Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺ISrahel woonde op dien tijt in Setim. Ende het volck heeft oncuysheyt bedreuen met die dochteren van Moab,

+ A

2

die welcke hen gheroepen hebben tot haer sacrificien, Ende sij hebben daer af gheten ende haer goden aenbeden,

3

Ende Israhel heeft aenghenomen die afgoderie van beelphegor, ende die Heere vergramt wesende

4

heeft tot Moysen gheseyt. Neemt alle die princen des volcs ende hanctse tseghen die sonne aen galghen, ⁺op dat mijn gramscap mach van Israhel ghekeert worden,

+ B

5

Ende Moyses seyde tot die richters van Israhel. Een ieghelijc slae doot sijnen naesten die beelphegor gheoffert hebben.

6

Ende siet een man vanden kinderen van Israhel is int aenscouwen van sijnen broeders in ghegaen tot een madianijtsche ghemeyn vrouwe, daert Moyses ende alle die schare der kinderen van Israhel saghen, die daer weenden voor die doere des tabernakels,

7

⁺Dwelck als Phinees Eleazarus sone, Aaron des priesters sone ghesien hadde, soo stont hy op wt dat midden der menichten, ende nemende een dagghe,

+ C

8

is binnen ghegaen nae den Israhelijtschen man int bordeel, ende

[p. *150]

hy doerstacse alle beyde te samen, te weten den man ende die vrouwe, in die plaetsen van haren scamelheden. Ende die plaghe es opghehouden vanden kinderen van Israel,

9

ende daer sijn vierentwintich duysent mensche doot gheslaghen.

10

Ende die Heere heeft tot Moysen gheseyt,

11

Phinees die sone van Eleazarus, Aarons sone, heeft mijn gramscap afghekeert vanden kinderen van Israel, want hy es wt mijnder grammer liefden beroert gheweest teghen hen, dat ick seluer die kinderen van Israhel niet vernielen en soude, doer mijn gramme liefde.

12

⁺Daer om segt tot hem, Siet ick gheue hem den vrede van mijn verbont,

+ D

13

ende die beloefte des priesterdoms sal eewich wesen, soo wel voor hem als voor sijn saet. Want hij wt liefden gram es gheweest voor sijnen Godt, ende heeft versoent die groote boosheyt der kinderen van Israel,

14

ende den naem vanden Israhelijtschen man die daerdootghesteken was met die Madianijtsche vrouwe, was Zambri Salu sone, een hooftman van Symeons gheslachte ende afcoemste.

15

Maer die Madianijtsche vrouwe die oock mede dootghesteken was hiet Cozbi, die dochter van Sur een alderedelste prince der Madianiten.

16

Ende die Heere heeft tot Moysen ghesproken, segghende,

17

laet die Madianiten gheuoelen dat ghy haer vianden sijt, ende slaetse,

18

want sij hebben viandelijck ghedaen teghen v lieden, ende v bedroghen met listen door den afgod Phogor ende Cozbi eens princen dochter van Madian hen suster die verslaghen es op den dach der plaghen om die afgoderie van Phogor.