Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺ENde Moyses heeft den kinderen van Israhel vertelt alle dat hem die Heere beuolen hadde,

+ A

2

ende hi heeft ghesproken tot die princen der gheslachten der kinderen van Israhel. Dit is dwoort dat die Heere gheboden heeft.

3

Eest dat eenich man den Heere een ghelofte ghelooft heeft, oft sij seluen met eenen eede verbonden, soo en sal hi sijn woort niet breken, maer hy sal volbrenghen alle dat hi belooft heeft

4

Eest dat een vrouwe iet ghelooft ende haer met eede verbint, die noch in haers vaders huys is, ende noch in die ouderdom van een ionghe dochter is, eest dat haer vader verneemt die belofte welc sij ghelooft heeft, ende den eedt daer sij haer ziele mede verbonden heeft, ende dat hy swijcht, ⁺soo sal sij die belofte schuldich zijn.

+ B

5

⁺Al wat sij belooft ende ghesworen heeft dat sal sij metten wercken volbringhen,

+ B

6

Maer eest dat haer vader daer tseghen seyt ter stont als hi dat ghehoort heeft, soo en sullen haer gheloften ende eeden van gheender weerden wesen, ende sij en sal die beloften niet schuldich wesen, om dat haer vader daer tseghen gheseyt heeft.

7

Eest dat sij eenen ghetrouden man heeft, ende dat sij iet belooft, ende dat het woort eens haren mont gaende haer ziele met eenen eede verbonden heeft,

8

opden dach alst haer man hoort ende daer niet tseghen en seyt, soo sal sij der beloften sculdich wesen, ⁺ende sij sal betalen al dat sij belooft heeft.

+ C

9

Maer eest dat hy ter stont als hijt hoort daer tseghen seyt, ende haer beloften van onweerden maect, ende haer woorden daer sij haer ziele mede verbonden hadde, soo sal die Heere haer ghenadich wesen.

10

Een weduwe ende een vrouwe die van haren man verstooten is, die sullen betalen wat sij ghelouen.

11

Een ghehoude vrouwe in haers mans huys als sij haer verbint met een belofte ende by eenen eede,

12

eest dat haer man dat hoort ende swijcht, ende dat hy teghen die belofte niet en seyt, soo sal sij betalen alle dat si ghelooft hadde,

13

maer eest dat hy ter stont daer tseghen seyt, soo en sal sij die belofte niet sculdich wesen, om dat haer man daer tseghen gheseyt heeft, ende die Heere sal haer genadich wesen.

14

⁺Eest sake dat sij ghelooft heeft ende haer by eede verbonden, dat sij door vasten oft abstinencie van eenighen anderen dinghen haer ziele pijnighen soude dat sal inden wille vanden man staen, oft sij dat doen sal oft niet doen,

+ D

15

maer eest dat haer man dit hoorende swijcht ende sijn meyninghe wtstelt tot des anderen daechs, al wat sij belooft ende toegheseyt hadde, dat sal sij betalen, om dat haer man sweech ter stont doen hy dat hoorde,

16

maer eest dat hy daer tseghen seyt als hy dat ghehoort heeft, soo sal hy haer boosheyt draghen.

17

Dit zijn die wetten welc die Heere Moysi ghestelt heeft tusschen man ende wijf, tusschen vader ende dochter die noch in haer ionghe iaren is, oft die noch in haers vaders huys woont.

[afbeelding]