Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde die Heere heeft gesproken tot Moysen ende Aaron segghende,

+ A

2

Neemt die somme van Caaths sonen wt dat midden der Leuiten, by haren huysen ende familien,

3

van dat dertichste iaer ende daer ouer, tot dat vijfstichste iaer, van alle die gaen om te staen ende te dienen in dat tabernakel des verbonts.

4

Dit is die dienst van Caaths sonen,

5

Als den legher sal vertrecken, dan sal Aaron ende sijn sonen gaen in dat tabernakel des verbonts, ende in die heylichste plaetse, ende sij sullen dat voorhancsel afdoen dat voor den inganc hanghet, ende daer in sullen sij winden die arcke des ghetuyghenis,

6

ende sij sullen dat noch bedecken met een deccleet van iantinen vellen, ende sisullen daer ouer trecken noch een decsel gheheel hemelblau ende sij sullen die hantboomen daer in steken.

7

Ende die tafel des voorlegghens sullen sij oock winden in een hemelblau deccleedt, ende sij sullen by haer legghen die wieroockvaten ende die mortierkens, croesen ende bekers om die vochtighe offeranden te schencken, die brooden sullen altoos op die tafel wesen.

8

Ende sij sullen daer ouer trecken een root decsel dwelc sij noch eens ouertrecken sullen met een decsel van iantinen vellen ende sij sullen die hantboomen daer in steken.

9

Ende sij sullen een hemelblau deccleedt nemen daer sij den candelaer mede bedecken sullen, metten lampen ende met sijnen scaerkens ende bluschvaten ende met alle die olievaten, die om die lampen te onderhouden nootelijck sijn,

10

ende ouer alle dese sullen sij een decsel trecken van iantinen vellen, ende sij sullen die hantboomen daer in steken

11

Ende oock den gulden outaer sullen sij wenden in een hemelblau cleedt, ende sij sullen daer ouer trecken een decsel van iantinen vellen, ende die hantboomen daer in steken.

12

⁺Alle die ghereedtscappe daermen in die heylichste plaetse mede dient, sullen sij winden in een hemelblau deccleedt, ende daer ouer sullen sij een decsel van iantinen vellen trecken, ende sij sullen die hantboomen daer in steken.

+ B

13

Ende den outaer sullen sij oock van die asschen suyueren, ende sij sullen dien in een purpuren cleedt winden,

14

ende sij sullen by hem legghen alle die ghereedtscappen die welcke sij besighen tot sijnen dienst, te weten die vierpannen, crauwels, ende die vorcken, die haken, ende vierscuppen. Alle die ghereedtscappen des outaers sullen sij tsamen ouerdecken, met een decsel van iantinen vellen ghemaect, ende sij sullen die hantboomen daer in steken.

15

Ende als Aaron ende sijn kinderen die heylighe plaetse sullen ouerdect hebben, ende alle sijn ghereedtscappen, int optrecken vanden leghers, dan sullen Caaths kinderen binnen comen om die bedecte dinghen te draghen, ende sij en sullen die ghereedtscap van die alderheylichste plaetse niet handelen, op dat sij niet en steruen. Dit sijn die lasten van Caaths kinderen, in dat tabernakel des verbonts,

16

waer ouer dat sijn sal Eleazar Aarons des priesters sone, tot wiens sorghe ooc toebehoort die olie om die lampen te onderhouden, ende het ghemaect ruecoffer, ende het sacrificie datmen eewelijck offert, ende die olie der saluinghen, ende al wat tot den dienst des tabernakels behoort, ende van alle den ghereedtschappen die in die heylighe plaetse sijn.

17

Ende die Heere heeft ghesproken tot Moysen ende Aaron segghende,

18

En wilt dat geslachte vant Caath niet te niet doen wt het midden vanden Leuiten,

19

maer dit suldi hen doen, dat sij moghen leuen, ende niet en steruen, eest dat sij dat heylich der heylighen handelden, Aaron met sijnen sonen sullen binnen gaen, ende sij sullen elcken sijn werck bestellen, ende bescheyden wat een ieghelijck sal moeten draghen,

20

maer die ander en sullen wt gheen nieuschiericheyt besien die dinghen die in die heylighe plaetse sijn, voor datse ouerdect sijn, oft anders sullen sij steruen.

21

⁺Ende die Heere heeft tot Moysen ghesproken, segghende,

+ C

22

Neemt ooc het heel ghetal van Gersons sonen, by hen huysen ende familien ende gheslachten,

23

van dertich iaren ende daer ouer, tot die vijftich iaren. Teltse allegader die daer in gaen, ende dienen in dat tabernakel des verbonts.

24

Dit is dat officie vander Gersoniten familie,

25

dat sij sullen draghen die gordijnen des tabernakels, ende dat dack des verbonts, dat ander decsel, ende bouen al dat iantinen ouerdecsel, ende dat voorspansel datter hanct voor den inganck van dat tabernakel des verbonts,

26

die gordijnen des voorhofs, ende dat voorhancsel aen den inganck welck daer is voor dat tabernakel. Alle dat tot den outaer toebehoort, die zeelkens, ende die ghereedtscappen des diensts

27

sullen Gersons sonen draghen nae tghebodt van Aaron

[p. *134]

ende sijn sonen, ende een ieghelijck sal weten tot wat last dat sij moeten ghestelt sijn.

28

Dit is den dienst van die familie der Gersoniten, in dat tabernakel des verbonts, ende sij sullen wesen onder die hant van Ithamar Aarons des priesters sone.

29

Ende die kinderen van Merari, by die familien ende huysen van haren vaders suldi tellen

30

van dertich iaren ende daer ouer tot vijftich iaren, alle die daer binnen gaen tot dat officie van haren dienst, ende totten dienst van dat verbont des ghetuyghenis.

31

Dit sijn haer lasten, Sij sullen draghen die plancken des tabernakels ende haer rijchelen, die columnen ende haer basementen,

32

ende die columnen ooc des voorhofs int ronde, met haren basementen, spannaghelen, ende coorden. Alle die vaten ende den huysraet sullen by ghetale ontfanghen, ende also sullen sij die draghen.

33

Dit is dat officie der familien vanden Merariten ende haren dienst in dat tabernakel des verbonts. Ende sij sullen wesen onder die hant van Ithamar Aarons des priesters sone.

34

⁺Dus hebben Moyses ende Aaron ende die princen der synagogen Caaths sonen ghetelt, by haren gheslachten ende haerder vaderen huysen

+ D

35

van dertich iaren ende daer bouen, tot dat vijftichste iaer, alle die daer gaen tot den dienste van dat tabernakel des verbonts

36

ende daer sijnder vonden twee duysent, seuenhondert ende vijftich.

37

Dit is dat ghetal des volcs van Caath, die in dat tabernakel des verbonts ghaen, dese hebben Moyses ende Aaron ghetelt nae des Heeren woordt, door Moyses hant.

38

Ende die kinderen van Gerson sijn ooc ghetelt by haren maescappen ende haerder vaderen huysen,

39

van dertich iaren ende daer bouen, tot dat vijftichste iaer, alle die iugaen om te dienen int tabernakel des verbonts,

40

ende daer sijnder vonden twee duysent, ses hondert, ende dertich.

41

Dit is tvolck vanden Gersoniten, die welck Moyses ende Aaron ghetelt hebben, nae des Heeren woordt.

42

Oock waren daer ghetelt die sonen van Merari, by haren gheslachten ende haerder vaderen huysen,

43

van dertich iaren ende daer bouen tot dat vijftichste iaer, alle die daer ginghen om te volbrenghen die godtsdiensten van dat tabernakel des verbonts,

44

ende daer isser vonden drij duysent, ende tweehondert.

45

Dit is het ghetal van Meraris kinderen, die welck Moyses ende Aaron ouertelt hebben, nae des Heeren ghebodt door Moyses hant.

46

Alle die ghetelt sijn vanden Leuiten, ende die by namen heeft doen tellen Moyses ende Aaron met die princen van Israhel by haren gheslachten, ende by haerder vaderen huysen,

47

van dertich iaren ende daer bouen, tot dat vijftichste iaer, ingaende totten dienst des tabernakels, ende om die lasten te draghen,

48

waren tsamen achtduysent, vijfhondert, ende tachtentich.

49

Na des Heeren woordt heeft Moyses die ghetelt, eenen ieghelijcken nae sijnen dienst, ende lasten, alsoo die Heere hem beuolen hadde.