Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺DWelck als ghehoort hadde die Chananeus coninck van Arad die aent suyden woonde te weten dat Israhel comen was door den wech der bespieders, soo heeft hi teghens hemlieden ghestreden, ende die ouerhant crijghende, heeft hy van hen eenen roof ghebracht.

+ A

2

Maer Israhel heeft hem met een belofte aen den Heere verbonden, segghende. Eest sake dat ghy dit volck leuert in mijn handen, soo sal ick haer steden te niete doen,

3

Ende die Heere heeft dat ghebet van Israhel verhoort ende hi heeft dat Chananeus volc gheleuert, die welcke sij verslaghen hebben, ende haer steden bedoruen, ende hy heeft die plaetse ghenoemt Horma dat is te segghen, een veruloeckinghe.

4

Ende sij sijn voorts ghereyst vanden berch Hor, door den wech die daer gaet nae die roode zee, dat sij het lant van Edom ommegaen souden, ⁺Ende het begonste den volck te verdrieten van den wech ende den arbeyt

+ B

5

ende sij hebben tseghen den Heere ende tseghen Moysen ghesproken, segghende. Waerom hebdi ons wt Egypten gheleyt dat wi in die woestijne souden steruen? Hier ghebreect broot, hier en is gheen water, onse ziele walcht van dese alderlichste spijse,

6

Ende daerom heeft die Heere onder tvolc vierighe serpenten gesonden, om welcker plaghen ende veel lieder doot,

7

quamen si tot Moysen ende seyden. Wi hebben ghesondicht dat wi teghen den Heere ghesproken hebben ende tseghen v, bidt dat hi die serpenten van ons neme, Ende Moyses heeft voor tvolck ghebeden,

8

ende die Heere heeft tot hem gheseyt. Maect een metalen serpent, ende stelt dat voor een teeken, soe wie gheslaghen dat aensiet, die sal leuen,

9

Hierom heeft Moyses een metalen serpent ghemaect, ende heeft dat voor een teeken ghestelt, ⁺ende als die gheslaghen dat aensaghen, worden sij ghenesen.

+ C

10

Ende die kinderen van Israhel voorts ghereyst sijn-

[p. *147]

de hebben haren legher gheslaghen te Oboth,

11

Ende van daer ghegaen sijnde, hebben sij haer tenten gheslaghen te Ieabarim in die woestijne, welck is teghen ouer Moab teghen die oostsijde.

12

Ende van daer treckende sijn sij ghecomen totter beken Zared.

13

Ende die ooc verlatende hebben sij haren legher ghemaect teghen ouer Arnon, welck is in die woestijne, ende steect hem hooghe wt tot die palen vanden Amorrheen, Want Arnon is die pale van Moab, sceydende die Moabiten ende die Amorrheen,

14

waer af datmen seyt int boeck van des Heeren strijden, ⁺Ghelijck hy ghedaen heeft in die roode zee, soo sal hi oock doen in die beken van Arnon,

+ D

15

die hooghe steenrootsen der beken sijn nedergheboocht dat sij in arnon rusten souden, ende nederligghen in die palen der Moabiten.

16

Ende van dier plaetsen sachmen den put, daer af dat die Heere tot Moysen ghesproken hadde. Vergadert dat volck ende ick sal hen water gheuen.

17

Doen sanck Israhel dit liedeken. Laet opcomen den put, Ende sij songhen.

18

Den put welck die princen hebben ghegrauen, ende den welcken die hooftlieden der menichten bereyt hebben in den gheuere der wet ende met haren stocken. Ende sij sijn ghereyst wter woestijnen van Mathana,

19

van Mathana tot Nahaliel, van Nahaliel tot Bamoth,

20

Bamoth is een dal int lant van Moab opt hoochste van Phasga, welck is teghen ouer die woestijne.

21

⁺Ende Israhel heeft boden ghesonden aen Sehon den coninck vanden Amorrheen, segghende.

+ E

22

Ick bidde dat mi gheorloft sij te passeren door v lant, wi en sullen niet besiden afgaen in die velden ende wijngaerden, wij en sullen gheen water wten putten drincken, door die heyrbane sullen wi gaen, tot dat wi door v palen ghepasseert sijn.

23

Maer hy en wildet niet toelaten dat Israhel door zijn palen passeren soude, maer dat meer is, hy heeft een heyr vergadert, ende is hen te gemoete ghegaen in die woestijne, ende is comen te Iasa, ende heeft aldaer tseghen Israhel ghestreden,

24

van die welcken hy metten scerpten vanden swaerde verslaghen is ende sijn lant is beseten van Arnon to Ieboc toe, ende tot die kinderen van Ammon, Want die palen der kinderen van Ammon waren met seer stercke hoede bewaert.

25

Aldus heeft Israhel alle zijn steden inghenomen, ende heeft ghewoont in die steden vanden Amorrheen te weten, ⁺in Hesebon ende in haer dorpkens.

+ F

26

Die stadt van Hesebon behoorde Sehon der Amorrheen coninck toe, die welcke heeft ghestreden teghen den coninck van Moab, ende heeft inghenomen alle dlant welck sijnder heerlicheyt toebehoort hadde, tot Arnon toe,

27

ende daerom seytmen int ghemeyn woort, Coemt te Hesebon, ende laet timmeren ende oprechten die stadt Sehon,

28

Een vier is comen wt Hesebon, een vlamme wter stadt Sehon, ende heeft verslonden der Moabiten stadt, ende die inwoonders der hoochden van Arnon.

29

Wee v Moab ghy volc van Chamos sijt verloren ghegaen, Hy heeft haer sonen ghegheuen ter vlucht, ende haer dochteren der gheuanckenissen Sehon den coninck vanden Amorrheen,

30

Hen ioc is vernielt van Hesebon tot Dibon toe die vermoedt sijn comen tot Nophe, ende tot Medaba.

31

⁺Aldus heeft Israhel ghewoont int lant vanden Amorrheen,

+ G

32

Ende Moyses heeft wtghesonden sommighe die Iaser bespieden souden, wiens dorpen sij inghenomen hebben, ende hebben die inwoonders beseten.

33

Ende sij hebben hen ghekeert ende sijn opghetrocken door den wech van Basan, ende die coninck van Basan is hen te ghemoete ghecomen met alle sijnen volcke, om te strijden in Edrai,

34

Ende die Heere heeft tot Moysen gheseyt. En vreest hem niet, want ick heb hem in v hant gheleuert, ende alle sijn volc, ende sijn lant, ende ghy sult hem doen ghelijck ghy ghedaen hebt Sehon den coninc vanden Amorrheen die tot Hesebon woonde.

35

Hierom soo hebben sij desen ooc verslaghen met sijnen kinderen, ende alle sijn volck alsoo datter niet een ouer en bleef, ende sij hebben sijn lant beseten.