Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺BInnen desen tijt soo is daer een murmuratie des volcs opghestaen (als bedroeft sijnde om den arbeyt) teghen den Heere. Ende als die Heere dat ghehoort heeft, so is hy gram gheweest. Ende dat vier des Heeren teghen hen ontsteken heeft dat achterste deel des leghers verslonden.

+ A

2

Ende als dat volck tot Moysen gheroepen hadde, soo heeft Moyses tot den Heere ghebeden, ende dat vier is verslonden gheweest.

3

Ende hi heeft die plaetse ghenaemt ontstekinghe, om dat aldaer het vier des Heeren teghen hemlieden ontsteken is gheweest,

4

Want alderhande ghemeyn volck dwelck met hem opghetrocken was, worde ontsteken van lust, sittende ende weenende tsamen met die kinderen van Israhel, ende sij seyden, Wie sal ons vleesch teten gheuen?

5

Wij sijn ghedachtich der visschen die wij in Egipten om niet aten, ende ons comen te voren die concommeren, ende pepoenen, dat pourloock ende den aiuyn ende dat clijsterloock.

6

⁺Ons ziele is dorre, want ons ooghen en sien anders niet dan Man.

+ B

7

Ende dat Man was ghelijck het coriander saet, van verven ghelijck bdellion saet.

8

Ende dat volck ghinck omme, verghaderende dat, ende brakent met den muelensteen, oft si stietent in eenen mortier al cleyn van een, ende sij coecten dat in eenen pot makende daer af coexkens van smaecke als olikoecken

9

Ende als den dauwe des nachts opden legher neder viel, so viel dat Man ooc mede van bouen.

10

Aldus soo heeft Moyses tvolck hooren weenen by haren familien eenen ieghelijc by die dooren van haren tabernakelen. Ende die heete gramscap des Heeren is seer toornich gheworden, ende het dochte Moyses ooc een onuerdrachelijck dinc te wesen,

11

ende hi heeft totten Heere gheseyt, Waerom hebdi uwen dienaer gepijnicht? waerom en vinde ic gheen gracie voor v? ⁺ende waerom hebdi den last van allen desen volcke op mi gheleyt?

+ C

12

Heb ic alle dese menichte ontfanghen, oft heb icse ghewonnen, dat ghi tot mi seggen moecht, Draechtse in uwen schoot gelijc een voester pleech een cleyn kindeken te draghen, ende draechtse tot in dat lant daerom dat ghy haren vaderen gesworen hebbet.

13

Van waer mocht my so veel vleesch comen, dat ict so grooten menichte geuen mochte? Sij weenen voor my seggende, Gheeft ons vleesch dat wi eten moghen,

14

Ic en can alleen alle dit volc niet verdraghen, want het is my te lastich.

15

Maer duncket v anders, so bidde ick v dat ghy my dootslaet, ende laet my gratie verweruen in uwen ooghen, dat ick soo veel quaets niet meer en lijde.

16

Ende die Heere heeft tot Moysen gheseyt, Vergadert my tseuentich mannen, van die ouders van Israhel, welck ghy kent dattet des volcs ouders sijn ende meesters, ende ghy sultse leyden aen die doore van dat tabernakel des verbonts, ende ghi sultse daer by v doen staen,

17

⁺op dat ick mach nederdalen ende v toespreken, ende ick sal van uwen gheest afnemen, ende dien henlieden gheuen, dat sij met v den last des volcs verdraghen, ende dat ghy alleene niet verlast en wordt

+ D

18

Ende totten volcke suldi oock segghen, Heylicht v morghen, ghy sult vleesch eten, want ic heb v hooren segghen, Wie sal ons vleesch teten gheuen? Wel was ons in Egipten. Daerom sal v die Heere vleesch gheuen, dat ghijt eten sult,

19

niet eenen dach oft twee oft vijf oft thien noch ooc twintich,

20

maer een maent der daghen tot dat tuwen noesgaten wtgae, ende dat v verkeere in walghinghe, om dat ghy den Heere verdreuen hebt, die int midden van v is, ende hebt voor hem gheweent segghende, Waerom sijn wij wt Egipten ghegaen?

21

Ende Moyses heeft gheseyt totten Heere, ⁺Ses hondert duysent voetganghers sijn onder dit volck, ende ghy segt, Ick sal hen vleesch teten gheuen een gheheel maent lanck?

+ E

22

Salmen dan een groote menichte van ossen ende scapen slaen, dat die ghenoech mochten sijn ter spijsen? oft sullen alle die visschen der zee tsamen vergadert worden om hen te versaden?

23

Ende die Heere heeft hem gheantwoordt, Is die hant des Heeren onmachtich? Nv terstont suldi sien, oft mijn woordt metten wercke sal volbracht worden.

24

Hierom is Moyses ghecomen, ende heeft den volcke des Heeren woorden vertelt, vergaderende tseuentich mannen vanden ouders des volcs van Israhel, die welcke hy heeft doen staen omtrent dat tabernakel.

25

Ende die Heere is nederghecomen door een wolcke, ende hy heeft tot hem ghesproken, nemende van den gheest die in Moyses was, ende geuende dien den tseuentich mannen. Ende als die gheest in hen gherust hadde, so hebben sij ghepropheteert, ende en hebben voortaen niet opghehouden.

26

⁺Maer daer waren twee mannen inden legher bleuen, waer af die een hiet Eldad, ende die ander Medad daer op dat die gheest ooc gherust heeft. Want sij waren oock bescreuen, ende sij en waren niet wtcomen tot dat tabernakel.

+ F

27

Ende als sij nv inden legher propheteerden, soo isser een knechtken gheloopen, ende heuet Moysi gheboodtscapt, segghende, Eldad ende Medad propheteeren inden legher.

28

Terstont so seyde Iosue Nuns sone, Moyses dienaer, ende wt vele vercoren, Mijn heere Moyses verbiet hen,

29

Maer hy antwoorde, Waerom sijdi voor my besorcht? Wie mocht gheuen, dat alle tvolck propheteerde, ende die Heere hen sijnen gheest ghaue?

30

⁺Ende Moyses ende die ouders van Israhel sijn wederghegaen inden legher,

+ G

31

Ende eenen wint vanden Heere voertscomende heeft quackelen opghenomen, ende die gebracht ouer die zee, ende heeft die nedergheleyt inden legher, een streke soo groot alsinen op eenen dach gaen mach aen alle die sijden des heyrleghers rontsomme ende

[p. *140]

die quackelen vlogen in die locht twee cubitus hooghe bouen die eerde.

32

Hierom het volck opstaende, alle dien dach ende nacht, ende den anderen dach heeft een groote menichte der quackelen gheuanghen, die luttel vergadert hadde, die hadde thien chorus maten, ende sij hebben die ghedroocht rontsomme den legher.

33

Noch was dat vleesch in hen tanden, ende aldusdanighe spijse en ghebrack hen noch niet, ende siet den rasenden torn des Heeren verwect teghen tvolck, heeftse geslaghen met een sware plaghe groot bouen maten.

34

Ende die plaetse is genaemt die grauen der quaetlusticheyt, Want daer hebben sij tvolc begrauen, dat lust ghehadt hadde. Ende wtghereyst sijnde van die grauen der quaetlusticheyt, sijn sij comen tot Haseroth, ende sijn daer bleuen.