Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺MAer die kinderen van Ruben ende Gad hadden seer veel cleyn veeds, ende sij hadden een ontallijc goet van behelpighe beesten. Ende als sij ghesien hadden Iazer ende Galaad seer bequaem landen om beesten te voeden,

+ A

2

soo sijn sij comen tot Moysen ende Eleazar den priester, ende tot die princen der menichten, ende hebben gheseyt.

3

Ataroth, ende Dibon, ende Iazer, ende Nemra, ende Hesebon, ende Eleale, ende Sabam, ende Nebo, ende Beon,

4

dlant dat die Heere verslaghen heeft voor die kinderen van Israhel, is een seer vruchtbaer lant, om die beesten te weyden, ende wi uwe dienaers hebben seer veel beesten,

5

ende wi bidden v eest dat wi gratie voor v vonden hebben dat ghi ons uwen dienaren dit lant wilt tot een erfbesittinghe gheuen, ende dat ghi ons niet en doet ouer die iordane gaen,

6

Ende Moyses heeft hen gheantwoort. Sullen v broeders ten strijde gaen, ende ghi sult hier stil sitten?

7

Waerom keerde ghy die herten der kinderen van Israhel omme, ⁺dat sij niet en souden derren voorts gaen ter plaetsen welck hen die Heere gheuen sal?

+ B

8

En hebben v vaders desghelijcks niet ghedaen doen ickse sandt van Cadesbarne om het landt te bespieden.

9

Ende als sij comen waren tot der druyuen

[p. *155]

dal, doen sij alle het landt bespiet hadden, soo hebben sij het herte der kinderen van Israhel omme ghekeert, dat sij niet en souden gaen in die palen des lants, welc hen die Heere ghegheuen hadde,

10

Ende die Heere gram sijnde swoer, segghende.

11

Dese menschen die wt Egypten op ghetrocken sijn van twintich iaren out ende daer bouen en sullen niet sien het lant welc ick belooft hebbe met eede Abraham, Isaac, ende Iacob, ende sij en hebben mi niet willen volghen

12

sonder Caleb Iephones sone die Cenezeus, ende Iosue Nuns sone. ⁺Dese hebben mijnen wille volbracht,

+ C

13

Ende die Heere gram sijnde tseghen Israhel, heeftse omgheleyt door die wildernisse, veertich iaren lanck, tot dat alle dat gheslachte vergaen was, diet quaet ghedaen hadde voor zijn aensicht,

14

Ende siet (seyde hy) ghi sijt voor v vaders opghestaen als groeytsel ende voetsel der sondigher menschen, dat ghi die rasende gramschap des Heeren teghen Israhel soudt vermeerderen.

15

Want eest sake dat ghi hem niet volghen en wilt, soo sal hy het volck verlaten in die woestijne ende ghi sult die sake wesen van alle haerlieder doot.

16

Maer sij sijn nader ghecomen ende hebben gheseyt. Wij sullen scaepstallen maken ende stallinghen voor die behelpighe beesten van dat groot vee, ende voor ons cleyn kinderen sullen wi besloten steden maken,

17

maer wij sullen seluer ghewapent ende omgort ten strijde trecken voor die kinderen van Israhel, tot dat wij hen ghebracht hebben in haer plaetsen, ⁺Ons cleyn kinderen ende alle dat wij hebben moghen, sullen blijuen in die bemuerde steden, teghen den listighen oploop van die inghesetenen des lants.

+ D

18

Wij en sullen in ons huysen niet comen, voor dat die kinderen van Israhel haer erfdom besitten sullen,

19

ende wij en sullen niet soecken ouer die iordane, Want wij hebben nv ons erfdeel aen die oostsijde der iordanen,

20

Den welcken Moyses seyde. Eest dat ghi doet het tghene dat ghi beloeft, soo trect al ghereet voor den Heere te strijde,

21

ende laet allen v strijtbaer mannen ghewapent trecken ouer die iordane, tot dat die Heere zijn vianden heel ter neder gheworpen sal hebben,

22

ende dat alle dlant onder sijn bedwanck sal comen wesen, dan suldy by den Heere onschuldich wesen, ende voor Israhel, ende ghy sult behouden die landen die ghy begheert voor den Heere.

23

Maer eest dat ghi niet en doet dat ghy segt, soo en twijfelt daer niemant aen, ghi en misdoet tseghen den Heere, ⁺ende weet dat v misdaet v beuanghen sal,

+ E

24

Dus maect steden voor v cleyn kinderen, ende coyen ende stallen voor v scapen, ende behelpsaem beesten, ende volbrengt dat ghi beloeft hebt.

25

Ende die kinderen van Gad ende Ruben hebben tot Moysen gheseyt. Wij sijn v dienars, wij sullen doen dat onse Heere ghebiedt,

26

Ons cleyn kinderen ende vrouwen, ende cleyn vee, ende behulpsaem beesten sullen wij achterlaten in die steden van Galaad,

27

maer wij v dienaers sullen al bereet trecken ter orloghen, ghelijck ghy Heere segghet.

28

Hierom heeft Moyses gheboden Eleazaro den priester ende Iosue Nuns sone, ende den hooftmannen van die familien der gheslachten van Israhel ende heeft tot hemlieden gheseyt.

29

Eest sake dat Gad ende Rubens kinderen met v trecken ouer die iordane al ghewapent ter orloghen voor den Heere, ende dat v het lant onderdaen wort, ⁺soo gheeft hen het lant van Galaad tot een besittinghe.

+ F

30

Maer eest dat sij met v lieden niet en willen trecken ghewapent int lant van Chanaan, soe laetse onder v lieden plaetse hebben om te woonen,

31

Ende die kinderen van Gad ende Ruben hebben gheantwoort. Ghelijck ons Heere sijnen dienaers gheseyt heeft, alsoo sullen wij doen,

32

wij sullen seluer ghewapent trecken voor den Heere int landt van Chanaan, ende wij belijden dat wij nv ons erffelijcke besittinghe ontfanghen hebben herwaerts ouer die iordane.

33

Aldus heeft Moyses den kinderen van Gad ende Ruben ende der helicht van Manasses Iosephs soons gheslachte ghegheuen het rijck van Sehon der Amorrhiters coninck, ende het rijck van Og des conincks van Basan ende haer lant, met haren steden al rontsomme.

34

Hierom soo hebben die kinderen van Gad ghetimmert, Dibon, ende Atharoth, ende Aroer

35

ende Roth, ende Sophan, ende Iazer, ende Iegbaa,

36

ende Bethnemra, ende Betharan, besloten steden, ⁺ende stallinghen voor haer beesten.

+ G

37

Maer Rubens kinderen timmerden Hesebon, ende Eleale, ende Chariathaim,

38

ende Nabo, ende Baalmeon veranderende haer namen, ende oock Sabama, gheuende namen den steden die sij ghetimmert hadden.

39

Ende voorts soo sijn die kinderen van Machir Manasses sone ghetrocken te Galaad, ende sij hebben dat lant verwoest, verslaghen hebbende die Amorrhiters des lants inghesetenen.

40

Hierom heeft Moyses het lant Galaad ghegheuen Machir Manasses sone die welc daer in ghewoont heeft.

41

Maer Iair Manasses sone is wech ghegaen, ende heeft alle sijn dorpen in ghenomen, welc hy ghenoemt heeft Auothiair dat is Iairs dorpen.

42

Ende Nobe is oock wtghetrocken ende heeft inghenomen Canath met sijnen dorpkens, ende hy heeft die nae sijnen naem ghenoemt nobe.