Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺MAer daer sijn voortcomen die dochteren van Salphaad Ephers sone Galaads sone, machirs sone, Manasses sone, die welck was Iosephs sone, wiens namen waren, Maala, ende Noa ende Hegla, ende Melcha, ende Thersa.

+ A

2

Ende sij stonden voor Moyses ende Eleazar den priester ende alle die princen des volcks aen die doere van dat tabernakel des verbonts, ende sij hebben gheseyt.

3

Ons vader is in die woestijne ghestoruen, ende hy en heeft inden oploop niet gheweest die daer teghen den Heere opghestaen was onder core, maer hy is in sijn sonde ghestoruen, dese en hadde tot kinderen gheen mans persoonen, waerom sal sijnen naem dan vergaen wt sijnder familien, om dat hy gheenen sone en heeft? Gheeft ons ooc een erfbesittinghe onder ons vaders gheslachte.

4

⁺Ende Moyses heeft hen sake ouergedraghen een vonnisse des Heeren,

+ B

5

Die welcke heeft tot hem geseyt.

6

Die dochteren van Salphaad begheren een rechtueerdich dinck, gheeft hen een erfbesittinghe onder haers vaders maesschap, ende laetse in sijn plaetse comen tot sijn erfdeel,

7

Ende tot den kinderen van Israhel suldy dese dinghen segghen.

8

Als een mensch sonder sone ghestoruen is, soo sal sijn erfdeel voortgaen tot sijn dochter

9

eest sake dat hy gheen dochter en heeft, soo sal hy sijn broeders voor sijn erfghenamen hebben,

10

Ende eest sake dat hy gheen broeders en heeft, soo suldi sijn erfdeel sijns vaders broederen gheuen.

11

Maer eest sake dat hy ooc gheen ooms en heeft, soo salmen sijn erue gheuen sijnen naesten maesscap, Ende dit sal den kinderen van Israhel heylich wesen met een eewighe wet, ghelijc die Heere Moysi beuolen heeft.

12

⁺Ende die Heere heeft ooc tot Moysen gheseyt. Climt op desen berch Abarim, ende besiet van daer dlant welc ic den kinderen van Israhel gheuen sal,

+ C

13

ende als ghi dat ghesien hebben sult, soo suldi ooc tot uwen volcke gaen, ghelijc Aaron v broeder ghegaen is,

14

want ghy hebt my vertornt in die woestijne Sin, in dat wedersegghen der menichten ende ghy en hebt my niet willen heylich maken voor hen op die wateren. Dit sijn die wateren des wedersegghens tot Cades, in die woestijne Sin.

15

Ende Moyses heeft hem gheantwoort.

16

Die Heere God der gheesten van allen vleesche wil besorghen eenen man die ouer dese menichte wesen mach,

17

ende die voor hen wt ende ingaen mach, ende hen wtleyden oft inleyden, op dat des Heeren volc niet en sij ghelijck scapen sonder herder,

18

Ende die Heere heeft tot hem gheseyt. ⁺Neemt Iosue Nuns sone, den man daer Gods gheest in is, ende legghet v hant op hem.

+ D

19

Die welcke sal staen voor Eleazar den priester, ende voor alle die menichte,

20

ende ghy sult hem gheboden gheuen daert sijt alle sien, ende ghy sult hem gheuen een deel van uwer glorien, op dat hem alle die vergaderinghe der kinderen van Israhel hooren mach.

21

Eest sake datter iet voor desen te doen sal wesen, soo sal Eleazar die priester den Heere te rade ghaen, Nae sijn woort sal hy wtgaen, ende incomen, hy ende alle die kinderen van Israhel met hem, ende die ander menichte.

22

Moyses heeft ghedaen also hem die Heere beuolen hadde. Ende als hy Iosue ghehaelt hadde, soo stelde hy hem voor Eleazar den priester, ende voor alle die vergaderinghe des volcks.

23

Ende als hy sijn handen gheleyt hadde op thooft van Iosue, soo verhaelde hy alle dat die Heere beuolen hadde.