Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde die Heere heeft ghesproken tot Moysen ende Aaron, segghende.

+ A

2

Dit is den Godsdienst van eender slachofferanden, welck die Heere op ghestelt heeft.

Ghebiedt den kinderen van Israhel dat sij v brenghen een roode koe van volcomen ouderdom, daer gheen smette aen en sij, ende die gheen iock ghedraghen en heeft,

3

ende ghy sult die Eleasarus den priester gheuen, ende die salse wten legher leyden ende aldaer dootslaen in alle des volcs aenscouwen,

4

ende sijnen vingher doppende in haer bloet sal bespraeyen daer mede seuenwerf teghen die doere des tabernakels,

5

ende hy sal die verbranden daer sijt alle sien sullen, worpende in die vlamme soo wel haer vel metten vleesche, als dbloet van die metten meste,

6

Ende die priester sal oock cederen hout, ende hijsope met eenen rooden draet twee mael gheuerwet in die vlamme worpen, daer die coe in verbrant wort,

7

Ende als hi daer nae sijn cleederen ende sijn lichaem sal ghewasschen hebben, soo sal hy inden leger comen, ⁺ende sal besmet wesen tot den auont toe

+ B

8

desghelijcs die dese coe ooc verbrant heeft sal sijn cleederen ende sijn lichaem ooc wasschen ende onsuyuer wesen totten auont toe:

9

Maer een man die suyuer is sal die asscen vander coe vergaderen, ende sal die wtstorten op een seer suyuer plaetse buyten den legher, dat die den kinderen van Israhel moghen wesen tot een bewaringhe, ende tot water der bespraeinghen, want die coe is voor die sonde verbrant,

10

Ende als hy sijn cleederen sal ghewasschen hebben die dasschen vander coe ghedraghen heeft, soo sal hi onsuyuer wesen totten auont toe. Dit sullen hebben die kinderen van Israhel ende die vreemdelinghen die onder hen woonen voor heylich met een eewich recht,

11

Soo wie ghenaect heeft een doot lichaem van eenen mensch ende dat hy daer om seuen daghen lanc is onsuyuer gheweest,

12

die sal met desen water bespraeyt worden opden derden ende den seuensten dach, ende alsoo sal hy ghesuyuert worden, maer eest sake dat hy opden derden dach niet bespraeyt en is, ⁺soo en sal hy opden seuensten dach niet moghen ghesuyuert worden.

+ C

13

So wie genaect een doot lichaem van eens menschen ziele ende niet en wordt bespraeyt, met desen mincsel, die sal dat tabernakel des Heeren besmetten, ende hy sal wt Israhel vergaen, om dat hy niet en is bespraeyt met dat water der suyueringhen, hy sal onsuyuer wesen, ende sijn onsuyuerheyt sal op hem blijuen.

14

Dit is die wet van eenen mensch die int tabaernakel sterft, Alle die in sijn tente gaen, ende alle datmen besighet, dat daer binnen is, sullen besmet wesen seuen daghen lanck,

15

Een vat dat gheen decsel oft gheen ouerbintsel en heeft dat sal onsuyuer wesen.

16

Eest dat iemant opt velt ghenaect een doot lichaem van eenen mensche die verslaghen oft van selfs ghestoruen is, oft ooc iet van sijnen ghebeente, oft zijn graf, die sal seuen daghen lanck onreyn wesen,

17

Ende sij sullen nemen van die asschen des brants, ende der sonden, ende sullen daer op leuende water ghieten in een vaetken,

18

in die welcke als een suyuer mensch sal hijsope ghedoopt hebben, ⁺sal hy daer mede bespraeyen alle die tente, ende alle den huysraet, ende alle die menschen die met deser onsuyuerheyt besmet sijn,

+ D

19

ende met sulcker manieren sal een suyuer mensch eenen onsuyueren suyuer maken, opden derden ende seuensten dach, ende als hi aldus ghesuyuert is opden seuensten dach soo sal hy hem seluen ende sijn cleederen wasschen ende onsuyyer wesen tot den auont toe,

20

Eest sake dat iemant met dese maniere niet ghesuyuert en wort, diens ziele sal vergaen wt dat midden der vergaderinghen, om dat hi die heylighe plaetse des Heeren besmet heeft, ende want hi niet en is bespraeyt met dat water der suyueringen

21

dit sal een eewich wettelijc ghebodt wesen, Ende die dit water spraeyt, sal sijn cleederen ooc wasschen, Alle die het water der suyueringhen ghenaect, die sal onsuyuer wesen tot den auont toe,

22

wat die onsuyuere ghenaect dat sal hy onsuyuer maken, ende een ziele die yet van desen dinghen ghenaket, sal onsuyuer zijn tot den auont toe.