Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde die Heere heeft tot Moysen gesproken segghende,

+ A

2

Ghebiedt den kinderen van Israhel, dat sij wten legher worpen alle die melaetsch sijn, ende die den vloet des saets hebben, ende die ouer eenen dooden besmet sijn,

3

Beide man ende vrouwe drijft wt den heyrlegher, op dat sij dien niet en ontsuyueren, als sij by v lieden woonen.

4

Ende die kinderen van Israhel hebben alsoo ghedaen, ende sij hebben die wten legher verdreuen, ghelijck die Heere tot Moysen gheseyt hadde.

5

Ende die Heere heeft tot Moysen ghesproken segghende,

6

Spreect tot die kinderen van Israhel, Een man oft een vrouwe als sij ghedaen hebben een van allen den sonden die den menschen pleghen te gheschieden, ende dat sij door versuemenisse het ghebodt des Heeren ouertreden hebben, ende misdaen,

7

soo sullen sij haer sonde belijden ende sij sullen wederom gheuen het principael, ende het vijfste deel noch daer bouen hem, den welcken sij misdaen hebben,

8

maer en isser niemant diet ontfanghe, soo sullen sij dat den Heere gheuen, ende het sal den priester toebehooren, wtghenomen den ram, die voor dat versoenen gheoffert wordt, op dattet een soenlijcke slachofferande wesen mach.

9

Ende alle die ierste vruchten welc die kinderen van Israhel offeren, behooren den priester,

10

ende wat van een ieghelijck besonder in die heylichste plaetse gheoffert wordt, ende den priester in sijn handen gheleuert, dat sal sijn wesen.

11

⁺Ende die Heere heeft ghesproken tot Moysen segghende,

+ B

12

Spreect tot die kinderen van Israhel, ende ghy sult tot hen segghen, Een man wiens wijf ghedoelt heeft, ende haren man versmadende,

13

by eenen anderen gheslapen heeft, ende dat die man dat niet en can beuinden, maer het ouerspel blijft verborghen, ende men en can dat door gheenen ghetuyghen bewijsen om dat sij int werck der oncuysheyt niet beuonden en is.

14

Eest sake dat den gheest der ialoursheyt den man verwect tegen sijn huysvrouwe die ontsuyuert is, oft met valschen vermoeden daer af beteghen wordt,

15

so sal hy die voor den priester brenghen. Ende hy sal voor haer een offerande offeren het thiende deel van een satum ghersten meels, hy en sal daer gheen olie op ghieten, noch gheen wieroock op legghen, want het is een sacrificie der ialoursheyt, ende een offerande ondersuekende douerspel.

16

Hierom salse die priester offeren ende voor den Heere stellen,

17

ende hy sal nemen heylich water in een eerden vat, ende een luttelken eerden vanden vloer des tabernakels sal hy daer inne doen.

18

⁺Ende als die vrouwe voert aenschijn des Heeren staen sal, dan sal hy haer hooft ontdecken, ende dat sacrificie der ghedenckenissen, ende die offerande der ialoursheyt op haer handen stellen, ende hy sal die alder bitterste wateren houden, daer hy met vervloekinghe die maledictien tsamen ingebracht heeft,

+ C

19

ende salse besweren ende segghen, En heefter gheen ander man by v gheslapen, noch en sijdi niet besmet verlatende ws mans bedde, soo en sullen v dese bitter wateren niet hinderen, daer ic die veruloeckinghen tsamen ingebracht hebbe.

20

Maer zijdi van uwen man ghesceyden, ende sijdi ontsuyuert, ende hebdi by eenen anderen man gheslapen,

21

soo sullen dese vermaledijdinghen op v comen Die Heere gheue v tot een veruloekinghe, ende tot eenen exempel van alle sijnen volcke,

22

Hi doe v dgye verrotten, ende uwen buyck moet swillende bersten, ende die vermalendide wateren moeten in uwen buyc gaen, ende als uwen buyck gheswollen is, soe moet dgye verrotten, Ende die vrouwe sal antwoorden Amen Amen.

23

Ende die priester sal dese veruloeckinghen in een boecxken scrijuen, ende die afwisschen met die alder bitterste wateren daer hy die vermalendijdinghen tsamen inghebracht heeft,

24

ende hy sal haer dat te drincken gheuen. Ende als sij die wtghedroncken heeft,

25

soo sal die priester wt haer hant nemen die offerande der ialoursheyt, ende hy sal die opheffen voor den Heere, ende opden outaer stellen,

26

Also nochtans dat hy ierstmael neme een hantvol van tsacrificie datter gheoffert wordt, ende ontsteeck dat opden outaer, ende

[p. *135]

dat hi also der vrouwen die bitterste wateren te drincken gheue.

27

Ende als sij die ghedroncken heeft, eest sake dat sij besmet is, ende dat sij haren man versmaet heeft, ende des ouerspels sculdich is, soo sullen die wateren der vermalendijnghen door haer gaen, ende haren buyck gheswollen sijnde, sal haer dgye verrotten. Ende die vrouwe sal wesen tot vermalendidinghe, ende tot eenen exempel alle den volcke.

28

Maer eest sake dat si niet besmet en is, soo sal sij onghescent zijn, ende sal kinderen voorts brenghen.

29

Dit is die wet van die ialoursheyt, Eest sake dat sij van haren man besijden gegaen is, ende dat sij besmet is,

30

ende dat haer man door den gheest der ialoersheyt teghen haer verwect sijnde, haer brengt voor daenschijn des Heeren, ende dat haer die priester ghedaen heeft nae alle dat voorscreuen is,

31

so sal die man onsculdich wesen, ende si sal haer boosheyt ontfanghen.