Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺ENde die Heere heeft tot Moysen ghesproken segghende,

+ A

2

Ghebiedt den kinderen van Israhel ende segghet hen, Als ghy sult int lant van Chanaan comen sijn, ende dat v dit by lote gheuallen sal wesen tot een besittinghe, so sal dat lant tusschen dese palen besloten worden.

3

Die suytsijde sal beghinnen van die woestijne Sin, welc is by Edom, ende het sal sijn palen hebben teghen den Oosten aen die soutste zee,

4

welcke palen sullen ommegaen die zuytsijde, door den opganck des scorpioens, also dat die sullen gaen voorts tot Senna, ende comen aen die zuytsijde tot Cadesbarne toe, waer wt dat comen sullen die naeste palen, tot dat dorp Adar ghenoemt, ende sij sullen strecken voorts tot Asemona,

5

ende dese pale sal int ronde gaen van Asemona tot die beke van Egipten, ende sal een eynde nemen aen den oeuer der grooter zee.

6

⁺Maer die westsijde sal beghinnen van die groote zee, ende met dien eynde sal die besloten worden.

+ B

7

Maer aen die noortsijde sullen van die groote zee die palen beghinnen, comende totten alderhoochsten berch,

8

ende van daer sullen sij comen in Emath tot aen die palen van Sedada,

9

ende die palen sullen gaen tot Zephrona, ende tot dat dorp Enan, dit sullen die palen wesen aen die noortsijde.

10

Van daer sullen sij haer palen slaen teghen die Oostsijde van dat dorp Enan tot Sephama,

11

ende van Sephama, sullen die palen nederdalen tot Heblatha, tseghen die fonteyn Daphnim, ende van daer sullen sij doorcomen tseghen den Oosten, aen die zee Cenereth,

12

ende sij sullen voortsgaen tot die Iordane, ende ten lesten sullen sij besloten worden met die soutste zee. ⁺Dit lant suldi hebben achteruolghende haer palen int ronde.

+ C

13

Ende Moyses heeft den kinderen van Israhel beuolen segghende, Dit sal het lant sijn welc ghi metten lote besitten sult, ende het welck die Heere beuolen heeft datmen den neghen gheslachten gheuen soude, ende den haluen gheslachte,

14

Want het gheslachte van Rubens kinderen by haren familien, ende het gheslachte van Gads kinderen, na dat ghetal der maeschappen, ende het half gheslachte van Manasses oock,

15

dat sijn twee gheslachten ende een half, hebben haer deel ontfanghen ouer die Iordane teghen ouer Iericho, aen die oostsijde.

16

Ende die Heere heeft tot Moysen gheseyt,

17

Dit sijn die namen der mannen die v het lant sullen wtdeylen, Eleazar die Priester, ende Iosue Nuns sone,

18

ende

[p. *157]

elcken Prince van elcken gheslachte,

19

waer afdit die namen sijn, Van Iudas gheslachte, Caleb Iephones sone,

20

Van Symeons gheslachte, Samuel Ammiuds sone,

21

Van Beniamins gheslachte, Elidad Chaselons sone,

22

Van dat gheslachte der kinderen van Dan, Bocci Ioglis sone,

23

Van Iosephs kinderen wt Manasses gheslachte, Haniel Ephods sone,

24

Van Ephraims gheslachte, Camuel Sephtans sone,

25

Van Zabulons gheslachte, Elisaphan Pharnachs sone,

26

Van Issachars gheslachte, die vorst Phaltiel Ozans sone,

27

Van Asers gheslachte Ahiud Salomis sone,

28

Van Nephtali gheslachte, Phedael Ammiuds sone.

29

Dit sijn die ghene wien dat die Heere beuolen hadde, dat sij het lant van Chanaan den kinderen van Israhel wtdeylen souden.