Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde die Heere sprack tot Moysen segghende,

+ A

2

Spreect tot Aaron, ende ghy sult tot hem segghen, als ghy die seuen lampen ghestelt hebt, soo sal den candelaer opghericht worden, aen die zuytsijde. Daerom beueelt dit, dat die lampen tseghen den Noorden, teghen ouer sien tot die tafel vanden voorgheleyde brooden, tseghen die sijde welck tseghen ouer den candelaer is, sullen die moeten lichten.

3

Ende Aaron heeft dat ghedaen, ende hy heeft die lampen opden candelaer ghestelt, alsoo die Heere Moysi beuolen hadde.

4

Ende dit was het maecsel vanden candelaer, van gheslaghen goude, soo wel den middelsten staec als alle dander werck dat wt beyde die sijden der schachten quam, na dat exempel welck die Heere Moysi ghetoont heeft, alsoo maecte hy den candelaer.

5

⁺ENde die Heere heeft tot Moysen ghesproken segghende,

+ B

6

Neemt die Leuiten wt dat midden der kinderen van Israhel, ende ghy sultse suyueren,

7

nae dese wijse, Laetse bespraeyen met dat water der suyueringhen, ende sij sullen alle dat hayr van haren vleesch afscheeren. Ende als sij haer cleederen sullen ghewasschen hebben, ende sij ghesuyuert sullen wesen,

8

soo sullen sij eenen osse wt dat groot vee nemen, met sijnen spijsoffer, bloeme van mele met olie beslaghen, maer ghi sult eenen anderen osse wten grooten vee nemen voor die sonde.

9

Ende ghy sult die Leuiten inbrenghen voor dat tabernakel des verbonts, als ghy alle die menichte der kinderen van Israheltsamen gheroepen sult hebben

10

Ende als die Leuiten voor den Heere sullen sijn, so sullen die kinderen van Israel haer handen op hen legghen,

11

ende Aaron sal die Leuiten offeren tot eender ghiften voor dat aenschijn des Heeren, van die kinderen van Israhel om te dienen in sijnen dienst.

12

Ende die Leuiten sullen oock haer handen legghen op der ossen hoofden waer af dat ghy den eenen sult maken tot eenen offer voor die sonde, ende den anderen tot eenen brantoffer des Heeren, dat ghy voor hen biddet.

13

⁺Ende ghy sult die Leuiten stellen voor Aaron ende sijnder kinderen aensicht, ende als ghi die den Heere gheoffert hebt, so suldise wijden,

+ C

14

ende ghi sultse sceyden wt dat midden der kinderen van Israhel, dat sij mijne wesen moghen,

15

ende daer nae ghaen int tabernakel des verbonts dat sij my dienen. Aldus suldise suyueren ende wijden tot een offerande des Heeren, want sij my tot een ghifte van den kinderen van Israhel ghegheuen sijn.

16

Voor die ierste gheborene die haers moeders lichaem ierst ontsluyten in Israhel heb ik icse ghenomen,

17

Want mijne sijn alle dierste gheborene der kinderen van Israhel soo wel vanden menschen als vanden beesten. Van dien dach doen ic alle dierste gheborene int lant van Egipten versloech heb icse voor my gheheylicht,

18

ende ic heb die Leuiten ghenomen voor alle dierste gheborene der kinderen van Israhel,

19

ende ic hebse Aaron ende sijnen sonen voor een ghifte ghegeuen wt dat midden des volcs, dat sij my souden dienen in dat tabernakel des verbonts voor Israhel, ende dat sij voor hen bidden datter gheen plaghe en come onder tvolck, waert sake dat sij hen verstouten te gaen tot die heylighe plaetse.

20

⁺Ende Moyses met Aaron ende alle die menichte der kinderen van Israhel hebben ouer die Leuiten gedaen alle dat die Heere Moysi beuolen hadde,

+ D

21

ende sij sijn ghesuyuert, ende sij hebben haer cleederen ghewasschen. Ende Aaron heeftse opghehauen in dat aenschijn des Heeren, ende hy heeft voor hen ghebeden,

22

dat sij ghesuyuert souden moghen gaen tot haren diensten in dat tabernakel des verbonts, voor Aaron ende sijn sonen, Ghelijck die Heere Moysi beuolen hadde vanden Leuiten, alsoo eest ghedaen.

23

Ende die Heere heeft tot Moysen ghesproken segghende,

24

Dit is die wet der Leuiten, Van vijfentwintich iaren ende daer bouen sullen sij inne gaen om te dienen in dat tabernakel des verbonts.

25

Ende als sij dat vijftichste iaer van haer ouderdom voleyndt hebben, soo en sullen sij niet meer dienen,

26

ende sij sullen haerder broeders dienaers wesen in dat tabernakel des verbonts, op dat sij bewaren tghene dat hen beuolen sal worden, maer die wercken en sullen sij niet doen, alsoo suldi die Leuiten bescicken in haer bewaringhen.