Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺ENde die kinderen van Israhel, ende alle die menichte sijn ghecomen in die woestijne sin, op dierste maent, ende het volc is in Cades bleuen Ende Maria is daer ghestoruen, ende op die selue plaetse begrauen.

+ A

2

Ende als het volck waters ghebreck hadde, soo sijn sij tsamen vergadert tseghen Moysen ende Aaron

3

ende ghekeert tot eenen oploop, hebben si gheseyt. Och oft wi ghestoruen waren onder ons broeders voor den Heere.

4

Waerom hebdi die vergaderinghe des Heeren wt gheleyt in die woestijne, dat wi ende onse beesten souden steruen?

5

Waerom hebdi ons doen wt Egypten optrecken, ende hebt ons bracht in dese alderquaetste plaetse, diemen niet en mach besaeyen, die welcke gheen vijchboomen voorts en brengt, noch wijngaerden, noch granaet appelen, ende daer toe oock gheen water en heeft om te drincken?

6

Ende Moyses ende Aaron latende die menichte sijn ghegaen in dat tabernakel des verbonts, ende plat neder ter eerden gheuallen, ende hebben tot den Heere gheroepen ende gheseyt. Heere Godt hoort dit gheroep van desen volcke, ende wilt hen uwen scat ontsluyten die fonteyn des leuende waters, ⁺op dat (als sij versaet

+ B

[p. *146]

sijn) hen murmuratie ophoude, Ende die glorie des Heeren heeft gheopenbaert bouen hen,

7

Ende die Heere heeft tot Moysen ghesproken, segghende.

8

Neemt v roede ende vergadert dat volck, ghy ende Aaron v broeder, Ende spreect in hen teghenwoordicheyt tot den steen ende die sal water gheuen, Ende als ghi water wten steen sult hebben ghebracht, soo sal alle die menichte drincken ende hen beesten.

9

Aldus soo heeft Moyses die roede ghenomen, die voor dat aenschijn des Heeren was, ghelijc hy hem beuolen hadde,

10

ende als hy alle die menichte voor den steen vergadert hadde, heeft hi tot hemlieden gheseyt, Hoort ghi wederspannighe ende ongheloouighe. Sullen wij voor v lieden wt desen steen water moghen doen comen,

11

Ende als Moyses sijn hant hadde opghehauen tweemael slaende den steen metter roeden, sijn daer ouervloedighe wateren wt comen, alsoo dat het volc dranc, ende ooc die beesten,

12

Ende die Heere heeft gheseyt tot Moysen ende Aaron, Want ghy mi niet en hebt ghelooft, om mi heylich te maken voor die kinderen van Israhel, daerom en suldi dit volck niet brenghen in dat lant, welck ick hemlieden gheuen sal,

13

Dit is dat water des wedersegghens, daer die kinderen van Israhel ghekeuen hebben, teghen den Heere, ende hy worde in henlieden gheheylicht.

14

⁺Hier en binnen soo heeft Moyses van Cades boden ghesonden aen den coninck van Edom, die welcke segghen souden. Dit ontbiedt v broeder Israhel. V is wel bekent alle den arbeyt die ons beuanghen heeft,

+ C

15

hoe dat ons vaders neder ghedaelt sijn in Egypten, ende hoe dat wij daer langhen tijt ghewoont hebben, ende dat die Egyptenaers ons hebben ghepijnicht ende onse vaders,

16

ende hoe dat wi tot den Heere hebben gheroepen ende hoe hi ons verhoort heeft, ende heeft sijnen Enghel ghesonden, die ons wt Egypten gheleyt heeft, siet wij sijnde nv te Cades in die stadt, welck gheleghen is opt wterste van uwen palen,

17

bidden v hertelijc dat ons gheorloft worde te gaen door v lant, Wij en sullen door die velden oft wijngaerden niet gaen, wij en sullen oock gheen water drincken wt uwen putten, maer wij sullen door die ghemeyn heyrbane gaen, ter rechter noch ter slincker sijden afgaende, tot dat wi door v palen ghepasseert sullen wesen,

18

Ende Edom heeft hen gheantwoort. Ghy en sult door mijn landt niet passeren, oft anders sal ick v ghewapent teghen comen,

19

Ende die kinderen van Israhel hebben gheseyt. Wij sullen ouer den ghebaenden wech gaen ende eest sake dat wi ende ons beesten van uwen water drincken, soo sullen wi gheuen dat recht is, daer en sal gheen swaericheyt sijn aen die betalinghe vanden prijs, alleenlijck laet ons snellijck passeren,

20

Maer hy heeft gheantwoort, ghy en sult niet passeren. Ende ter stont is hi te ghemoete wt ghetrocken met een ontellike menichte ende een machtighe hant,

21

ende hy en wilde die biddende niet verhooren, dat hy hen soude orlof gheuen om door sijn palen te passeren, Ende daerom soo is Israhel van hem afghekeert.

22

⁺Ende als sij haren legher opghetrocken hadden van Cades soo zijn sij ghecomen opden berch Hor, die daer is in die palen van Edom,

+ D

23

daer heeft die Heere tot Moysen ghesproken.

24

Laet (seyde hi) Aaron reysen tot sijnen volcke, Want hi en sal int lant niet comen dwelck ick den kinderen van Israhel ghegheuen hebbe, om dat hy mijnen mont niet ghelooft en heeft, aen die wateren des wedersegghens.

25

Neemt Aaron ende sijnen sone met hem, ende ghi sultse leyden opden berch Hor,

26

ende als ghi den vader sult van sijn cleet ghebloot hebben, soo suldi Eleazarus sijnen sone daer mede cleeden, ende Aaron sal versaemt worden ende daer steruen,

27

Moyses heeft ghedaen alsoo die Heere gheboden hadde, ende sij sijn opgheclommen opden berch Hor, voor alle die menichte.

28

Ende als hi Aaron berooft hadde van sijnen cleederen, soo heeft hi daer mede ghecleet Eleazarus sijnen sone,

29

Ende als Aaron ghestoruen was op dat hoochste vanden berghe, soo is hi met Eleazarus nedercomen,

30

Ende alle die menichte siende dat Aaron ghestoruen was, hebben sij ouer hem gheweent dertich daghen lanck, by allen haren familien.

[afbeelding]