Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺ENde die Heere heeft ooc tot Moysen gheseyt.

+ A

2

Ghebiet den kinderen van Israhel, ende ghi sult tot hen segghen.Mijn offerande, ende die brooden, ende dat ruecwerc vanden aldersuetsten ruec suldy te sijnen tijden offeren.

3

Dit sijn die sacrificien die ghi offeren moet. Twee onbesmette lammerkens van

[p. *152]

eenen iare suldi alle daghe offeren, tot eenen eewighen brantoffer,

4

dat een suldi smorghens offeren, ende dander tsauonts

5

het thiende deel van een Ephi bloeme van meel, die beslaghen sij met die puerste olie, ende hebbe tvierendeel van een hin,

6

dits een eewighe heel brantofferande, welc ghi hebt gheoffert opden berch Sinai, tot eenen aldersuetsten rueck van des Heeren brantoffer.

7

Ende ghi sult dranck offer doen het vierendeel van een hin wijns, op elck lam, in die heylighe plaetse des Heeren,

8

Ende dat ander lam suldy desghelijcs offeren omtrent den auont nae alle die maniere van die morghenstont offerande, ende haer drancofferande een offerande des aldersuetsten ruecks voor den Heere.

9

⁺Maer opden sabboth dach suldi twee onbesmette lammerkens van eenen iaer offeren, ende twee thiende deelen bloemen van mele met olie beslaghen, tot een sacrificie, ende die dranc offeranden

+ B

10

die nae behoorten ghestort worden, in alle sabbathen, tot eenen eewighen heelen brantoffer.

11

Maer in die calenden, dat is in die beghinselen der maenden, soo suldy den Heere eenen heelen brantoffer offeren, twee calueren wt die runderen, eenen ram, seuen eeniarighe lammeren onbesmet

12

ende drij thiendedeelen bloeme van mele, met olie beslaghen tot een sacrificie tot elcken calue, ende twee thiendedeelen bloeme met olie beslaghen, tot elcken ram,

13

ende het thiende deel van een thiende deel bloeme wter olien tot een sacrificie op elck lam. Dit is eenen heelen brantoffer vanden aldersuetsten rueck, ende van eenen rueckoffer den Heere,

14

Maer den dranck offer des wijns welckmen tot elcke slachofferande storten moet, sullen dese sijn. Die helicht van een hin, tot elcken calue, een derden deel tot eenen ram, ende een vierendeel tot een lam. ⁺Dit sal den heelen brantoffer wesen tot elcker maent, die welcke nae malcanderen comen int ommegaen des iaers,

+ C

15

Eenen bock sal oock den Heere voor die sonde gheoffert worden tot een eewighe heel brantofferande met sijnen dranck offeren.

16

Maer in dierste maent opden verthiensten dach der maent, soo salt des Heeren phase sijn,

17

ende opden vijfthiensten dach salt hoochtijt wesen, seuen daghen lanc sullen sij onghedeesemt broot eten.

18

Waer af den iersten dach sal eerweerdich ende heylich wesen, gheen werck van slauernie en suldy op dien dach doen,

19

Ende ghi sult offeren ontsteken heelbrantofferande den Heere, twee calueren wt die runderen, eenen ram, ende seuen onbesmette lammeren van eenen iare,

20

ende die sacrificie van elcken van bloemen die met olie beslaghen is, tot elcken calue drij thiende deelen, ende twee thiende deelen tot eenen ram,

21

ende tot elcken lam het thiende deel van een thiende deel, dat is tot die seuen lammeren,

22

ende eenen bock voor die sonde, om voor v te versoenen,

23

sonder den heelen brantoffer des morghenstonts, diemen altijt offeren sal.

24

⁺Alsoo suldi doen alle die daghen, vanden seuen daghen, tot een voetsel des viers, ende tot eenen aldersuetsten rueck voor den Heere, die opgaen sal van den heelen brantoffer, ende van elcs natte offeranden,

+ D

25

Ende den seuensten dach sal v lieden wesen den alder feestelijcsten ende heylighen dach, Gheen werck der slauen en suldi op dien dach doen.

26

Ende den dach der ierster vruchten, als ghi den Heere sult nieuwe vruchten offeren, wanneer die weken sullen verloopen sijn, sal eerwaerdich ende heylich wesen, gheen slauelijc werck en suldi op dien dach doen.

27

Ende ghi sult heelen brantoffer offeren tot eenen aldersuetsten ruec den Heere twee calueren wt den runderen, eenen ram, ende seuen onbesmette lammeren van eenen iare,

28

ende tot haren sacrificien, bloeme met olie beslaghen, drij thiende deelen tot elcken calue, twee tot eenen ram,

29

ende tot elcken lam het thiende deel van een thiende deel, die tsamen sijn seuen lammeren, ende eenen bock

30

die dootgheslaghen wort voor die suyueringhe, Sonder den eewighen heelen brantoffer ende sijn dranck offeranden.

31

Dese suldy al onbesmet offeren met haren versschen offeranden.