Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺ENde als Balaam ghesien heeft dat den Heere beliefde dat hy Israhel soude ghebenedijden, soo en is hy niet meer wechghegaen als te voren, om die waerseggherie te soecken, maer stellende sijn aensicht teghen die woestijne,

+ A

2

ende sijn ooghen opheffende heeft hy Israhel ghesien, woonende in die tenten nae haren gheslachten. Ende als den gheest Gods in hem ghecomen was,

3

soo heeft hi sijn parabel opghenomen ende gheseyt. Balaam Beors sone heeft gheseyt. Een mensch diens ooghe verstopt is heeft ghesproken,

4

ende een hoorder van Gods woorden heeft gheseyt, die ghesien heeft dat visioen vanden almachtighen, die valt ende alsoo worden sijn ooghen open ghedaen,

5

Hoe schoone sijn v tabernakelen Iacob, ende uwe tenten Israhel,

6

ghelijc die dellinghen des wouts, ghelijc boomgaerden bi die vloeden wel ghewatert, ghelijc tabernakelen welc die Heere geuesticht heeft, gelijc die cederboomen by die wateren.

7

Daer sal water van sijnen eemer vlieten, ende sijn saet sal tot veel wateren wesen, ⁺Om Agags wille sal sijnen coninc wech ghenomen worden, ende zijn rijck sal afghenomen worden,

+ B

8

Godt heeft hem wt Egypten gheleyt, wiens stercheyt is ghelijc die stercheyt vanden eenhorn. Die heydenen sullen zijn vianden verslinden, Ende sij sullen haer beenderen breken, ende die met scichten doorschieten.

9

Nederligghende heeft hy gheslapen als eenen leeuwe, ende ghelijc een leeuwinne welc niemant en sal dorren wecken. Soo wie v ghebenedijt die sal ooc ghebenedijt wesen, ende die v vermalendijt, dien sal dat tot eender maledictien gherekent worden,

10

Ende Balac ghestoort sijnde teghen Balaam heeft met tsamen gheslaghen handen gheseyt. Ick heb v gheroepen om mijn vianden te vermalendijden, die welcke ghy nv ter contrarie drijmael ghebenedijt hebt,

11

gaet wederom tot uwe stede Ick hadde waerlijck voor my ghenomen dat ick v grootelijck soude eeren, maer die Heere heeft v berooft van die eere die v toe ghescict was,

12

Ende Balaam heeft tot Balac gheantwoort. ⁺En heb ic uwen boden die ghi tot my sandt niet gheseyt,

+ C

13

al gaue my Balac zijn huys vol gouts ende siluers, soo en sal ic niet moghen achterlaten dat woort van mijnen Heere Godt, alsoo dat ic iet goets oft quaets soude moghen spreken wt mijn herte, maer wat die Heere seggen sal dat sal ic spreken?

14

Maer nochtans ic gaende tot mijnen volcke sal raet gheuen, wat v volck desen volc doen sal ten laetsten tijde,

15

Hierom sijn parabele opnemende heeft hy wederom gheseyt. Balaam Beors sone heeft gheseyt, een mensch wiens ooghe verstopt is, heeft ghesproken,

16

ende een hoorder van Gods woorden heeft gheseyt, die wel weet die leeringhe des alderhoochsten ende die des almachtighen visioenen siet, die vallende heeft open ooghen.

17

⁺Ick sal hem sien, maer nv niet. Ick sal hem aenscouwen, maer niet by Daer sal een sterre opgaen wt Iacob ende, een roede oprijsen van Israhel, ende die sal verslaen die hooftmannen van Moab, ende verwoesten alle die kinderen van Seth,

+ D

18

Ende dlant van Edom, sal zijn besittinghe wesen, ende die erffelijcheyt van Seir, sal haren vianden toecomen, Maer Israhel sal vromelijck doen,

19

Van Iacob sal een wesen die heerscappie hebben sal, ende vernielen die bleuelinghen der stadt.

20

Ende als hy Amalec ghesien hadde soo heeft hy sijn parabele opghenomen ende gheseyt. Tbeghinsel der heydenen is Amalec wiens wterste sullen vernielt worden.

21

Ende hy heeft ooc ghesien die Cineen, ende opnemende sijn parabele heeft hy gheseyt. V wooninghe is waerlijck sterck, maer al steldet ghy uwen nest in die steenrootse,

22

ende al waerdy ghecoren van Bins gheslachte, hoe langhe suldi moghen blijuen? Want Assur sal v vanghen,

23

Ende opnemende die parabel heeft hy wederom ghesproken. Ay wie sal dan leuen als Godt dese dinghen doen sal?

24

Sij sullen in groote scepen comen van Italien, sij sullen die assirien verwinnen, ende die hebreeussche verderuen, ende ten lesten sullen sij oock vergaen,

25

Ende Balaam is opghestaen, ende wederghegaen tot sijnder steden, ende Balac is ooc wederghekeert door den wech die hy comen was.