Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺DOen quamen die princen van Galaads familie Machirs sone, die een sone was van Manasse, van Ioseph kinderen gheslachte, ende sij hebben ghesproken tot Moyses voor die princen van Israhel, ende gheseyt,

+ A

2

Die Heere heeft beuolen v onsen Heere dat ghy dlant metten lote den kinderen van Israhel wtdeylen soudt, ende dat ghy Salphaads ons broeders dochteren gheuen soudt die erue welcmen haren vader sculdich was.

3

Die welcke, eest sake dat eenighe mans van een ander gheslachte tot huysvrouwen nemen, soo sal haer besittinghe volghen, ende als die in een ander gheslachte ouerghedraghen sal wesen, ⁺soo salt van ons erfdeel ghemindert worden,

+ B

4

ende alsoo salt ghescieden dat soo wanneer het iubileus, dat is tvijftichste iaer der verlatenissen sal comen sijn soo sal die wtdeylinghe der loten gheminghelt worden, ende die erue van deen gheslachte, sal tot in dandere comen.

5

Ende Moyses heeft gheantwoordt den kinderen van Israhel, ende door tghebodt des Heeren gheseyt, Het gheslachte van Iosephs kinderen heeft recht ghesproken,

6

ende dit is die wet welc vanden Heere vercondicht is ouer Salphaads dochteren, Laetse ten houwelijck nemen wat mans dat sij willen, alleen datse mans nemen van haren gheslachte

[p. *158]

7

op dat die erue der kinderen van Israhel niet ghemenghet en worde van deen gheslachte in dandere, Want alle die mans sullen huysvrouwen nemen van haren gheslachte ende maesscap,

8

ende alle die vrouwen sullen mans nemen van den seluen gheslachte, op dat die erffelijcheyt in die familien blijuen mach,

9

ende dat die gheslachten hen onder malcanderen niet en menghen maer dat sij so blijuen moghen,

10

also sij vanden Heere ghesceyden sijn. Ende Salphaads dochteren hebben ghedaen alsoo dat beuolen was,

11

ende Maala ende Thersa, ende Hegla, ende Melcha, ende Noa, hebben ghetrout haers vaders broeders sonen

12

wt Manasses gheslachte die Iosephs sone was, ⁺ende aldus soo is dat erfdeel (welck hem gegeuen was) is bleuen in haers vaders gheslachte ende familie.

+ D

13

Dit sijn die gheboden ende rechten welck Godt beuolen heeft door Moyses hant, tot den kinderen van Israhel, op dat plat lant van Moab by die Iordane teghen ouer Iericho.

Hier voleyndt dat vierde boeck Moysi, ghenaemt het boeck der tellinghen.