Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺ENde die Heere heeft Moysen ghesproken, segghende,

+ A

2

Wreect ierst die kinderen van Israhel van die Madianiters, ende alsoo suldi versaemt worden tot uwen volcke,

3

Ende ter stont seyde Moyses. Wapent van v lieden mannen ten strijde, die des Heeren wraec moghen doen ouer die Madianiters,

4

laet kiesen duysent mannen wt elcken gheslachte van Israhel, welckmen ten strijde mach senden.

5

Ende si hebbender duysent gheleuert wt elcken gheslachte, dat is twaelf duysent, gereedt ten strijde,

6

die welcke Moyses heeft ghesonden met Phinees, Eleazarus des priesters sone, ende heeft hen gheleuert die heylighe vaten metten trompetten om gheclanc te maken.

7

Ende als sij tseghen die Madianiters ghestreden, ende die verwonnen hadden, soo hebben sij alle die manspersoonen doot gheslaghen,

8

ende hen coninghen Eui, ⁺ende Recem, ende Sur, ende Vr, ende Rebe, vijf princen des volcks, ende Balaam Beors sone hebben sij oock metten swaerde verslaghen,

+ B

9

ende sij hebben haer vrouwen ende cleyn kinderen gheuanghen ghenomen, ende allen haer vee, ende

[p. *154]

alle den huysraet, ende wat sij hebben mochten dat hebben sij al gherooft,

10

soo wel die steden als die dorpkens ende casteelen heeft die vlamme te niet bracht,

11

Ende sij hebben den roof ghenomen, ende alle dat sij gherooft hadden, soo wel van menschen als van beesten,

12

ende sij hebben dital bracht voor Moysen, ende Eleazar den priester, ende tot alle die menichte der kinderen van Israhel, Maer alle den anderen huysraet hebben si ghedraghen in den legher, in die platte landen van Moab, by die iordane tseghen ouer Iericho.

13

Maer Moyses ende Eleazar die priester ende alle die princen der vergaderinghen sijn wtghegaen hen te ghemoete buyten den heyrlegher,

14

Ende Moyses is gram gheworden op die princen ende duysent mannen ende hondert mannen des heyrs, die wten strijde comen waren

15

seyde. ⁺Waeromme hebdi die vrouwen behouden?

+ C

16

En sijn dese niet die ghene die bedroghen hebben die kinderen van Israhel, door dat ingheuen van Balaam, ende die v hebben doen ouertreden tseghen den Heere door die sonde van Phogor, waerom dattet volck verslaghen is gheweest?

17

Daerom slaet doot alle watter is van mans persoonen ooc die cleyn kinderen, ende die vrouwen die van mans bekent zijn door natuerlijc versamen steect den hals af,

18

maer die ionge dochters, ende die vrouwen die noch maecht zijn behoudt voor v,

19

ende blijft buyten den legher seuen daghen. Soo wie eenen mensch dootslaet, oft wie eenen die dootgheslagen is ghenaect, die sal ghesuyuert worden opden derden ende seuensten dach,

20

Ende van alle den rooft sij oft een cleet oft eenighe ghereetscap oft iet tot huysraet gemaect van gheyten vellen ende van haer, oft van houte, dat sal men suyueren,

21

Ende Eleazar die priester heeft aldus ghesproken tot die strijtbaer mannen des heyrs die ghestreden hadden. Dit is het ghebodt der wet, welck God Moysi beuolen heeft,

22

gout ende siluer, metael, ende yser, ende loot, ende ten,

23

ende al wat door die vlamme passeren mach, dat salmen doort viersuyueren, Maer wat dat gheen vier verdraghen en mach dat salmen heylich maken, met dat water der suyueringhe,

24

ende ghisult v cleederen wasschen opden seuensten dach, ⁺ende als ghi ghesuuert sijt soo suldi daer nae inden legher comen,

+ D

25

Ende die Heere heeft tot Moysen geseyt.

26

Neemt die somme van alle datter gherooft is, vanden mensch aen tot dat vee, ghi ende Eleazar die priester, ende alle die princen der ghemeynten,

27

ende ghisult den roof ghelijckelijc deylen tusschen die ghene die ghestreden hebben, ende ter orloghen gheweest hebben, ende tusschen alle die ander menichte,

28

ende ghi sult een deel voor den Heere wtsceyden, van dien die ghestreden hebben, ende in die orloghe gheweest hebben, een ziele vanden vijfhondert, soo wel vanden menschen, als vanden ossen, ende eselen, ende scapen,

29

ende ghi sult die Eleazar den priester gheuen, want het zijn die ierste vruchten des Heeren,

30

ende wt dat halfdeel der kinderen van Israhel suldy nemen het vijfstichste hooft, vanden menschen, ende vanden ossen, ⁺ende vanden eselen ende scapen, ende van allen beesten ende ghi sult die den Leuiten gheuen, die daer waken in die bewaernisse van des Heeren tabernakel.

+ E

31

Ende Moyses met Eleazar hebben ghedaen ghelijck die Heere beuolen hadde,

32

Ende den roof welck het heyr gherooft hadde was ses hondert duysent, ende vijfentseuentich duysent, scapen,

33

tweentseuentich duysent ossen,

34

eenentsestich duysent eselen,

35

ende tweendertich duysent zielen der menschen van vrouwen persoonen die gheenen man bekent en hadden.

36

Ende die helicht is ghegheuen den ghenen die inden strijt gheweest hadden, te weten drij hondert duysent ende seuenendertich duysent, ende vijfhondert scapen,

37

waer wt ghetelt sijn tot des Heeren deel, ses hondert ende vijuentseuentich scapen,

38

ende vanden sessendertich duysent ossen, ⁺sijn wtghetelt tweentseuentich ossen,

+ F

39

ende vanden dertich duysent ende vijfhondert eselen, sijn wtghetelt eenentsestich eselen,

40

ende vanden sesthien duysent menschen zielen, sijn tot des Heeren deele comen tweendertich zielen.

41

Ende Moyses heeft dat ghetal van die ierste vruchten des Heeren Eleazar den priester gheleuert, ghelijc hem gheboden was,

42

van dat half deel der kinderen van Israhel welck hy afghedeelt hadde voor die ghene die inden strijt gheweest hadden,

43

Maer vander helicht welc te deele ghecomen was, der ander menichten des volcs dat is vanden drij hondert duysent, ende seuenendertich duysent, ende vijfhondert scapen.

44

Item vanden sessendertich duysent ossen,

45

ende vanden dertich duysent, ende vijfhondert eselen,

46

ende vanden sesthien duysent menschen,

47

heeft Moyses ghenomen het vijftichste hooft en heeft dat den Leuiten ghegheuen, die daer waecten in des Heeren tabernakel ghelijc die Heere gheboden hadde.

48

⁺Ende als die hooftluyden des heyrs, ende die capiteynen van duysent ende van hondert knechten by Moysen comen waren, soo hebben sij gheseyt.

+ G

49

Wij v dienaers hebben ouertelt dat ghetal der strijtbaer mannen welc wij onder ons hant ghehadt hebben, ende daer af en is niet een achter bleuen.

50

Om dese sake soo offeren wij elck tot des Heeren ghiften alle tgout dat wij inden roof hebben moghen vinden, gulden voetbanden ende ringhen der armen, ende der vingheren, ende cieraeten der rechter hant, ende halsbanden, dat ghy den Heere voor ons biddet,

51

Ende Moyses ende Eleazar die priester hebben alle dat gout ontfanghen van verscheyden faetsoenen

52

in ghewichte sesthien duysent seuen hondert, ende vijftich siclen, vanden hooftluyden ouer duysent, ende ouer hondert mannen.

53

Want alle tgout dat een ieghelijck inden roof ghecreghen hadde dat behoorde hem toe.

54

Ende als sij dit ontfanghen hadden soo hebben sij dat ghedraghen in dat tabernakel des ghetuyghenis, tot een ghedenckenisse der kinderen van Israhel voor den Heere.