Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺ENde Maria ende Aaron hebben ghesproken teghen Moysen, om sijns wijfs wille die morianinne,

+ A

2

ende sij hebben geseyt, Heeft die Heere alleen door Moysen gesproken? En heeft hy tot ons ooc niet desghelijcs gesproken? Ende als die Heere dit gehoort hadde, so is hi gram gheweest,

3

Want Moyses was die aldersaechtmoedichste man bouen alle menschen die op eertrijc woonden.

4

Terstont heeft die Heere ghesproken tot hem ende tot Aaron ende tot Mariam. Gaet ghy drije alleene wt totten tabernakel des verbonts. ⁺Ende als sij wtghegaen waren,

+ B

5

so is die Heere nedergedaelt in die columne der wolcken, ende hy heeft ghestaen in den inganc des tabernakels, roepende Aaron ende Mariam. Ende als sij gegaen waren,

6

so seyde hy tot hen, Hoort mijn woorden, Isser iemant onder vlieden een propheet des Heeren, dien sal ic openbaren door een visioen, oft ic sal hem aenspreken door eenen droom,

7

maer sulck en is Moyses mijn dienaer niet, die dalder getroutste is, in alle mijn huys,

8

⁺want ic spreeck hem toe mont aen mont, ende hy siet den Heere openbaerlijck, niet door donckerheyt oft by gelijckenissen, Waerom en hebben di dan niet gheureest te lasteren Moyses mijnen dienaer?

+ C

9

Ende die Heere gram teghen hen sijnde is wech ghegaen.

10

Ende die wolcke is ooc wech ghegaen die op dat tabernakel was. Ende siet Maria is ghescenen wit van lazerien ghelijc snee. Ende als Aaron haer aensien hadde, ende ghesien dat sij met lazerien al ouer besmet was,

11

so seyde hy tot Moyses, Ick bid v mijn heere en wilt ons dese sonde niet oplegghen, die welcke wij sottelijck ghedaen hebben,

12

op dat dese niet en worde als een doode, ende ghelijck een onuoldraghen kint dat van sijnder moeder lichaem gheworpen wordt, siet nv die helft van haren vleesch is verslint vander lazerien.

13

⁺Ende Moyses heeft totten Heere gheroepen segghende, O Godt, Ick bidde v, gheneest haer.

+ D

14

Ende die Heere heeft hem gheantwoort, Hadde haer vader in haer aensicht ghespoghen, en soude sij niet te minsten seuen daghen moeten bescaemt sijn? Laetse wtsceyden wten legher seuen daghen lanck, ende daer nae sal sij wederom gheroepen worden.

15

Hierom so is Maria buyten den legher ghesloten, seuen daghen lanck, ende het volck en is van dier plaetsen niet gheruert tot dat Maria wederomme gheroepen was.