Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺MAer siet Core Isaars sone, die Caaths sone was, een sone van Leui, ende Dathan ende Abiron Eliabs sonen, ende Hon Phelets sone, van Rubens kinderen

+ A

2

sijn opghestaen tseghen Moysen, ende noch tweehondert, ende vijftich andere mannen wt die kinderen van Israhel, ouerste der synagogen ende die ten tijde van rade by namen gheroepen worden,

3

ende als sij ghestaen waren teghen Moysen ende Aaron, so hebben sij geseyt, Latet v ghenoech wesen

[p. *143]

dat alle die vergaderinghe der heylighen is, ende dat die Heere in hemlieden is, waer om verheft ghy v ouer dat volck des Heeren?

4

Dwelck als Moyses ghehoort hadde, so is hy plat neder op sijn aensicht gheuallen,

5

ende sprekende tot Core ende tot alle die menichte Morghenvroech (seyde hy) sal die Heere kenlijc maken wie dat hem toebehooren, ende die heylighe sal hy by hem brenghen, ende die hy verkiezen sal, die sullen by hem comen.

6

Daer om doet dit, Een yeghelijck neem sijn wieroockvat, ghy Chore ende allen uwen raet,

7

ende morghen soo neemt vier ende legghet daer op ruecwerck voor den Heere, ende soo wien dat die Heere verkiest, die sal heylich wesen. Ghy verheft v seer hoochlijck ghy kinderen van Leui.

8

Ende hy heeft wederom tot Chore gheseyt, ⁺Hoort ghy kinderen van Leui,

+ B

9

Eest v luttel dat Godt van Israhel v wtghesceyden heeft van allen den volcke, ende heeft v tot sij seluen gheuoecht, dat ghy hem dienen soudt in den dienst des tabernakels, ende dat ghy staen soudt voor die vergaderinghe des volcs, ende hem dienen?

10

Heeft hy v ende allen uwe broeders kinderen van Leui, daerom doen tot hem comen, dat ghy ooc soudt het priesterscap voor v aenueerden,

11

ende dat allen uwen hoop teghen den Heere staen soude? Want wie is Aaron dat ghy teghen hem murmureert?

12

Daerom heeft Moyses ghesonden om te roepen Dathan ende Abiron die kinderen van Eliab, Die welcke hebben gheantwoordt, Wij en comen niet.

13

Is v dit luttel dat ghi ons gheleydt hebt wt dat lant welck vloeydde van melck ende honich, dat ghy ons dooden soudt in die woestijne, ten sij dat ghy oock heerschappie hebbet ouer ons?

14

⁺Hebt ghy ons warachtelijc bracht in dat lant welck vloet met vloeden van melck ende honich, ende ons besittinghen van ackers ende wijngaerden ghegheuen? Wildi ooc ons ooghen wt trecken? Wij en comen niet.

+ C

15

Ende Moyses seer gram wesende heeft tot den Heere geseyt, En wilt haer sacrificien niet aensien, want ghy weet wel dat ic noyt eselken van henlieden ghenomen en hebbe, noch oyt yemant ghepijnicht van hemlieden.

16

Ende hy heeft tot Chore gheseyt, Ghy ende alle uwe vergaderinge staet op besonder voor den Heere, ende Aaron morghen op een besonder stede,

17

Neemt elck sijn wieroockvaten, Ende legghet daer ruecwerc op, offerende den Heere tweehondert ende vijftich wieroockvaten. Ende Aaron sal ooc sijn wieroockvat houden.

18

Ende als sij dit ghedaen hadden, als Moyses ende Aaron stonden,

19

ende sij teghen hen vergadert hadden alle die menichte voor die doore des tabernakels, so heeft haer die glorie des Heeren vertoont hen allen.

20

Ende die Heere heeft ghesproken tot Moysen ende Aaron, ende gheseyt,

21

Sceydt v wt het midden van deser vergaderinghen, dat ick die mach haestelijck vernielen.

22

Ende sij hebben plat neder op haer aensicht gheuallen, ⁺ende hebben gheseyt, O alderstercste Godt der gheesten van allen vleesch, sal v gramscap haer wraec thoonen ouer alle ghader, als daer een sondicht?

+ D

23

Ende die Heere heeft tot Moysen gheseyt,

24

Beueelt alle den volcke dat sij hen sceyden van Chore ende Dathans ende Abirons tabernakelen.

25

Ende Moyses is opghestaen, ende hy is ghegaen tot Dathan ende Abiron, ende als hem die ouders van Israhel volchden,

26

so seyde hy tot die schare, Gaet wech van der booser menschen tabernakelen, ende en wilt niet ghenaken van tghene dat hen toebehoort, dat ghy ooc in haerlieden sonden niet en wordt beuanghen.

27

Ende als sij van haren tenten ghegaen waren int ronde, soo sijn Dathan ende Abiron wtghecomen ende hebben ghestaen in den inganck van haren tenten met haer huysvrouwen ende kinderen, ende met allen haer menichte.

28

Ende Moyses heeft gheseyt, Daer aen suldi weten dat die Heere my ghesonden heeft, dat ick doen soude alle dat ghy siet, ende dat ic die wt mijn eyghen herte niet versiert en hebbe.

29

Eest sake dat dese met een ghewoonlijcke doot der menschen steruen, ende dat hen versoect een plaghe daer mede ander menschen versocht pleghen te worden, soo en heeft my die Heere niet ghesonden,

30

⁺Maer eest sake dat die Heere een nieuwe dinck doet, so dat die aerde haren muyl ontsluyt, ende verslinde hen, ende alle dat hen toebehoort, ende dat sij leuende inder hellen nederdalen, so suldi weten dat sij den Heere gheblasphemeert hebben.

+ E

31

Aldus terstont als hy ophiel van spreken, soo is die aerde onder hen voeten van een ghescoert,

32

ende haren mont open doende heeftse hen verslonden, met haren tabernakelen, ende met allen haer substancie,

33

ende sij sijn leuende ter hellen nederghedaelt ouerdect metter eerden, ende sij sijn vergaen van dat midden der menichten.

34

Maer alle tvolck van Israhel dat daer rontsomme stont, vloodt wech vanden gheroep der gheender die daer verghinghen, segghende, Dat ons by auontueren die aerde oock niet en verslinde.

35

Ende ooc een vier vanden Heere wtcomende heeft ghedoot tweehondert ende vijftich mannen, die rueckwerck offerden.

36

Ende die Heere heeft tot Moysen gesproken segghende,

37

Ghebiedt Eleazarus Aarons sone den priester, dat hy opneme die wieroockvaten die daer inden brant ligghen, ende het vier herwaerts ende derwaerts verstroeye, want sij sijn gheheylicht

38

in die dooden van den sondaren, ende dat hi die wtsmede tot platen, ⁺ende die vast make aen den outaer, om dat daer in rueckwerck den Heere gheoffert is, ende dat sij gheheylicht sijn, op dat die kinderen van Israhel die moghen sien voor een teeken ende tot een gedenckenisse.

+ F

39

Ende Eleazar heeft die metalen wieroocvaten ghenomen daer sij in gheoffert hadden, die vanden brant verslonden waren, ende hy heeft die tot platen wtgheslaghen, makende die vast aenden outaer,

40

op dat die kinderen van Israhel namaels hebben souden, waer door sij souden vermaent worden, dat niemant vreemdts daer toe en gae, ende die van Aarons sade niet en is om den Heere dat rueckwerck te offeren, op dat hy niet en lijde, ghelijck Chore gheleden heeft, ende alle sijn verghaderinghe, alsoo die Heere tot Moysen sprack.

41

Maer alle die menichte der kinderen van Israhel hebben des anderen daechs ghemurmureert tseghen Moysen ende Aaron segghende, Ghy hebt dat volck des Heeren ghedoot.

42

Ende als daer eenen oploop opstont ende tgheruchte meerder worde,

43

so sijn Moyses ende Aaron gheuloden tot dat tabernakel des verbonts ⁺Ende als sij daer binnen comen waren, so heeft die wolcke dat bedect, ende die glorie des Heeren is gheopenbaert.

+ G

44

Ende die Heere heeft tot Moysen gheseyt,

45

Gaet wech wt het midden van deser menichten, want ie salse nv ooc vernielen. Ende als sij op die aerde laghen,

46

soo seyde Moyses tot Aaron, Neemt een wieroochvat, ende neemt vier vanden outaer ende legghet daer ruecwerck op, ghaende haestelijck totten volcke, dat ghy voor hen bidden moecht, want die gramschap is nv vanden Heere wtghecomen, ende die plaghe wordt woedich.

47

Ende als Aaron dit ghe-

[p. *144]

daen hadde, ende gheloopen was tot dat midden der menichten, die welcke nv vanden brant verdoruen worde, heeft hi dat rueckwerck gheoffert,

48

ende staende tusschen die doode ende leuende, heeft hi voor dat volck ghebeden, ende die plaghe hielt op,

49

Ende die daer verslaghen sijn, waren veerthien duysent menschen, ende seuen hondert, sonder die ghene die vernielt waren in die muyterie van Core,

50

Ende Aaron is weder bi Moysen comen aen die doere van dat tabernakel des verbonts, nae dat die plaghe des steruens opghehouden was.