Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺DAerom alle die scare luyde roepende, heeft gheweent op dien nacht,

+ A

2

ende alle die kinderen van Israhel hebben ghemurmureert tseghen Moysen ende Aaron segghende,

3

Och oft wij in Egipten ghestoruen waren, ende niet in dese groote wildernisse. Och oft wij vergaen mochten, ende dat die Heere ons niet en leydde in dit lant, dat wij metten swaerde niet en vallen, ende onse huysvrouwen ende kinderen worden gheuanghen wech gheuoert. En eest niet beter dat wij wederom keeren nae Egipten?

4

Ende sij seyden deen tot den anderen, Laet ons eenen leytsman maken voor ons, ende laet ons wederom gaen nae Egipten.

5

Als Moyses ende Aaron dit ghehoort hadden, so vielen sij plat neder ter aerden voor alle die menichte der kinderen van Israhel.

6

Maer Iosue Nuns sone ende Caleb Iephones sone die seluer oock het lant bespiet hadden, hebben haer cleederen ghescoert

7

ende gheseyt tot alle die vergaderinghe der kinderen van Israhel. ⁺Het lant dat wij alomme doorgaen hebben is seer goet,

+ B

8

eest dat die Heere onser ghenadich is, so sal hy ons daer in brenghen, ende hy sal ons die aerde gheuen van melck ende honich vloeyende.

9

Ende wilt tseghen den Heere niet wederspannich wesen, noch en wilt dat volck van desen lande niet ontsien, want wij moghense verslinden ghelijck broot. Alle bystant is van henlieden ghegaen, Die Heere is met ons, en wilt niet vreesen.

10

Ende als alle die ghemeynte riep, ende wilde hen met steenen doot worpen, so heeft haer die glorie des Heeren gheopenbaert, bouen dat dack des verbonts dat alle die kinderen van Israel saghen.

11

Ende die Heere heeft tot Moysen gheseyt, Hoe langhe sal dit volck my lasteren? Hoe langhe en sullen sij my niet gheloouen door alle die teekenen die ic voor hen ghedaen hebbe?

12

Daerom sal icse metter pestilencien slaen, ende vernielen, maer ic sal v een prince maken ouer een groot volc, ende veel stercker dan dit is.

13

⁺Ende Moyses seyde tot den Heere, Eest dat die Egiptenaren dit hooren, wt wiens midden ghy dit volck gheleyt hebt,

+ C

14

ende die inwoonders van desen lande die welck ghehoort hebben dat ghy Heere in dit volck sijt, ende aensicht teghen aensicht ghesien wordt, ende dat v wolcke henlieden bedect, ende dat ghy hen voorghaet door een columne der wolcken inden dach, ende door een columne des viers inden nacht,

15

dat ghy so grooten menichte verslaghen hebt als eenen mensch so sullen sij segghen,

16

Hy en was niet machtich tvolck te brenghen int lant waer om dat hy ghesworen hadde, ende daerom heeft hijse verslaghen in die woestijne

17

Daer om laet des Heeren sterckheyt groot gheacht worden, ghelijck ghy ghesworen hebt segghende,

18

O Heere lijdtsamich ende seer veelvan bermherticheden, afnemende die boosheyden ende groote misdaden niemanden die onschuldich is verlatende, die der vaderen onrechtueerdicheyt versuert op die kinderen, tot dat derde ende vierde gheslachte,

19

Ick bid v, wilt vergheuen die sonde dees ws volcks, nae die grootheyt uwer bermherticheyt, ghelijck ghy hen ghenadich hebt gheweest doen sij wt Egipten ghinghen, tot deser plaetsen toe.

20

⁺Ende die Heere heeft gheseyt, Ick hebt vergheuen na v woordt,

+ D

21

Ick leue ende gheheel aertrijck sal veruult worden van die glorie des Heeren,

22

Maer nochtans alle die menschen die mijn maiesteyt ghesien hebben, ende die teekenen die ic in Egipten ghedaen hebbe, ende in die woestijne, ende hebben my nv thienwerf ghetempteert, ende en hebben mijnder stemmen niet ghehoorsaem gheweest,

23

en sullen dat lant niet sien, daerom dat ic haren vaderen ghesworen hebbe, Noch daer en sal niemant van alle die ghene die my gelastert hebben, dat lant sien.

24

Maer mijnen knecht Caleb die vol van eenen anderen gheest my gheuolcht heeft, sal ic leyden in dlant dwelck hy alom doorwandelt heeft, ende sijn saet sal dat besitten.

25

Want die Amaleciten ende Chananeen woonen in die valleyen. Morghen veruoert den legher, ende keert wederomme in die woestijne door den wech van die roode zee.

26

⁺Ende die Heere heeft ghesproken tot Moysen ende Aaron segghende,

+ E

27

Hoe langhe sal dese alder quaetste menichte teghen my murmureren? Ic heb die clachten der kinderen van Israhel ghehoort,

28

Daer om segt hen, Ick leue seyt die Heere, ghelijck ghy ghesproken hebt daer ict hoorde, alsoo sal ick v doen,

29

In dese woestijne sullen v doode lichamen ligghen, Alle die ghetelt sijt van twintich iaren ende daer bouen, ende teghen my ghemurmureert hebt,

30

en sult int lant niet comen, daer ick mijn hant opghehauen hebbe, dat ick v daer soude doen woonen, sonder Caleb Iephones sone ende Iosue Nuns sone.

31

Maer v cleyn kinderen (daer ghi af gheseyt hebt dat sij souden der vianden roof worden) die sal ic daer in leyden dat sij dit lant sien sullen dwelck v mishaecht heeft.

32

Maer v doode lichamen sullen in die woestijnen ligghen,

33

⁺V kinderen sullen onghestadich wesen in die woestijne veertich iaren lanck, ende sullen v oncuysheyt draghen, tot dat haerder vaderen doode lichamen sullen vergaen wesen in die woestijne,

+ F

34

nae dat ghetal der veertich daghen op welcke ghy dat lant hebt besien, Een iaer sal voor eenen dach gherekent worden. Ende op die veertich iaren suldi ontfanghen uwe boosheden, ende ghy sult mijn wrake bekennen,

35

want alsoo ic gheseyt hebbe, soo sal ic doen deser alderquaetster menichten die teghen my opghestaen is, sij sullen vergaen ende steruen in dese woestijne.

36

Hierom alle die mannen die Moyses ghesonden hadde om dat lant te bespien, ende die wederomme comen sijnde, alle die menichte hebben doen murmureren teghen hem, lasterende het lant dattet quaet was,

37

sijn ghestoruen ende gheslagen voor daenschijn des Heeren.

38

Maer Iosue Nuns sone, ende Caleb Iephones sone, sijn te leuen ghebleuen van alle die ghereyst waren om dat lant te besien.

39

⁺Ende Moyses heeft alle dese woorden ghesproken tot alle die kinderen van Israhel, ende tvolck is bouen maten seer truerich gheweest.

+ G

40

Ende siet, des morghens vroech opstaende, sijn sij gheclommen opt hoochste vanden berghe, ende hebben gheseyt, Wij sijn bereedt opwaerts te trecken ter plaetsen daer die Heere af gesproken heeft, want wi hebben gesondicht.

41

Tot den welcken Moyses, Waerom (seyt hi) ouertredi dat woort des Heeren dwelck v niet tot gheluck vergaen en sal?

42

En wilt niet opwaerts trecken, want die Heere en is met v lieden niet, op dat ghy niet en valt voor uwe vianden.

43

Die Amaleciten ende Chananeen sijn voor v, door wiens swaert ghy vallen sult om dat ghi nae den Heere niet en hebt willen hooren, ende die Heere en sal met v niet wesen.

44

Maer sij sijn opghetrocken op dat opperste vanden berch, maer die arcke van dat

[p. *142]

testament des Heeren, ende Moyses en sijn vanden legher niet ghegaen.

45

Ende die Amaleciter ende Chananeus die opt gheberchte woonde is nederghecomen, ende hy heeftse gheslaghen, ende tsamen verslaghen, ende veruolcht tot Horma.