Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde sij sijn voorts ghetrocken ende hebben haren leger ghemaect op dat plat lant van Moab, waer ouer die iordane Ihericho gelegt is.

+ A

2

Maer Balac Sephors sone siende alle dat Israhel den Amorrheen ghedaen hadde,

3

ende hoe dat die Moabiten van hen veruaert waren gheweest, ende dat sij hen ghewelt niet en souden connen verdraghen

4

soo heeft hy gheseyt tot die ouders van Madian. Dit volck salse alle vernielen die in onse palen woonen, ghelijck eenen osse pleech die cruyden tot die wortelen af te weyden, Ende hy was te dier tijt die coninc van Moab.

5

Daerom heeft hy boden ghesonden aen Balaam Beors sone den waersegghere, die daer woonde by den vloet vander Moabiten lant, dat sij hem roepen souden, ende hem segghen. ⁺Siet daer is een volck wt Egypten comen, dwelc alle douerste vander aerden bedect heeft, sittende tseghen mi.

+ B

6

Daerom coemt ende vermalendijt dit volck, want het is stercker dan ick ben, oft ickse eenichsins slaen mocht, ende wt mijnen lande verdrijuen, Want ick weet wel dat hy ghebenedyt is, dien ghy benedijt, ende vermalendijt daer ghy maledictien tsamen toedraecht.

7

Ende die ouders van Moab ende die meest beiaerde der Madianiters sijn ghereyst hebbende den loon vanden waerseggherien, in haer handen. Ende als sij tot Balaam comen waren ende hem vertelt hadden alle die woorden van Balac,

8

soo heeft hy gheantwoort. Blijft hier desen nacht ende ick sal antwoorden soo wat my die Heere segghen sal. Ende die wijle dat si by Balaam bleuen, soo is Godt ghecomen, ende heeft tot hem gheseyt.

9

Wat willen dese luyden hebben by v?

10

Ende hy heeft gheantwoort. Balac Sephors sone der Moabiten coninck heeft aen my ghesonden,

11

segghende. ⁺Siet tvolck dwelc wt Egypten comen is heeft al dat ouerste des lants bedect, coemt ende vermalendijt dat, oft ick eenichsins strijdende dat mocht verdrijuen,

+ C

12

Ende Godt heeft tot Balaam gheseyt. En wilt met hen niet gaen, noch en vermalendijt dit volck niet, want het is ghebenedijt,

13

Ende hy des morghens vroech opstaende heeft tot die princen gheseyt. Gaet wech nae v lant, want die Heere heeft mi verboden met v te gaen.

14

Ende als die princen wedercomen waren, soo hebben sij tot Balac gheseyt. Balaam en heeft niet willen met ons comen.

15

Ende hy heeft wederom ghesonden veel meer ende edelder dan hy te voren ghesonden hadde.

16

Ende als dese by Balaam comen waren, soo seyden sij. Aldus seyt Balac Sephors sone. En wilt niet vertrecken tot my te comen,

17

Ick ben bereet v eere te bewijsen, ende wat ghy wilt, dat sal ick v gheuen, ⁺coemt ende vermalendijt dit volck.

+ D

18

Balaam heeft gheantwoort. Al gaue my Balac sijn huys vol gouts ende siluers, soo en sal ick niet moghen verande-

[p. *148]

ren, dat woort vanden Heere mijnen Godt, alsoo dat ick iet meer oft min spreken soude,

19

Ick bidde v dat ghy hier oock blijft desen nacht, op dat ic mach weten wat my die Heere wederom antwoorden sal.

20

Aldus soo is Godt des nachts tot Balaam comen, ende heeft hem gheseyt. Eest sake dat dese menschen v comen roepen, soo staet op ende gaet met hemlieden alsoo nochtans dat ghi soen sult tghene dat ick v beuelen sal.

21

Balaam is des morghens vroech opghestaen, ende als sy zijn eselinne ghesadelt hadde, soo is hi met hemlieden ghereyst,

22

Ende Godt is gram gheworden, Ende die Enghel des Heeren stont inden wech tseghen Balaam die op een eselinne sadt, ende hy hadde twee knechten met hem.

23

⁺Ende die eselinne siende den Enghel staen inden wech met een bloot swaert, soo keerde sij haer wt den wech, ende ghinc doort velt. Ende als Balaam die sloech ende wilde die wederom opden wech brenghen,

+ E

24

soe stont die Enghel in die benautheden van twee mueren, waer mede die wijngaerden beheymt waren,

25

den welcken die eselinne siende, heeft haer ghedronghen teghen den muer, ende quetste sijnen voet die op haer sadt, Ende hi sloechse,

26

ende niet te min die Engel voorts gaende tot op een enghe plaetse, daermen noch ter rechter noch ter slincker sijden en mocht wten wech gaen, heeft in haer ghemoet ghestaen.

27

Ende als die eselinne sach den Enghel staende, soo is sij gheuallen onder sijn voeten die op haer sadt, Die welcke gram sijnde, sloechse noch crachtelijcker met eenen stock op haer sijden.

28

Ende die Heere heeft den muyl vander eselinnen open ghedaen, ende sij heeft ghesproken. Wat heb ick v ghedaen? Waerom slaedi my, siet, nv tot die derde reyse?

29

⁺Ende Balaam antwoorde. Om dat ghi dit welverdient hebt, ende dat ghy met my ghespot hebt. Och oft ic een swaert hadde dat ic v mocht slaen,

+ F

30

Ende die eselinne heeft gheseyt. En ben ick niet v dier, daer ghi altoos pleecht op te sitten tot op desen dach toe? Segt wanneer dat ic v iet desghelijcs ghedaen hebbe, Ende hy seyde? Noyt.

31

Ende ter stont heeft die Heere Balaams ooghen open ghedaen, ende hi heeft den Enghel ghesien, staende inden wech met eenen blooten swaerde, ende hy aenbadt hem plat neder op daerde,

32

Den welcken die Enghel seyde. Waerom slaedi v eselinne die derde reyse? Ic ben comen, om dat ic v wederstaen soude, want uwen wech is verkeert, ende teghen my,

33

ende en hadde die eselinne niet gheweken vanden wech, gheuende mi plaetse als ick haer teghen stont, ick soude v doot gheslaghen hebben, ende sij soude leuen,

34

Balaam seyde. Ick heb ghesondicht, niet wetende dat ghi teghen mi stont, ende siet nv eest sake dat v misnoecht dat ick gae, soo sal ick wederomme keeren,

35

Ende die Enghel heeft gheseyt. Gaet met dese luyden, ende wacht v dat ghy anders niet en spreect dan ick v beuelen sal. Hierom soo is hy met die princen ghegaen,

36

⁺Ende als Balac dat ghehoort hadde, soo is hi wtghegaen hem te ghemoete, in een stadt der Moabiters die gheleghen is in die wterste palen van Arnon.

+ G

37

Ende hi heeft tot Balaam gheseyt. Ick heb boden ghesonden dast sij v roepen souden, waerom en quaemdy ter stont tot my niet? Meyndy dat ick niet en soude loon moghen gheuen voor v coemste?

38

Ende hi heeft tot hem gheantwoort. Siet ick ben hier sal ick iet anders moghen segghen, dan dat Godt my in mijnen mont stellen sal?

39

Hierom zijn sij beyde tsamen ghereyst, ende ghecomen in een stadt die welck gheleghen is in die wterste palen van sijnen rijcke,

40

Ende als Balac ossen ende scapen dootgheslaghen hadde, soo heeft hy ghesonden aen Balaam ende aen die princen die met hem waren ghiften.

41

Maer des smorghens vroech, soo heeft hy hem gheleyt tot die hoochden van Baal, ende heeft aensien dat wterste deel des volcs.