Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺ENde het volc is voorts gereyst van Aseroth ende hebben haer tenten gheslaghen in die woestijne Pharan.

+ A

2

Ende aldaer heeft die Heere tot Moysen ghesproken segghende,

3

Sendt mannen die dlant van Chanaan bespieden, dwelc ic den kinderen van Israhel geuen sal, wt elcken gheslachte eenen man vanden hooftluyden.

4

Ende Moyses heeft ghedaen dat die Heere gheboden hadde, sendende hooftmannen wt die woestijne Pharan, waer af dit die namen sijn,

5

Van Rubens gheslachte Sammua Zechurs sone,

6

⁺Van Symeons geslachte, Saphat Huris sone,

+ B

7

Van Iudas gheslachte Caleb Iephones sone,

8

Van Issachar, Igal Iosephs sone,

9

Van Ephraims gheslachte, Ozee Nuns sone,

10

Van Beniamins gheslachte, Phalti Raphus sone,

11

Van Zabulons geslachte, Geddiel Sodis sone,

12

Van Iosephs gheslachte des scepters van Manasses Gaddi, Susis sone,

13

Van Dans gheslachte Ammiel Gemallis sone,

14

Van Asers gheslachte Sthur Mychaels sone,

15

Van Nephthalis geslachte Nahabi Vapsis sone,

16

Van Gads gheslachte Guel Machis sone.

17

⁺Dit sijn die namen der mannen welc Moyses ghesonden heeft om dat lant te bespieden. Ende heeft Osee Nuns sone, Iosue ghenaemt.

+ C

18

Hierom so heeftse Moyses wtghesonden om dat lant van Chanaan te bespieden, ende tot henlieden gheseyt, Trect opwaerts nae die zuytsijde, Ende als ghy totten gheberchte comen sijt,

19

so bespiet dat lant hoedanich dat is, ende tvolck dat daer in woont, oft sterck is oft cranck, oft sij veel van ghetale sijn oft luttel,

20

ende dat lant goet oft quaet, ende wat steden daer sijn, bemuert oft sonder mueren,

21

ende oft die eerde vet, oft onvruchtbaer is, wel beplant met boomen, oft sonder boomen. ⁺Weest vroem ende brengt ons van die vruchten des lants. Want het was den tijt alsmen nv die druyuen eten mocht die vroech rijp worden.

+ D

22

Ende als sij opghetrocken waren, so hebben sij dat lant bespiet, van die woestijne Sin, tot Rohob alsmen coemt in Amath.

23

Ende sij sijn opwaerts ghegaen tot die suytsijde, ende ghecomen tot Hebron, daer Achiman ende Sisai, ende Tholmai Enacs kinderen waren. Want Hebron was ghetimmert seuen iaer voor Thanim die stadt van Egipten lant.

24

Ende voertsgaende tot die beke der druyuen, hebben sij een wijngaertrancke afghesneden met sijnen druyf, den welcken twee mans droeghen met eenen hantboom. ⁺Ende sij hebben ooc mede genomen van die granaet appelen, ende vanden vijghen, van dier plaetsen,

+ E

25

die welcke is ghenoemt, Nehel Eschol, dat is, die beke der druyuen, om dat die kinderen van Israhel den druyf van daer ghedraghen hadden.

26

Ende die bespieders des lants, nae veertich daghen weder comen zijnde, als sij alle dat lant hadden rontsomme doorgaen,

27

sijn ghecomen bi Moyses ende Aaron ende by alle die vergaderinghe der kinderen van Israhel in die woestijne te Pharan, welc is in Cades. Ende sij hebben tot hen ende tot alle die menichte ghesproken, ende hen ghetoont die vruchten des lants,

28

ende vertelden segghende, ⁺Wij sijn ghecomen int lant daer ghi ons henen ghesonden hadt, dwelc inder waerheyt vloeyt van melck ende honich, alsomen aen dese vruchten weten mach,

+ F

29

maer het heeft seer stercke inwoonders, ende seer groote ende bemuerde steden, Wij hebben daer gesien het gheslachte van Enac,

30

Amalec woont in die zuytsijde, ende die Hetheen ende Iebuseen ende Amorrheen woonen int gheberchte, maer die Chananeen woonen by die zee, ende ontrent den vloet der Iordanen.

31

Hier en tusschen Caleb bedwinghende die murmuratie des volcs die tegen Moysen opstont, seyde, Laet ons optrecken ende besitten dit lant, want wi sullen dat mogen crijghen.

32

Maer die andere die met hem gheweest hadden seyden, ⁺Wi en sijn gheensins machtich genoech om opwaerts teghen dit volck te trecken, want het is veel sterker dan wij.

+ G

33

Ende sij hebben dat lant (dwelck sij besien hadden) gelastert by die kinderen van Israhel, segghende, Dlant dat wi bespiet

[p. *141]

hebben, verslint sijn inwoonders, het volc dat wi ghesien hebben is van grooter hoochden,

34

wij hebben daer sommighe monstren ghesien der kinderen van Enac, van der ruesen gheslachte, by die welcke wij gheleken schenen sprinckhanen te wesen.