Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ENde die Heere heeft tot Moysen ghesproken, segghende,

+ A

2

Spreect tot die kinderen van Israhel, ende ghy sult tot hen segghen, Een man oft vrouwe als sij een ghelofte ghedaen hebben om gheheylicht te worden, ende dat sij hen willen den Heere heylich maken,

3

soo sullen sij hen onthouden van wijn ende van alle dat droncken maken mach, Edick van wijne ende van eenighen anderen dranc ghecomen, ende alle datmen wt wijndruyuen perst, en sullen sij niet drincken, sij en sullen oock gheen verssche noch drooghe druyuen eten,

4

alle die daghen dat sij door ghelofte den Heere gheheylicht sijn. Alle dat vanden wijnghaert wesen mach, vanden ghepersten druyuen tot den kernkens toe, en sullen sij niet eten.

5

Alle den tijt van sijnder afscheydinghen en sal gheen scaers ouer sijn hooft gaen tot dat volcomen is den dach daer in hy den Heere gheheylicht wordt.

Hy sal heylich wesen die wijle dat het hayr sijns hoofts wasset,

6

Alle den tijt dat hy gheheylicht is, soo en sal hy tot gheenen dooden gaen,

7

noch hy en sal hem niet ontsuyueren aen sijn vaders, oft moeders, oft broeders, oft susters lijck. ⁺Want sijns Gods wijdinghe is op sijn hooft,

+ B

8

Alle die daghen van sijnder versceydinghen sal hy den Heere heylich wesen.

9

Maer eest sake datter yemant onuersienlijck voor hem sterft soo sal thooft sijnder wijdingen besmet worden, dwelc hy dan terstont sal scheren opden seluen dach van sijnder suyueringhen, ende wederom opden seuensten dach,

10

maer opden achtsten dach soo sal hy offeren twee tortelduyuen oft twee ionghe duyuen, den priester aen den inganck van dat verbont des ghetuyghenis,

11

ende die priester sal deen maken voor die sonde, ende dander tot een brantoffer, ende hy sal voor hem bidden, om dat hy ouer eenen dooden ghesondicht heeft, ende hi sal sijn hooft heylich maken op dien dach,

12

ende hy sal den Heere heylighen die daghen van sijnder afscheydinghen offerende een iarich lammeken voor die sonde, alsoo nochtans dat die voorleden daghen van gheender weerden en sullen wesen, want sijn heylinghe is besmet.

13

⁺Dit is die wet der heylinghen, Als die daghen sullen veruult sijn, die welcke hy met gheloften ghestelt hadde, so sal hy hem aenbrenghen voor die doore van dat tabernakel des verbonts,

+ C

14

ende hy sal sijn offerande den Heere offeren, een iarich lammeken sonder smette tot eenen brantoffer, ende een iarich scaep sonder smette voor die sonde, ende eenen onbesmetten ram voor een vreedtsamighe slachofferande,

15

ende ooc mede eenen corf met ongheheefde brooden, die met olie beslaghen sijn, ende vladen sonder heue met olie bestreken ende die vochtighe offeranden van elcs welck

16

die priester voor den Heere offeren sal, ende salt maken so wel voor die sonde als tot eenen brantoffer.

17

Maer den ram sal hy dooden tot een vreedofferande, voor den Heere, offerende daer mede den corf der ongheheefder brooden, ende haer vochtighe offeranden die daer nae costume toebehooren.

18

Ende dan sal den nazareus thayr van sijnder heylighinghen gheschoren worden voor die doore van dat tabernakel des getuyghenis, ende hy sal sijn hayr nemen, ende salt opt vier legghen, welck ghesteken is onder den vreedoffer,

19

ende die ghecoecte scouder vanden ram, ⁺ende eenen wronck broots sonder deesem, wt den korf, ende een onghedeesemde vlade, ende hy sal dat in des nazareus hant gheuen, na dat sijn hooft ghescoren is.

+ D

20

Ende als hy dat weder van hem ontfanghen heeft, soo sal hy dat opheffen voor daenscijn des Heeren, ende die gheheylicht zijnde sullen des priesters sijn ghelijc dat borstken, waer af gheboden is datment afscheyden soude, ende die hope. Ende hier nae so mach die nazareus wijn drincken.

21

Dit is die wet vanden nazareus als hy sijn offerande den Heere beloeft heeft, den tijt van sijnder wijdinghen, sonder die dinghen welck sijn hant vinden sal, na dat hy metter herten ghelooft hadde, alsoo sal hy doen tot volmaectheyt van sijnder heylichmakinghen.

22

Ende die Heere heeft tot Moysen ghesproken segghende,

23

Spreect tot Aaron ende sijn sonen, Aldus suldi die kinderen van Israhel benedijden, ende ghy sult tot hen segghen,

24

Die Heere ghebenedijde v, ende beware v,

25

Die Heere thoone v sijn aensicht, ende zij ws bermhertich,

26

Die Heere keere sijn aensicht tot v, ende gheue v vrede.

27

Ende sij sullen mijnen naem op die kinderen van Israhel aenroepen, ende ic salse ghebenedijden.