Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde die Heere heeft tot Moysen ghesproken in die woestijne Sinai, int tweede iaer nae dat sij wt dat lant van Egipten gEgaen waren in dierste maent segghende,

+ A

2

Laet die kinderen van Israhel Phase maken te sijnen tijde,

3

opden veerthiensten dach van deser maent omtrent den auont na alle sijn ceremonien ende gherechticheden.

4

Ende Moyses heeft den kinderen van Israhel beuolen dat sij Phase souden maken.

5

Ende sij hebben dat ghedaen te sijnen tijde, opden veerthiensten dach der maent aenden

[p. *138]

auont op den berch van Sinai. Nae alle dat die Heere den kinderen Moysi beuolen hadde, so hebben die kinderen van Israhel ghedaen.

6

Ende siet sommighe die ontsuyuert waren ouer die ziele van eenen mensche, die welck op dien dach gheen Phase en hadden moghen maken, comende tot Moysen ende Aaron hebben hen gheseit,

7

Wij sijn onsuyuer ouer eens menschen ziele, waerom wort ons benomen, dat wij niet en moghen den Heere die offerande offeren te sijnen tijde onder die kinderen van Israhel.

8

Den welcken heeft Moyses gheantwoordt, Staet op, dat ic mach raet vraghen wat die Heere van v lieden sal ghebieden.

9

⁺Ende die Heere heeft tot Moysen ghesproken segghende,

+ B

10

Spreect tot die kinderen van Israhel, Een mensch die onsuyuer is ouer een ziele, oft die ouer wech is, verre onder v volck, die sal den Heere Phase maken

11

in die tweede maent, opden veerthiensten dach der maent des auonts, met ongheheefde brooden ende met wilden lactuwen sullen sij dat eten,

12

sij en sullen daer af niet ouerlaten blijuen tot des morghens, ende sij en sullen sijn ghebeente niet breken, ende sij sullen allen die behoorlijcke maniere van Phase onderhouden.

13

Maer eest dat yemant suyuer is, ende dat hy ouer wech niet en is gheweest, ende nochtans gheenen Phase ghemaect en heeft, die ziele sal wt haren volcken verdreuen worden, om dat sij den Heere dat sacrificie niet gheoffert en heeft te sijnen tijde, sijn sonde sal hi draghen.

14

Eest dat by v woont eenich vreemdelinck oft wtlander, die sullen dat Phase maken, nae alle sijn behoorlijcke ceremonien ende alle sijn rechten, ⁺Tselue gebodt sal by v lieden sijn, so wel den wtlander als den ingeboren.

+ C

15

Aldus op den dach als dat tabernakel opghericht was, so heeft een wolcke dat bedect, Maer vanden auont so was op dat tabernakel een ghedaente des viers tot smorghens toe,

16

ende alsoo gheschiedet altijt, in den dach soo bedeckte dat een wolcke, ende snachts als een gedaente des viers.

17

Ende als die wolcke wech ghenomen worde die het tabernakel ouerdecte, dan reysden die kinderen van Israhel voorts, ende ter plaetsen daer die wolcke bleef staende, daer maecten sij haren heyrlegher.

18

Nae dat ghebodt des Heeren reysden sij voorts, ende nae sijn ghebodt so sloeghen sij haer tenten. Alle die daghen dat die wolcke op dat tabernakel bleef, so bleuen sij op die selue plaetse,

19

ende alst so gheuiel dat die wolcke langhen tijt daer op bleef, so waren die kinderen van ⁺Israhel in des Heeren wake, ende sij en reysden niet voorts,

+ D

20

hoe veel daghen dat die wolcke op dat tabernakel was. Na des Heeren ghebodt soo richten sij haer tenten, ende na sijn ghebodt soo leyden sij die ooc neder.

21

Waert sake dat die wolcke staende bleef vanden auont tot den morghen, ende dat sij des morghens terstont dat tabernakel verliet, so reysden sij voorts, ende waert dat sij wech ghinc nae eenen dach ende nacht, soo braken sij haer tenten weder op.

22

Maer bleef sij twee daghen, oft een maent, oft noch langher tijt op dat tabernakel, so bleuen die kinderen van Israhel ter seluer plaetsen, ende sij en reysden niet voorts, maer terstont als die wolcke wech ghegaen was, soo vertrocken sij haren legher.

23

Door dat woordt des Heeren so sloeghen sij haer tenten, ende door sijn woordt so reysden sij voorts, ende sij waren in die wake des Heeren, na sijn gebot door die hant van Moyses