Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺DEn iersten dach der seuenster maent, sal v lieden ooc eerweerdich, ende heylich wesen, gheen slauelijc werck en suldi op dien dach doen, want tes eenen dach des gheclancs ende der trompetten.

+ A

2

Ende ghi sult offeren heelen brantoffer den Heere tot eenen aldersuetsten rueck, een calf wt die runderen, eenen ram, ende seuen iarighe onbesmette lammeren,

3

ende tot haren sacrificien, drij thiende deelen bloemen met olie beslaghen, tot elken calue, twee thienden deelen tot eenen ram,

4

een thiende deel tot elck lam, die welck tsamen zijn seuen lammeren,

5

ende eenen bock voor die sonde, die welck gheoffert wort tot een suyueringhe des volcs,

6

sonder die heelbrantofferande van die nieuwe maenden met sijnen sacrificien, ende den eewighen brantoffer met sijnen ghewoonlijcken dranck offeranden, Met die selue ceremonien suldy oock offeren rueckwerck den Heere tot eenen aldersuetsten rueck.

7

Ende den thiende dach van deser seuenster maent, sal v lieden heylich wesen ende eerweerdich, ende ghy sult v zielen pijnighen, gheen werck van slauernie en suldi op dien dach doen,

8

Ende ghi sult den Heere heelen brantoffer tot eenen seer sueten rueck offeren, een calf wt den grooten vee, eenen ram, seuen iarighe lammeren sonder smette,

9

ende tot haren sacrificien drij thiende deelen bloeme met olie beslaghen, ⁺tot elcken calue twee thiende deelen tot eenen ram,

+ B

10

ende een thiendedeel des thiende deels tot elcken lam, welc tsamen sijn seuen lammeren

11

ende eenen bock voor die sonde, sonder tghene datmen pleech te offeren voor die versuemenisse, tot een suyueringhe ende eenen eewighen brantoffer, met haren sacrificien ende dranc offeranden.

12

Maer opden vijfthiensten dach der seuenster maent die welck v lieden sal heylich ende eerweerdich wesen, en suldi gheen slauelijc werck doen, Maer ghi sult des Heeren hoochtijt vieren seuen daghen lanc,

13

Ende ghi sult heelen brantoffer den Heere offeren tot eenen aldersuetsten rueck, derthien calueren vanden runderen, twee rammen, eeniarighe lammeren sonder smette veerthien,

14

ende tot haren dranck offeranden, drij thiende deelen bloeme, met olie beslaghen tot elcken calue, welc tsamen sijn derthien calueren ende twee thiende deelen tot eenen ram dat is tsamen twee rammen

15

ende een thiende deel van een thiende deel, tot elcken lamme, welck te samen sijn veerthien lammeren,

16

ende eenen bock voor die sonde sonder den eewighen heelen brantoffer, met sijnen sacrificie ende dranc offere.

17

⁺Opden anderen dach suldi offeren twaelf calueren vanden runderen, twee rammen veerthien eeniarighe lammeren sonder smette,

+ C

18

Ende die sacrificien, ende drancofferanden van elcken, totten calueren, ende rammen, ende lammeren suldi behoorlijck celebreren,

19

ende eenen bock voor die sonde, sonder den eewighen brantoffer, met sijn sacrificie ende drancofferande.

20

Opden derden dach suldi offeren elf calueren, twee rammen, veerthien eeniarighe onbesmette lammeren,

21

ende die sacrificien ende dranc offeranden van elcken besonder totten calueren ende rammen ende lammeren suldi behoorlijcken celebreren,

22

ende eenen bock voor die sonde sonder die eewighe brantofferande ende sijn sacri-

[p. *153]

ficie ende dranck offer.

23

Opden vierden dach suldi offeren thien calueren, twee rammen, veerthien eeniarighe ende onbesmette lammeren,

24

ende die sacrificien ende dranc offeranden van elcken besonder totten calueren ende rammen ende lammeren, suldi behoorlijcken celebreren,

25

ende eenen bock voor die sonde, sonder die eewighe brantofferande, met sijn sacrificie ende natte offerande.

26

Opden vijfsten dach suldi offeren neghen calueren, twee rammen, veerthien eeniarighe onbesmette lammeren,

27

ende die sacrificien ende dranc offeranden van elcken besonder totten calueren ende rammen ende lammeren, suldi behoorlicken celebreren,

28

ende eenen bock voor die sonde, sonder die eewighe brantofferande met sijn sacrificie ende dranc offerande.

29

⁺Opden sesten dach suldi offeren acht calueren, twee rammen, ende veerthien eeniarighe onbesmette lammeren,

+ D

30

ende die sacrificien ende dranck offeranden van elcken besonder totten calueren ende rammen ende lammeren suldi behoorlijcken celebreren,

31

ende eenen bock voor die sonde, sonder die eewighe brantofferande met haren sacrificie ende dranc offerande.

32

Opden seuensten dach suldi offeren seuen calueren, twee rammen, ende veerthien eeniarighe onbesmette lammeren,

33

ende die sacrificien ende dranc offeranden van elcken besonder, totten calueren ende rammen ende lammeren suldi behoorlijcken celebreren,

34

ende eenen bock voor die sonde sonder die eewighe brantofferande met sijn sacrificie ende dranc offerande.

35

Opden achtsten dach welc is den alder feestelijcsten, en sult ghi gheen slauelijc werc doen,

36

offerende brantofferande tot eenen aldersuetsten rueck den Heere, een calf, eenen ram, seuen eeniarighe onbesmette lammeren,

37

ende die sacrificien ende dranc offeranden van elcken besonder, totten calueren ende rammen ende lammeren suldi behoorlijcken celebreren,

38

ende eenen bock voor die sonde, sonder die eewighe brantofferande met sijn sacrificie ende dranckofferande.

39

Dit suldi den Heere offeren in v hooghe feestdaghen sonder die vrijwillighe beloften ende offeranden in die brantofferande int sacrificie, in die drancofferande, ende in die vreedofferen.