Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde Balaam heeft tot Balac gheseyt. Maect mi hier seuen outaren, ende bereyt soo veel calueren, ende oock alsoo veel rammen,

+ A

2

Ende als hy nae Balaams woorden ghedaen hadde, soo hebben sij tsamen een calf ende eenen ram op eenen outaer gheleyt.

3

Ende Balaam heeft gheseyt tot Balac. Staet luttel tijts by uwen brantoffer, tot dat ick wech ghegaen ben, oft die Heere by auontueren my te ghemoete quame, ende al dat hy mi ghebieden sal, dat sal ick v segghen.

4

Ende als hi haestelick wech ghegaen was, soo is hem Godt te ghemoete ghecomen, Ende Balaam heeft tot hem ghesproken. Ick heb (seyt hy) seuen outaren opghericht, ende heb daer op een calf ende eenen ram gheleyt.

5

Ende die Heere heeft het woort in sijnen mont ghestelt, ende heeft gheseyt. Gaet wederomme tot Balac ende ghi sult hem dese dinghen segghen.

6

Ende als hy wedercomen was soo vant hi Balac staende by sijnen brantoffer, ende alle die princen der Moabiters

7

Ende sijn ghelijckenisse opnemende seyde hy. Van Aran heeft mi ghebracht Balac die coninc der Moabiten van die berghen van oosten, Coemt (seyde hy) ende vermalendijt Iacob, haest v ende veruloect Israhel.

8

⁺Hoe sal ick hem vermalendijden, den welcken God niet vermalendijt en heeft? Ende met wat redenen sal ic dien veruloecken, den welcken die heere niet en veruloect

+ B

9

Van op die hoochste steenrootsen sal ic hem sien, ende van die op hoeuelen sal ick hem aenmercken, Dit volck sal alleen woonen, ende ten sal onder die heydenen niet gherekent worden.

10

Wie soude conneu tellen het ghestubbe van Iacob, ende weten dat ghetal van Iacobs gheslachte? Mijn ziele sterue die doot vanden rechtuerdighen, ende mijn wtersten moet worden ghelijck die wtersten van desen.

11

Ende Balac seyde tot Balaam. Wat is dit dat ghi doet? Ick heb v doen halen om dat ghi mijn vianden soudt vemalendijden, ende ghi ter contrarie ghebenedijtse,

12

Totten welcken hy heeft gheantwoort. Mack ick iet anders spreken dan die Heere gheboden heeft?

13

Hierom heeft Balac gheseyt. Coemt met my op een ander plaetse, van daer ghy een deel van Israhel sult sien, ende niet heel en sult connen sien, van daer vermalendijt hen,

14

Ende als hy hem gheleyt hadde op een hooge plaetse op dat opperste vanden berch Phasga, soo heeft Balaam seuen outaren ghetimmert, ⁺ende als hy daer op calueren ende rammen gheleyt hadde,

+ C

15

soo heeft hi tot Balac gheseyt. Staet hier by uwen brantoffer, tot dat ick gae te ghemoete.

16

Ende als die Heere hem te ghemoete comen was, ende dwoort in sijnen mont ghestelt hadde, soo seyde hy. Keert weder tot Balac, ende ghi sult hem dit segghen,

17

Ende als hy wedercomen was, soo vont hy Balac staende by sijnen brantoffer, ende die princen der Moabiten by hem, Totten welcken Balac. Wat heeft (seyt hi) die Heere ghesproken?

18

Maer hi zijn parabele opnemende heeft gheseyt. Staet Balac ende luystert, hoort ghi Sephors sone.

19

Godt en is niet ghe-

[p. *149]

lijck een mensch dat hy lieghen mach, noch ooc niet als eens menschen sone, dat hy verandert mach worden, Hy heuet gheseyt, en sal hijs niet doen? hy heuet ghesproken, en sal hijs niet volbringhen?

20

Ick ben hier ghebracht om te ghebenedijden. Ick en can die benedictie niet beletten.

21

Daer en is gheenen afgod in Iacob, noch gheen ghelijckenisse en sietmen in Israhel, Maer die Heere zijn Godt is met hem, ende dat gheclanck van des conincs victorie is in hem,

22

Godt heeft hem gheleyt wt Egypten, wiens stercheyt is ghelijc die stercheyt vanden eenhoren,

23

⁺Daer en is gheen waerseggherie in Iacob, noch gheen wichelie in Israhel. Te sijnen tijden salmen segghen, Iacob ende Israhel wat Godt ghewracht heeft.

+ D

24

Siet dit volck sal opstaen als een leeuwinne, ende het sal hem oprechten als eenen leeuwe, ten sal niet gaen ligghen ter rusten, voor dat eenen roof verslint heeft, ende tot dat der ghedooden bloet ghedroncken heeft,

25

Ende Balac heeft tot Balaam gheseyt. En wiltse noch vermalendijden noch ghebenedijden,

26

Ende hy heeft gheseyt. En hebbe ick v niet gheseyt dat ic doen soude al dat mi die Heere ghebieden soude?

27

Ende Balac seyde tot hem. Coemt ick sal v leyden tot een ander plaetse oft den Heere bi auontueren beliefde dat ghi hen van daer soudt vermalendijden.

28

Ende als hy hem gheleydt hadde op den tsop vanden berch Phogor, die daer is tseghen ouer die woestijne,

29

soo heeft Balaam tot hem gheseyt. Maect my hier seuen outaren, ende bereyt soo veel calueren ende oock soo veel rammen,

30

Ende Balac heeft ghedaen alsoo Balaam gheseyt hadde ende hy heeft calueren ende rammen gheleyt op elcken outaer.