Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺ENde die Heere heeft ghesproken tot Moysen ende Aaron, segghende.

+ A

2

Alle die kinderen van Israhel, sullen elc haren legher maken, rontsomme den tabernakel des verbonts, bi hen hoopen, teekenen, ende banieren, ende huysen van haren gheslachten.

3

Ten oosten sal Iudas sijn tenten slaen, nae die hoopen van sijnen heyre, ende die prince van sijnen kinderen sal zijn Nahasson Aminadabs sone,

4

ende alle die somme der strijtbaer mannen van sijnen gheslachte vierentseuentich duysent ende ses hondert.

5

Neffens hem hebben haer tenten gheslaghen, die van Issachars geslachte, wiens prince was Nathanael Suarssone,

6

ende alle tghetal van sijnen strijtbaer mannen was vier ende vijftich duysent vier hondert.

7

Int gheslachte van Sabulon was die prince Eliab Helons sone,

8

ende alle dat heyr der strijtbaer mannen van sijnen gheslachte seuen ende vijftich duysent, ende vierhondert.

9

Alle die in Iudas heyr ghetelt zijn, waren hondert ende sesentachtentich dusent, ende vier hondert, ende nae haer scharen sullen si dierste wtgaen.

10

⁺In den legher van Rubens kinderen aen die suytsijde, sal die prince zijn Elisur Sedeurs sone,

+ B

11

ende alle dat heyr van sijnen strijtbaren mannen die ghetelt sijn, waren sesenveertich duysent, ende vijf hondert.

12

By hem hebben tenten gheslaghen, die van Symeons gheslachte, wiens prince was Salamiel Surisaddais sone,

13

ende alle dat heyr van zijnen strijtbaren mannen die ghetelt sijn, waren neghen ende vijftich duysent, ende drij hondert.

14

In dat gheslachte van Gad, was die prince Eliasaph Duels sone,

15

ende alle dat heyr van sinen strijtbaeren mannen die ghetelt sijn, waren vijfenveertich duysent, ses hondert, ende vijftich.

16

Alle die ghetelt waren in Rubens legher, waren hondert eenenvijftich duysent, vier hondert, ende vijftich bi haren hoopen, si sullen in die tweede plaetse voorts trecken.

17

Ende het tabernakel des ghetuygenis sal opghehauen worden door der Leuiten dienst, ende bi haer hoopen, alsoomen dat oprechten sal, soo salmen dat ooc nederlegghen. Sij sullen elc besonder voorts trecken nae haer plaetsen ende ordinancien.

18

⁺Aen die westsijde sullen wesen die legheren der kinderen van Ephraim, wiens prince was Elisama Aminadabs sone,

+ C

19

tgheheel heyr van sinen strijtbaer mannen die

[p. *132]

ghetelt zijn, waren veertich duysent ende vijf hondert.

20

Ende met hemlieden het gheslachte van Manasses kinderen, wiens prince was Gamaliel Phadassurs sone

21

ende alle dat heyr van sijnen strijtbaren mannen die ghetelt sijn, waren twee ende dertich duysent, ende twee hondert.

22

Int gheslachte der kinderen van Beniamin was die Prince Abidan Gedeons sone,

23

ende tgheheel heyr van strijdtbaren mannen die ghetelt sijn, waren vijfendertich duysent, vierhondert.

24

Alle die in Ephraims legher ghetelt sijn, waren hondert duysent ende achtduysent, ende een hondert by haren hoopen, sy sullen die derde int voortstrecken sijn.

25

Aen die Noortsijde hebben haren legher gheslaghen die kinderen van Dan, wiens Prince heeft gheweest Ahieser, ⁺Amisaddais sone,

+ D

26

ende alle dat heyr van sijnen strijtbaren mannen, die ghetelt sijn, waren twee ende tsestich duysent, ende seuenhondert.

27

By hem hebben die van Asers gheslachte haer tente gheslaghen, wiens Prince was Phegiel Ocrans sone,

28

ende alle dat heyr van sijnen strijtbaren mannen, die getelt sijn, waren een ende veertich duysent, ende vijfhondert

29

Van dat gheslachte der kinderen van Nephthali was die Prince Ahira Enans sone,

30

ende alle dat heyr van sijnen strijdtbaren mannen, waren drijenvijftich duysent, ende vier hondert.

31

Alle die in Dans legher ghetelt sijn, waren hondertduysent, seuen ende vijftich duysent, ende ses hondert, ende sij sullen die leste voortstrecken

32

Dit is tghetal der kinderen van Israhel, by die huysen van haren gheslachten ende scaren ende vanden versceyden heyren, ses hondert duysent ende drij duysent, vijfhondert, ende vijftich.

33

Maer die Leuiten en sijn niet ghetelt onder die kinderen van Israhel, want alsoo hadde die Heere Moysi beuolen.

34

Ende die kinderen van Israhel hebben ghedaen na alle dat die Heere gheboden hadde. Sij hebben haer leghers gheslaghen nae hen hoopen, ende sijn voortghetrocken by haer familien ende haerder vaderen huysen.

[afbeelding]