Den gheheelen Bybel, Inhoudende het oude ende nieuwe Testament (Leuvense bijbel 1548)

Dat eerste Capittel.

1

⁺ENDE die Heere heeft tot Moysen ghesproken in die woestijne Sinai in dat tabernakel des verbonts opden iersten dach vander tweeder maent, int tweede iaer nae dat si wt Egypten ghegaen waren, segghende.

+ A

2

Neemt die somme vander geheelder vergaderinghe der kinderen van Israhel, nae haren gheslachten ende huysen, ende die namen van een ieghelijc,

3

wat datter is van mans persoouen van twintich iaren ende opwaerts, van alle der stercker mannen van Israhel, ende ghi sultse tellen nae haren scharen, ghi ende Aaron.

4

Ende met v sullen wesen die princen vanden gheslachten ende huysen in haren maescappen,

5

der welcker namen sijn dese.

⁺Van Ruben Elisur Sedeurs sone,

+ B

6

Van Symeon Salamiel Surisaddais sone,

7

Van Iudas, Naason Aminadabs sone,

8

Van Issachar, Nathanael, Suars sone,

9

Van Sabulon, Eliab, Helons sone,

10

maer van Ioseps sonen, van Ephraims gheslachte, Elisama, Ammiuts sone, Van Manasse, Gamaliel, Phadassurs sone,

11

Van Beniamin, Abidan, Gedeons sone,

12

Van Dan, Ahieser, Amisaddais sone,

13

Van Aser Phegiel, Ochrans sone,

14

Van Gad, Eliasaph, Duels sone,

15

Van Nephtali, Ahira, Enans sone.

16

Dese waren die alder edelste princen der menichten in haer gheslachten ende maesscappen, ende hoofden van Israhels heyr,

17

die welc Moyses ende Aaron hebben genomen met

[p. *131]

alle die menichte des ghemeynen volcs,

18

ende sij hebben die vergadert opden iersten dach vander tweeder maent tellende die nae haren gheslachten, huysen, ende huysgesinnen, ende die hoofden ende namen van een yeghelijc, van dat twintichste iaer ende daer bouen,

19

ghelijc die Heere Moysi beuolen hadde. ⁺Ende daer zijn ghetelt in die woestijne Sinai,

+ C

20

van Ruben Israhels ierste gheboren sone bi haren gheslachten, ende familien, ende huysen, ende namen van yeghelijcs hoofden, alle dat is van mans persoonen, van twintichste iaer ende daer bouen, die ter oorloghen trecken,

21

sesenveertich duysent ende vijf hondert.

22

Van Symeons kinderen, bi haer gheslachten familien, ende huysen van haren maescappen, waren ghetelt bi die namen ende hoofden van een yeghelijc alle dat van mans persoon is, van twintich iaren ende daer bouen die ter orloghen ghinghen,

23

neghen ende vijftich duysent, ende drij hondert.

24

Van Gads kinderen bi haren gheslachten ende familien, ende huysen van haren maescappen zijn ghetelt bi elcks namen van twintichste iaer ende daer bouen, alle die ter orloghen ghinghen,

25

vijf ende veertich duysent, ses hondert ende vijftich.

26

⁺Van Iudas kinderen bi haren gheslachten ende familien, ende huysen van haren maescappen, bi elcs namen van twintichste iaer ende daer ouer, alle die ten strijde trecken mochen,

+ D

27

sijnder ghetelt vier ende tseuentich duysent ende ses hondert.

28

Van Issachars kinderen by die gheslachten ende familien ende huysen van haren maescappen, bi elcs namen, van twintichste iaer ende daer bouen, alle die ten strijde trocken,

29

sijnder ghetelt vier ende vijftich duysent, ende vier hondert.

30

Van Sabulons kinderen bi haren gheslachten, ende huysen van haren maescappen, sijnder ghetelt bi elcks namen, van dat twintichste iaer ende daer ouer, alle die ter orloghen mochten gaen,

31

seuen ende vijftich duysent, ende vier hondert.

32

Van Iosephs sonen. Van Ephraims kinderen bi haren gheslachten ende familien, ende huysen van haren maesscappen sijnder ghetelt bi elcks namen van twintichste iaer ende daer ouer, alle die mochten ter orloghen trecken,

33

veertich duysent ende vijf hondert.

34

⁺Voorts van Manasses kinderen by haren gheslachten ende familien ende huysen van haren maescappen sijnder ghetelt bi elcs namen van twintich iaren ende daer bouen, alle die ter orloghen gaen mochten,

+ E

35

twee ende dertich duysent ende twee hondert.

36

Van Beniamins kinderen bi haren gheslachten, ende familien, ende huysen van haren maescappen sijnder ghetelt bi elcs namen van dat twintichste iaer ende daer bouen, alle die ter orloghen gaen mochten,

37

vijf ende dertich duysent ende vier hondert.

38

Van Dans kinderen bi haren gheslachten ende familien ende huysen van haren maesscappen sijn ghetelt bi elcs namen van twintichste iaer ende daer bouen, alle die ten strijde mochten trecken,

39

twee ende tsestich duysent, ende seuen hondert.

40

⁺Van Asers kinderen, bi haren gheslachten ende familien ende huysen van haren maescappen, sijn ghetelt bi elcs namen van twintich iaren ende daer ouer, alle die mochten ter orloghen trecken

+ F

41

eenenveertich duysent ende vijf hondert.

42

Van Nephtali kinderen by haer gheslachten ende familien, ende huysen van haren maescappen, sijnder ghetelt bi elcs namen, van dat twintichste iaer ende daer bouen, alle die ter orloghen trecken mochten

43

drij ende vijftich duysent, ende vier hondert.

44

Dit zijn die ghene die Moyses, ende Aaron, ende die twaelf princen van Israhel ghetelt hebben eenen yeghelijcken besonder, by die huysen van haren maescappen.

45

Ende alle tghetal der kinderen van Israhel, nae haer huysen, ende familien van twintich iaren ende daer ouer, die ter orloghen trecken mochten,

46

waren ses hondert duysent, ende drij duysent, vijfhondert, ende vijftich mannen.

47

⁺Maer die Leuiten en waren int gheslachte van haren familien met hem niet ghetelt.

+ G

48

Ende die Heere heeft tot Moysen ghesproken, segghende.

49

Dat gheslacht van Leui en wilt niet tellen, noch en telt haerlieder somme niet bi die kinderen van Israhel,

50

maer steltse op dat tabernakel des ghetuyghenis, ende allen zijn vaten, ende alle dat tot den ceremonien toebehoort. Sij sullen dat tabernakl draghen ende alle sijn ghereetscap, ende si sullen inden dienst wesen, ende si sullen haren legher maken rontsomme den tabernakel.

51

Ende alsmen sal moeten voorts reysen soo sullen die Leuiten dat tabernakel aflegghen, ende alsmen sal den legher neder slaen, soo sullen si het tabernakel op rechten, Soo wie datter anders toe gaet, dien salmen dooden.

52

Ende die kinderen van Israhel sullen haer leghers maken, een ieghelijc nae sijn scharen, vergaderinghe ende heyren.

53

Maer die Leuiten sullen haer tenten slaen rontsomme den tabernakel, op datter gheen gramscap en come op die menichte der kinderen van Israhel, ende sij sullen die wake houden in die bewaringhen, van dat tabernakel des ghetuygenis.

54

Hierom hebben die kinderen van Israhel ghedaen nae alle dat die Heere Moysi beuolen hadde.