Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺DIe Heere heeft tot Moysen ghesproken segghende,

+ A

2

Spreect tot die kinderen van Israhel, ende ghy sult hen segghen, Als ghi sult comen sijn in dlant van uwer wooninghen, dwelck ic v gheuen sal,

3

ende dat ghy den Heere eenighe offerande doen sult, tot een brantofferande oft vreedofferande, tsij ghelofte betalende, oft vrijwillijck offerende ghiften, oft in v hooghe feestdaghen ontstekende den Heere eenen rueck der sueticheyt, tsij vanden ossen oft vanden scapen,

4

soo sal alle die een slachofferande ten offer doodet, ooc offeren een sacrificie van bloeme des meels, het thiende deel van een Ephi mate, met olie beslaghen, welcke olie sal die mate hebben tvierendeel van een hin,

5

ende wijn ende dranck offeranden om te storten vander seluer maten sal hy ooc gheuen tot die brantofferande, oft tot die slachofferande.

6

Tot elcken lam, ende tot elcken ram, sal wesen een sacrificie van twee thiende deelen bloeme van mele, die beslaghen sij met olien tderdendeel van een hin,

7

ende wijn tot den drancoffer, van tderdendeel der seluer maten sal hi offeren tot een rueck der sueticheyt voor den Heere.

8

⁺Maer wanneer ghy vanden ossen doen sult een brantofferande oft slachofferande, om te voldoen v belofte, oft vreedofferanden,

+ B

9

soo suldi gheuen tot elcken osse, dry thiende deelen bloemen van meele, beslaghen met olie, dwelc hebbe een helft van een hin,

10

ende wijn om den dranckoffer te storten vander seluer maten, tot een offerande van eenen aldersuetsten ruec voor den Heere.

11

Alsoo suldi doen

12

tot elcken osse, ende elck ram, ende lam, ende ionck boxken.

13

So wel die ingheborene als die wtlanders

14

sullen op een ghelijcke manier van doen, haer sacrificien offeren.

15

Een ghebodt sal wesen ende een recht, so wel v lieden als den vreemdelinghen ws lants.

16

Ende die Heere heeft tot Moysen ghesproken segghende,

17

Spreect tot die kinderen van Israhel, ende ghy sult hen segghen,

18

Als ghy sult comen sijn int lant dwelck ic v gheuen sal,

19

ende dat ghy sult gheten hebben van die brooden des lants, soo suldi den Heere dierste ghauen

20

van uwen spijsen wtsceyden Gelijc ghi wt uwen dorschvloeren dierste vruchten wtsceydet,

21

also suldi ooc vanden toespijsen dierste gauen den Heere gheuen.

22

Maer eest sake dat ghy by onwetenheyt iet achterlaet van desen dinghen welc die Heere tot Moysen gheseyt heeft,

23

ende v lieden door hem beuolen, vanden dach dat hy heeft begonst te gebieden ende daer nae voorts,

24

ende dat die menichte iet vergheten heeft te doen, ⁺so sal die een calf offeren vanden runderen eenen brantoffer tot eenen aldersuetsten ruec voor den Heere, ende sijn sacrificie ende natte offeranden, ghelijck die ceremonien wteysschen, ende eenen bock voor die sonde,

+ C

25

ende die priester sal bidden voor alle die menichte der kinderen van Israhel, ende het sal hen vergheuen worden, om dat sij willens ende wetens niet ghesondicht en hebben, Nochtans niet te min den Heere offerende een welriekende offerande, voor hem seluen, ende voor hen sonde ende dolinghe,

26

ende het sal den heelen volcke der kinderen van Israhel vergheuen worden, ende den vreemdelinghen die als vreemt by v lieden verkeeren, want het is die scult van alle tvolck door onwetentheyt.

27

Maer eest sake dat een ziele onwetende sondicht, soo sal die een iarich gheytken offeren voor haer sonde,

28

ende die priester sal voor haer bidden, dat sij onwetende ghesondicht heeft voor den Heere, ende hy sal haer ghenade verweruen, ende het sal haer vergheuen worden,

29

Soo wel den ingheborenen als den wtlanders sal een wet sijn van hen allen die door onwetentheyt misdaen hebben.

30

Maer een ziele die iet misdaen heeft door houerdie, tsij oft dat hy een borgher is oft een wtlander, aenghesien dat hy teghen den Heere rebel gheweest is, die sal van sijnen volcke vergaen,

31

Want hy heeft dat woordt des Heeren versmaedt, ende sijn ghebodt ghebroken, daer om sal hy wtgheroeyt worden, ende sijn boosheyt draghen.

32

⁺Ende het is gheschiet als die kinderen van Israhel in die woestijne waren, ende dat sij gheuonden hadden eenen mensche hout vergaderende opden sabboth dach,

+ D

33

soo hebben sij dien bracht voor Moysen ende Aaron ende voor alle die menichte.

34

Die welcke hebben hem inden kercker besloten, niet wetende wat sij van hem sculdich waren te doen.

35

Ende die Heere heeft tot Moysen gheseyt, Laet desen mensch die doot steruen, alle die vergaderinghe sal hem met steenen doot worpen, buyten die legheren.

36

Ende als sij hem wtgheleyt hadden, soo hebben sij hem met steenen gheworpen, ende hy is ghestoruen, ghelijck die Heere beuolen hadde.

37

Ende die Heere heeft ooc tot Moysen gheseyt,

38

Spreect tot die kinderen van Israhel ende ghy sult hen segghen, dat sij voor hen freengien maken aen die hoecken van haren mantels stellende daer in hemelsblau linten,

39

die welcke als sij sien sullen, so moghen sij ghedachtich wesen alle des Heeren gheboden, ende dat sij niet en volghen hen ghepeysen, ende ooghen, bedrijuende oncuyscheyt door versceyden dinghen,

40

maer dat sij meer gedachtich wesende der gheboden des Heeren, die doen moghen, ende dat sij haren Godt moghen heylich wesen,

41

Ic ben die Heere uwe Godt die v gheleyt hebbe wt dat lant van Egipten om dat ic v lieder Godt wesen soude.

[afbeelding]