Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺DIt sijn die gheslachten van Aaron ende Moyses opden dach doen die Heere tot Moysen ghesproken heeft opden berch van Sinai.

+ A

2

Ende dit sijn die namen van Aarons kinderen, Sijn ierste gheboren sone was Nadab, daer nae Abiu, ende Eleazar ende Ithamar.

3

Dit sijn die namen van Aarons sonen der priesteren die ghesalft sijn, ende der welcker handen gheuult ende ghewijt sijn om dat sij het priesterscap souden bedienen,

4

Want Nadab ende Abiu zijn ghestoruen doen sij vreemt vier offerden voor des Heeren aenschijn in die woestijne van Sinai sonder kinderen, ende Eleazar ende Ithamar hebben dat priesterscap bedient, voor Aaron haren vader.

5

Ende die Heere heeft tot Aaron ghesproken seggende,

6

Neemt by v dat gheslachte van Leui, ende doet die staen voor Aarons aensicht, dat sij hem dienen,

7

ende dat sij waken ende gadeslaen al wat den dienst der ghemeynten aengaet voor dat tabernakel des getuyghenis,

8

ende dat sij die ghereetscappen des tabernakels bewaren, dienende in sijnen dienst.

9

⁺Ende ghy sult die Leuiten tot eender ghiften geuen

+ B

10

Aaron ende sijnen sonen den welcken sij vanden kinderen van Israhel gheleuert sijn. Maer Aaron ende sijn sonen suldi stellen ouer den dienst des priesterscaps. Een vreemde die tot dien dienst ghaet, sal ghedoot worden.

11

Ende die Heere heeft tot Moysen ghesproken segghende,

12

Ick heb die Leuiten wt die kinderen van Israhel ghenomen, voor alle die ierste gheboren, die der moeder lichaem ierst open doen, onder die kinderen van Israhel. Ende die Leuiten sullen my toebehooren,

13

Want mijne is alle ierste gheboren, van dier tijt dat ick alle dierste gheboren van Egipten versloech int lant van Egipten, soo heb ick my gheheylicht alle dat ierste gheboren wordt in Israhel, van den mensche aen tot dat cleyn vee toe, sij sijn mijne, ick ben die Heere.

14

⁺Ende die Heere heeft tot Moysen ghesproken in die woestijne van Sinai segghende,

+ C

15

Telt die kinderen van Leui, door haer vaderen huysen ende familien, alle manspersoonen van eender maent ende daer bouen.

16

Ende Moyses heeftse ghetelt ghelijck die Heere beuolen hadde.

17

Ende die sonen van Leui sijn gheuonden by haer namen, Gerson, ende Caath, ende Merari.

18

Die sonen van Gerson, Lebni, ende Semei.

19

Die sonen van Caath, Amram ende Iesaar, Hebron ende Oziel.

20

Die sonen van Merari, Moholi, ende Musi.

21

Van Gerson waren twee familien, te weten der Lebniten ende der Semeiten,

22

waer af dat ghetelt is het volck van manspersoonen, van eender maent ende daer bouen tot seuen duysent ende vijfhondert.

23

Dese sullen achter het tabernakel haren legher maken ten tweesten

24

onder den Prince Heliasaph Iaels sone.

25

Ende sullen die wake hebben in dat tabernakel des verbonts

26

van dat selue tabernakel ende sijn decsel, dat voorspantsel datmen trect voor die doore van dat dack des verbonts, ende die gordijnen van dat voorhof, ende ooc mede dat voorhancsel datmen hanghet aen den inganc van dat voorhof des tabernakels, ende al dat tot den dienst des outaers toe behoort, die zeelen des tabernakels ende alle sijn ghereedtscappen.

27

Dat gheslachte van Caath sal tot natien hebben die Amramiten, ende Iesaariten, ende Hebroniten, ende Ozieliten. Dit sijn die familien der Caathiten, ghetelt by haren namen,

28

alle die mans persoonen, van eender maent ende daer ouer, acht duysent ende seshondert, sij sullen te bewaren hebben die heylichste plaetse,

29

ende sij sullen haren legher stellen aen die zuytsijde,

30

Ende hen Prince sal wesen Elizaphan Oziels sone,

31

ende sij sullen die arcke bewaren, ende die tafele, ende den candelaer, die outaren, ende die ghereetscappen van die alderheylichste plaetse, daer in ghedient wordt, ende dat voorhancsel, ende alle desghelijcken huysraet.

32

Maer die Prince bouen der Leuiten princen, Eleazar Aarons des priesters sone, die sal wesen ouer die bewaerders van die hoede der heyligher plaetsen.

33

Maer van Merari sullen natien sijn, die Moholiten, ende die Musiten ghetelt by haren namen

34

alle mans persoonen, van eender maent ende daer ouer, ses duysent ende twee hon-

[p. *133]

dert,

35

Hen prince was Suriel Abihaiels sone, sij sullen haren legher maken aen die Noortsijde.

36

Ende onder haer bewaringhe sullen wesen die plancken des tabernakels, ende die rijchelen, ende die columnen, ende haer basementen, ende alle dat tot deser dinghen cieraet toe behoort,

37

ende die columnen van dat voorhof int ronde met haren basementen, ende die spannaghelen met haren seelen.

38

Moyses ende Aaron met hen sonen sullen haren leger maken voor dat tabernakel des verbonts, dat is aen die Oostsijde, hebbende die bewaringhe van die alderheylichste plaetse, int midden der kinderen van Israhel, soo wie anders daer by coemt, die sal steruen.

39

⁺Alle die Leuiten die Moyses ende Aaron, nae des Heeren ghebot ghetelt hebben, by haer familien der mans persoonen, van eender maent ende daer bouen, waren twee ende twintich duysent.

+ F

40

Ende die Heere heeft tot Moysen gheseit, Telt die ierste gheborenen der mans personen, van die kinderen van Israhel, van eender maent, ende daer bouen, ende ghy sult hen somme hebben.

41

Ende ghy sult voor my nemen die Leuiten voor alle dierste gheborenen der kinderen van Israhel, Ic ben die Heere. Ende hen vee, voor alle dierste gheborenen van die beesten der kinderen van Israhel.

42

Moyses heeft getelt ghelijc die Heere gheboden hadde, dierste gheboren der kinderen van Israhel,

43

ende die mans persoonen by hen namen van eender maent out ende daer ouer, waren twee ende twintich duysent, tweehondert ende drijentseuentich.

44

⁺Ende die Heere heeft tot Moysen ghesproken, segghende,

+ G

45

Neemt die Leuiten voor dierste gheborenen der kinderen van Israhel, ende dat vee der Leuiten voor haer vee, ende die Leuiten sullen mijne wesen, Ick ben die Heere.

46

Maer inden prijs van die tweehondert ende drijentseuentich die welcke te bouen gaen tghetal der Leuiten van dierste gheborenen der kinderen van Israhel

47

suldi nemen voor elc hooft vijf siclen, nae tghewichte der heyligher plaetsen. Eenen sicle ghelt twintich cleyn penninghen.

48

Ende ghy sult dat gelt Aaron ende sijnen sonen gheuen, den prijs der gheender die daer ouer sijn.

49

Dus heeft Moyses ghenomen het gelt der gheender die daer meer waren, ende die hy gheloft hadde vanden Leuiten

50

voor die ierste gheborenen der kinderen van Israhel, van duysent drijhondert ende vijfentsestich siclen, nae dat ghewichte der heyligher plaetsen,

51

ende hy heeft dat Aaron ghegeuen ende sijnen sonen nae dat woort, welck hem die Heere beuolen hadde.