Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde die Heere heeft tot Moysen gesproken, segghende,

+ A

2

Maect voor v twee trompetten van gheslaghen siluer, waer mede dat ghi sult die menichte moghen tsamen roepen, als den heyrlegher optrecken sal.

3

Ende als ghy met die trompetten sult trompen, so sal alle die scare vergaderen by v voor die doore van dat tabernakel des verbonts.

4

Eest dat ghi eens trompt, so sullen die princen, ende die hooftluyden der menichten van Israhel by v comen,

5

Maer eest datter een langer gheclanck der trompetten ende met poosen gheluyt maect, soo sullen haren legher opbreken dierste die aen die oostsijde ligghen,

6

maer in dat tweede gheluyt ende ghelijc ghehuyl der trompetten, sullen sij haren legher opbreken die aen die suytsijde ligghen, ende na dese maniere sullen die ander doen, wanneer die trompetten sullen huylen ter reysen.

7

Maer alsmen dat volck vergaderen moet, so sal der trompetten een simpel gheluyt wesen, ende sij en sullen met gheen poosen huylen.

8

Ende Aarons der priesters sonen sullen met die trompetten trompen, ende dit sal een eewighe wettelijcke manier wesen in v gheslachten.

9

⁺Eest sake dat ghy ter orloghen trect wt uwen lande teghen v vianden die teghen v strijden, soo suldi gheclanck maken met dat ghehuyl der trompetten, ende v lieder gedenckenisse sal voor den Heere uwen Godt wesen, dat ghy moecht verlost worden wt die handen van uwen vianden.

+ B

10

Soo wanneer ghy hebben sult eenighe blijde maeltijden, oft feestelijcke daghen ende nieuwe maenden, so suldi met die trompetten blasen op uwen heelen brantoffer, ende ouer uwe vreedoffers, dat sij v wesen moghen tot een ghedenckenisse ws Gods, Ick ben die Heere v lieder Godt.

11

Op dat tweede iaer in die tweede maent, op den twintichsten dach der maent, so is die wolcke opghehauen, van dat tabernakel des verbonts,

12

ende die kinderen van Israhel sijn ghereyst by hen scaren wt der woestijnen Sinai, ende die wolcke heeft gherust in die woestijne van Pharam.

13

Ende dierste hebben haren legher op getrocken nae des Heeren ghebodt door die hant van Moyses

14

die kinderen van Iudas by haren scaren, wiens Prince was Nahasson Aminadababs sone.

15

Int gheslachte der kinderen van Issachar was die Prince Nathanael Suars sone.

16

In Sabulons geslachte was die Prince Eliab Helons sone.

17

Ende dat tabernakel is nedergheleyt, het welc draghende die kinderen van Gerson ende Merari, sijn wtghegaen

18

Ende die kinderen van Ruben sijn ooc ghetrocken met haren scaren, ende ordinancien, der welcker Prince was Helisur die sone van Sedeur.

19

⁺Maer int gheslachte der kinderen van Symeon, was die Prince Salamiel Surisaddais sone.

+ C

20

Ende in Gads gheslachte was die Prince Eliasaph Duels sone.

21

Ende die Caathiten sijn ooc voorts ghetrocken, draghende die alderheylichste plaetse. Ende dat tabernakel worde so langhe ghedraghen tot dat sij quamen ter plaetsen der oprechtinghen.

22

Ende die kinderen van Ephraim hebben ooc haren legher opghetrocken by haren scaren, in wiens heyr was die Prince Elisama Ammiuds sone.

23

Maer in dat gheslachte van Manasses kinderen was die Prince Gamaliel Phadassurs sone.

24

Ende int gheslachte van Beniamin was die hooftman Abidan Gedeons sone.

25

Ende die leste van allen den leghers sijn voorts ghereist die kinderen van Dan by haren scaren, in wiens heyr heeft die Prince gheweest Ahieser Amisaddais sone.

26

Maer int gheslachte van Asers kinderen, was die prince Phegiel Ocrans sone.

27

Ende int gheslachte der kinderen van Nephthali, was die Prince Ahira Enans sone.

28

Dit sijn die heyren ende die reysen der kinderen van Israel by haren scaren als sij vertrocken.

[p. *139]

29

Ende Moyses seyde tot Hobab Raguels sone den Madianiter sijnen maech, ⁺Wij reysen ter plaetsen welck ons die Heere gheuen sal, coemt met ons, op dat wij v weldoen moghen, want die Heere heeft Israhel goede dinghen beloeft.

+ D

30

Tot wien hy heeft gheantwoordt, Ick en sal met v niet gaen, maer ick sal weder omme keeren in mijn lant daer ick gheboren ben.

31

Ende hy seide tot hem, en wilt ons niet verlaten, want ghy weet wel op wat plaetsen dat wij in die woestijne moeten onsen legher maken, ende ghy sult ons leytsman wesen.

32

Ende als ghy met ons sult comen sijn, soo sullen wij v gheuen alle dat beste, van alle den rijcdom welck ons die Heere gheuen sal.

33

Aldus sijn sij ghereyst vanden berch des Heeren, eenen wech van drij daghen, ende die arcke van des Heeren verbont ghinck voor hemlieden, drij daghen bescickende die plaetse des heyrleghers.

34

Ende die wolcke des Heeren was op hen inden dach als sij voorts trocken.

35

Ende als die arcke opghehauen worde, soo seyde Moyses, Staet op Heere ende laet v vianden verstroyt worden, ende laetse van v aenschijn vlieden, die v haten.

36

Ende als dat neder gheleyt worde, soo seyde hi, O Heere keert wederomme tot die menichte des heyrs van Israhel.