vee, ende groot vee,

4

die welcke sullen buyten vanden mueren der steden moeten wtstrecken duysentich screden verre int ronde.

5

Teghen den Oosten sullen wesen twee duysent cubitus, ende teghen die suytsijde sullen ooc desghelijcs sijn twee duysent cubitus, ende aen die zee ooc die teghen den Westen is, salt die selue mate wesen, ende die noortsijde sal ooc met ghelijcken palen haer eynde nemen, ende die steden sullen int midden wesen, ende die voorsteden buyten.

6

Maer vanden steden die ghy den Leuiten gheuen sult, sullender ses wtghescheyden worden tot behelp der gheender die vluchtich sijn, dat tot dien vlieden mach, die bloet ghestort heeft, ende sonder dese suldi noch tweenveertich ander steden wtscheyden

7

welck tsamen maken achtenveertich steden, met haren voorsteden.

8

⁺Ende dese steden diemen vander kinderen van Israhels besittinghe gheuen sal, salmen meestdeel nemen vanden ghenen die meest hebben, ende vanden ghenen die minst hebben, salmen minst nemen. Sij sullen elck den Leuiten steden gheuen, nae die mate van haerlieder erue.

+ B

9

Die Heere heeft tot Moysen gheseyt,

10

Spreeckt tot die kinderen van Israhel, ende ghy sult tot hen segghen, Als ghy ouer die Iordane sult ghepasseert sijn int lant van Chanaan,

11

soo ordineert wat steden dat daer wesen sullen tot beschermen der gheender die vluchtich sijn, die onwillens bloet ghestort hebben,

12

ende als die vluchtighe mensch in een van dien steden gheuloden is, soo en sal die maech vanden ghenen die verslaghen is, hem niet moghen dootslaen, voor dat hy stae voor die menichte, ende sijn sake gheordeelt sal wesen.

13

Ende van dien steden die wtghesceyden worden voor dat bescermen der vluchtigher,

14

sullender drij wesen, ouer die Iordane, ende drij int lant van Chanaan,

15

soo wel voor die kinderen van Israhel, als voor den vreemdelinghen ende wtlanders, dat hy tot die steden vlieden mach die onwillens bloet ghestort heeft.

16

Eest dat iemant met een ijseren wapen geslaghen heeft, ende dat hy doot is die gheslaghen is, soo sal hy des dootslachs sculdich wesen, ende oock steruen.

17

⁺Eest dat hy met eenen steen worpt, ende dat hy die gheraect is sterft, soo sal hy desghelijcs ghedoot worden.

+ C

18

Eest dat iemant sterft die met eenen houte geslaghen is so salt gewroken worden met den bloede vanden slagher.

19

Die naeste des verslaghens, sal den dootslagher dootslaen, terstont als hy hem achterhalen sal, so sal hy doot gheslaghen worden.

20

Eest dat iemant wt hate iemant stoot, oft iet op hem worpt met listicheyt,

21

oft heeft hy hem (doen hi viant was) metter hant gheslaghen, ende dat die sterft, soo sal die slagher des dootslachs sculdich wesen. Die maech des verslaghens sal hem dootslaen alsoo haest als hy hem vint.

22

Maer eest sake dat hy iet desghelijcs ghedaen heeft auontuerlijck,

23

sonder haet ende viantschap,

24

ende dat dit ghetoont worde dattet volck hoort, ende dat die sake tusschen den slagher ende den maech des verslaghens, nae rechte ondersocht is,

25

soo sal die onnoosel verlost worden wt des wraecsueckers hant, ende hi sal met vonnisse wederomme ghebracht worden tot der stadt daer hy toe gheuloden was, ende daer blijuen, tot dat die opperste priester die metter heyligher olien ghesalft is sterue.

26

⁺Eest dat die dootslagher beuonden wordt buyten die palen der steden, die den ballinghen toeghescict sijn,

+ D

27

ende gheslaghen wordt van hem die des bloets wreker is, soo sal hy ontsculdich wesen die hem dootslaet,

28

want die ballinc hadde moeten blijuen in die stadt tot die doot des ouersten priesters, Maer als die ghestoruen is, soo sal die dootslagher wederom comen in sijn lant.

29

Dese dinghen sullen eewich wesen ende wettelijck in allen uwen woonsteden.

30

Een dootslagher sal onder ghetuyghen ghepuyniert worden, met eens ghetuyghenis en sal niemant verwesen worden.

31

Ghy en sult gheen ghelt nemen vanden ghenen die bloets sculdich is, maer hy sal selue oock terstont steruen.

32

Die ballinghen ende vluchtighe en moghen in gheender manieren wederkeeren tot haren steden voor die doot vanden oppersten priester,

33

op dat ghy het lant uwer wooninghen niet en ontsuyuert, welck besmet wordt met dat bloet der onnooselen, ende men mach dat anders niet suyueren dan door sijn bloet, die eens anders bloet gestort heeft.

34

Ende alsoo sal v erf besittinghe ghesuyuert worden daer ic met v woone, Want ick ben die Heere die woone onder die kinderen van Israhel.