Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

ICk ben die Heere v Godt, ⁺ghy en sult voor v gheenen afgod oft ghesneden beelt maken, noch ghy en sult gheen tijtelen oprechten, noch gheenen wtnemenden steen stellen in v lant, om dien te aenbidden. Want ick ben die Heere v Godt.

+ A

2

Bewaert mijn sabbothdaghen, ende vreest mijn heylighe plaetse, ic ben die Heere.

3

Eest sake dat ghi nae mijn gheboden wandelt, ende dat ghi mijn beuelinghen bewaert ende die doet, soo sal ic v reghenen gheuen te sijnen tijde,

4

ende die aerde sal haer groeytsel gheuen, ende die boomen sullen vol vruchten worden.

5

Den dorschtijt sal den wijn tijt achterhalen, ende tsnijden des wijngaerts sal den saeytijt ghenaken, ende ghi sult v broot eten met versaetheden, ende ghi sult sonder vreese in v lant woonen.

6

Ick sal v vrede gheuen in allen v palen, ghi sult slapen ende daer en sal niemant zijn die v veruaren sal. Ic sal die quade dieren van v nemen, ende tswaert en sal door v palen niet gaen.

7

⁺Ghi sult v vianden veruolghen ende si sullen voor v vallen,

+ B

8

ende vijue vanden uwen sullen hondert vreemde veruolghen, ende hondert van v, thien duysent, v vianden sullen metten swaerde vallen voor v lieden aensicht.

9

Ic sal v lieden aensien, ende v doen wassen, ghy sult vermenichfuldicht worden, ende ic sal mijn verbont met v lieden vast maken.

10

Ghy sult dat outste vanden ouden

[p. *129]

eten, ende ghy sult dat oude (als die nieuwe ouer comen sullen) wech worpen.

11

Ic sal mijn tabernakel) stellen int midden van v lieden, ende mijn ziele en sal v niet verworpen.

12

Ic sal onder v lieden wandelen, ende ic sal v God sijn, ende ghi sult mijn volc wesen.

13

Ic ben die Heere uwe Godt die v gheleyt hebbe wt dat lant der Egyptenaren, dat ghi hen niet dienen en soudet, ende die van uwen necken die ketenen ghebroken hebbe dat ghi opgherecht sout gaen.

14

⁺Maer eest dat ghi mi niet en hoort, ende alle mijn gheboden niet en doet,

+ C

15

eest dat ghi mijn wetten versmaet, ende mijn rechten veracht, dat ghi niet en doet die dinghen die van mi inghestelt sijn, ende dat ghy mijn verbont breket,

16

soo sal ic v lieden dese dinghen doen. Ick sal v haestelijck versoecken met armoede, ende met hitten, die welcke v ooghen berderuen ende v zielen verteren sullen. Ghy sult v saet verloren saeyen, dwelc sal vanden vianden verslonden worden.

17

Ick sal mijn aensicht tseghen v stellen, ende ghy sult voor uwe vianden vallen, ende ghy sult tonder gheworpen worden hen die v haten, ghi sult vlieden als v niemant en veruolcht.

18

Ende eest sake dat ghy my noch alsoo niet onderdanich en sijt, soo sal ick v straffinghen seuenmael meerder maken, om uwer sonden wille,

19

ende ic sal die houerdie van uwer verhartheyt heel in stucken breken. En ic sal v den hemel van bouen maken ghelijck yser, ende die eerde metalen,

20

Uwen arbeyt sal te vergheefs ghedaen worden, Die aerde en sal gheen groeytsel voort brenghen, ende die boomen en sullen gheen oegst gheuen.

21

⁺Eest sake dat ghi teghen mi wandelt, ende dat ghi mi niet hooren en wilt, soo sal ic noch seuenmael v plaghen vermeerderen, om uwer sonden wille,

+ D

22

ende ick sal die wilde beesten des velts op v lieden senden, die welck v sullen vernielen, ende v vee, ende sullen alle dinghen brenghen tot een cleyn ghetal, ende v weghen sullen woest worden.

23

Ende eest sake dat ghi alsoo v noch niet en wilt laten onderwijsen, maerdat ghy tseghen my wandelt,

24

soos al ic oock tseghen v wandelen, ende ick sal v seuenmael meer slaen, om uwer sonden wille,

25

ende ick sal op v lieden brenghen een wrekende sweert mijns verbonts. Ende als ghi in die steden gheuloden sult sijn soo sal ick die pestilencie int midden van v lieden senden, ende ghy sult in uwer vianden handen gheleuert worden,

26

als ick den staf ws broots sal ghebroken hebben, alsoo dat seuen vrouwen brooden backen sullen in eenen ouen, ende dat sij die sullen met ghewichte weder gheuen, ende ghy sult eten ende niet versaet worden.

27

⁺Maer eest dat ghi oock hier door mi niet en hoort maer dat ghi tseghen mi wandelt,

+ E

28

soo sal ick ooc tseghen v lieden wandelen, met een contrarie rasende gramschap, ende ick sal v straffen met seuen plaghen om v lieder sonden wille,

29

alsoo dat ghy eten sult het vleesch van uwen sonen ende van uwen dochteren,

30

ick sal v hoochden afworpen, ende uwer afgoden beelden in stucken breken. Ghi sult doot vallen tusschen die veruallinghen van uwen afgoden, ende mijn ziele sal v verfoeyen,

31

alsoo seere dat ick v steden sal brenghen tot woestheyt, ende ick sal v heylighe plaetsen verlaten maken, noch ick en sal niet meer den aldersuetsten rueck ontfanghen,

32

Ende ick sal v landt verderuen, ende v vianden sullen hen daer af seer verwonderen, als sij dies bewoonders sijn sullen,

33

Maer v lieden sal ick verstroeyen onder die heydenen, ende ick sal een swaert achter v wttrecken, ende v lant sal woest sijn, ende v steden afgheworpen.

34

Dan sal dat lant behaghen hebben in sijnder rusten, alle die daghen sijnder woestheden, als ghi sult

35

inder vianden lant sijn, dan salt sijnen sabboth houden ende rusten in die sabboth daghen van sijnder woestheden, om dat niet gherust en heeft op v sabboth tijden, als ghi daer in woondet,

36

ende den ghenen die daer van v lieden sullen ouerblijuen, sal ick vreese gheuen in haer herten, ⁺in die landen van haren vianden. Hen sal veruaren tgheluyt van een vlieghende loof, ende sij sullen alsoo vlieden als van een swaert, sij sullen vallen alse niemant en veruolcht,

+ F

37

ende sij sullen vallen een ieghelijc ouer sijn broeders, ghelijck die wter orloghen vlieden, niemant van v lieden, en sal sijn vianden dorren wederstaen.

38

Ghy sult onder die heydenen vergaen, ende der vianden lant sal v vernielen.

39

Ende eest datter sommighe van dien ouer blijuen die sullen verswijnen in haer boosheden int lant van haren vianden, ende om haerder vaderen ende om haer sonden sullen ghepinicht worden,

40

tot dat sij haer ende haerder ouders misdaden belijden sullen, daermede dat sij ouertreden hebben teghen mi, ende tseghen my ghewandelt.

41

Daerom sal ick oock tseghen hen wandelen, ⁺ende ic salse brenghen in een viandich lant, tot dat haer onbesneden herte hen scame. Dan sullen sij voor haer boosheden bidden,

+ G

42

ende ick sal mijns verbonts ghedachtich wesen, dat ic vast ghemaect hebbe met Iacob, ende Isaac, endeAbraham, Ende ic sal haers lants ooc ghedachtich wesen,

43

dat welc alst verlaten sal sijn van hen, soe salt zijn behaghen hebben in sijnder rusten, lijdende verwoestheyt om haren wille, Maer sij sullen voor haer sonden bidden, om dat sij mijn rechten verworpen hebben, ende mijn wetten versmaet.

44

Maer nochtans doen si ooc inder vianden lant waren, soo en heb ickse niet heel verworpen, noch ic en hebse alsoo niet versmaet, dat sij heel vernielt souden worden, ende dat ick breken soude mijn verbont met hen, Want ick ben die Heere haerlieder Godt,

45

ende ic sal ghedachtich wesen mijns voorleden verbonts, doen icse leyde wt dat lant van Egypten int aensien der heydenen, om dat ic haerlieder Godt wesen soude, Ick ben die Heere Godt.

46

Dit zijn die rechten ende gheboden ende wetten, welck die Heere ghegheuen heeft tusschen hem ende tusschen die kinderen van Israhel, opden berch Sinai door Moyses hant.